Deuteronomy 27 - Yn Vible Casherick 1775 1819

CAB. XXVII

¹ As doardee Moses, marish ooilley shanstyr Israel, yn pobble, gra Freill-jee ooilley ny oardaghyn ta mish dy harey diu er y laa shoh.

² As hig eh gy-kione, tra vees shiu er n’gholl harrish Jordan, gys y cheer ta’n Chiarn dty Yee dy choyrt dhyt, dy jean uss soiaghey seose dhyt claghyn mooarey, as ad y phlastrail harrish.

³ As nee oo scrieu orroo ooilley goan y leigh shoh, erreish dhyt v’er n’gholl harrish, dy vod oo goll stiagh ’sy cheer, ta’n Chiarn dty Yee dy choyrt dhyt, cheer ayn ta palchey bainney as mill: myr ta’n Chiarn Jee dt’ayraghyn er yialdyn dhyt.

⁴ Nee shiu, er-y-fa shen, tra ta shiu er n’gholl harrish Jordan, soiaghey seose ny claghyn shoh, ta mee jiu er harey, ayns cronk Ebal, as ad y phlastrail harrish.

⁵ As ayns shen nee oo altar y hroggal gys y Chiarn dty Yee, altar cloaie: cha drog oo seose greïe erbee yiarn orroo.

⁶ Nee oo altar y Chiarn dty Yee y hroggal dy chlaghyn slane: as nee oo ourallyn-losht y hebbal eer gys y Chiarn dty Yee.

⁷ As nee oo ourallyn-shee y hebbal, as gee ayns shen, as boggey ’ghoaill kiongoyrt rish y Chiarn dty Yee.

⁸ As nee oo scrieu er ny claghyn ooilley goan y leigh shoh, dy feer chronnal.

⁹ As loayr Moses, as ny saggyrtyn ny Leviteyn rish ooilley Israel, gra, Gow tastey, as eaisht, O Israel; yn laa jiu t’ou er jeet dy ve pobble y Chiarn dty Yee.

¹⁰ Ver oo, er-y-fa shen, biallys da coraa’n Chiarn dty Yee, as nee oo cooilleeney ooilley e oardaghyn, as e lattyssyn, ta mee dy harey dhyt y laa jiu.

¹¹ As hug Moses currym da’n pobble yn laa cheddin, gra,

¹² Nee ad shoh shassoo, er cronk Gerizim, dy vannaghey yn pobble, tra ta shiu er jeet harrish Jordan; Simeon, as Levi, as Judah, as Issachar, as Joseph, as Benjamin.

¹³ As nee ad shoh shassoo er cronk Ebal, dy ockley mollaght: Reuben, Gad, as Asher, as Zebulun, Dan, as Naphtali.

¹⁴ As nee ny Leviteyn loayrt, as gra rish ooilley Israel, lesh ard choraa,

¹⁵ Cursit ta’n dooinney, ta jannoo jalloo erbee grainnit ny roit, ny red feohdoil da’n Chiarn, jeant liorish laueyn yn obbree, dy choyrt eh ayns ynnyd follit: as nee ooilley’n pobble gansoor, as gra, Amen.

¹⁶ Cursit t’eshyn, ta soiaghey beg jeh e ayr as e voir: as jir ooilley’n pobble, Amen.

¹⁷ Cursit t’eshyn, ta scughey cagliagh e naboo: as jir ooilley’n pobble, Amen.

¹⁸ Cursit t’eshyn, ta cur y doal er-shaghryn: as jir ooilley’n pobble, Amen.

¹⁹ Cursit t’eshyn, ta coyrt briwnys aggairagh ayns cooish y joarree, yn chloan gyn ayr, as y ven-treoghe, as jir ooilley’n pobble, Amen.

²⁰ Cursit t’eshyn, ta lhie marish ben e ayrey; son dy vel eh er roostey slheeayst e ayrey: as jir ooilley’n pobble, Amen.

²¹ Cursit t’eshyn, ta lhie marish keint erbee dy vaagh: as jir ooilley’n pobble, Amen.

²² Cursit t’eshyn, ta lhie marish e huyr, inneen e ayrey, ny inneen e vayrey: as jir ooilley’n pobble, Amen.

²³ Cursit t’eshyn, ta lhie marish e voir-’sy-leigh: as jir ooilley’n pobble, Amen.

²⁴ Cursit t’eshyn, ta bwoalley e naboo dy follit: as jir ooilley’n pobble, Amen.

²⁵ Cursit t’eshyn, ta goaill leagh, dy stroie yn dooinney gyn-loght: as jir ooilley’n pobble, Amen.

²⁶ Cursit t’eshyn, nagh vel shassoo gys ooilley goan y leigh shoh, dy chooilleeney ad: as jir ooilley’n pobble, Amen.