Deuteronomy 23 - Yn Vible Casherick 1775 1819

CAB. XXIII

¹ Cha bee eunuch, ny fer ta spoiyt, goit stiagh mastey pobble y Chiarn.

² Cha bee fer oainjyragh goit stiagh mastey pobble y Chiarn: eer gys e jeihoo heeloghe, cha bee eh goit stiagh mastey pobble y Chiarn.

³ Cha bee Ammonite ny Moabite goit stiagh gys pobble y Chiarn; eer gys y jeihoo heeloghe cha bee ad goit stiagh gys cairys pobble y Chiarn son dy bragh.

⁴ Son nagh daink ad nyn guail er y raad lesh arran as ushtey, tra haink shiu magh ass Egypt, as son dy ren ad failley dt’oï Balaam mac Beor jeh Pethor ayns Mesopotamia, dy ghwee mollaght ort.

⁵ Ny-yeih, cha jinnagh y Chiarn dty Yee geaishtagh rish Balaam: agh ren y Chiarn dty Yee chyndaa yn mollaght gys bannaght ort, son dy bynney lesh y Chiarn dty Yee oo.

⁶ Cha jean oo shirrey yn shee oc ny’n foays oc ’chur er y hoshiaght ooilley laghyn dty vea, son dy bragh.

⁷ Cha der oo dwoaie da Edomite, son dty vraar eh: cha der oo dwoaie da Egyptian, son dy r’ou hene dty yoarree ayns y cheer echey.

⁸ Bee’n chloan hig jeusyn, er nyn ghoaill stiagh gys chaglym-cooidjagh y Chiarn ayns nyn trass heeloghe.

⁹ Tra ta’n cheshaght-caggee goll magh noi dty noidyn, eisht freill oo hene veih dy chooilley ghrogh red.

¹⁰ My ta dooinney erbee ny mast’ eu nagh vel glen, kyndagh rish neu-ghlennid ta taghyrt er ’syn oie, eisht hed eh magh ass y champ, cha jig eh er cheu-sthie jeh’n champ.

¹¹ Agh tra te lesh yn astyr, nee eh niee eh hene lesh ushtey: as tra ta’n ghrian ny lhie, hig eh reesht stiagh ’sy champ.

¹² Bee boayl ayd myrgeddin cheu-mooie jeh’n champ, huggey hed oo magh.

¹³ As bee spaag ayd er dty lorg, as tra hed oo gys thalloo, nee oo cleiy lesh, as chyndaa dy choodaghey shen haink voïd.

¹⁴ Son ta’n Chiarn dty Yee gimmeeaght ayns mean dty champ, dy livrey oo, as dy chur dty noidyn fo-chosh royd: shen-y-fa vees dty champ casherick, nagh vaik eh red erbee neu-ghlen aynyd, as chyndaa ersooyl voïd.

¹⁵ Cha jean oo livrey seose da e vainshtyr yn sharvaant joarree, ta er chosney voish dewilys e vainshtyr hood’s.

¹⁶ Nee eh cummal mayrt, eer ny mast’ eu, ’syn ynnyd nee eh reih, ayns unnane erbee dy naillish jeh dty ard-valjyn: cha jean oo tranlaase er.

¹⁷ Cha bee streebagh jeh inneenyn Israel, ny Sodomite jeh mec Israel.

¹⁸ Cha der oo lhiat faill streebagh, ny price cretoor neu-ghlen stiagh ayns thie yn Chiarn dty Yee, son breearrey erbee: son t’ad ny-neesht eajee gys y Chiarn dty Yee.

¹⁹ Cha drog oo use jeh dty vraar, use argid, ny use beaghey, ny use ass nhee erbee ta eeasit magh.

²⁰ Da joarree foddee oo geeasagh er use, agh jeh dty vraar cha drog oo use, dy vod y Chiarn dty Yee oo y vannaghey ayns ooilley ny t’ou cur dty laue huggey, ayns y cheer raad t’ou goll dy chummal ayn.

²¹ Tra t’ou jannoo breearrey gys y Chiarn dty Yee, ny lhig shaghey dy eeck eh: son nee yn Chiarn dty Yee son shickyrys kiangley ort eh: as veagh eh ny peccah dhyt.

²² Agh mannagh jean oo breearrey, cha bee eh peccah dhyt.

²³ Shen ny t’er n’gholl magh ass dty veillyn nee oo freayll as cooilleeney, eer chebbal-arryltagh, rere myr t’ou er vreearrey gys y Chiarn dty Yee, as t’ou er n’yialdyn lesh dty veeal.

²⁴ Tra hed oo stiagh ayns garey-feeyney dty naboo, foddee oo gee cooid dty vian jeh ny smeyr-feeyney lurg dt’aigney hene, agh ayns dty haagh cha der oo veg.

²⁵ Tra hig oo ayns magher arroo dty naboo, foddee oo jeeassyn y phluckey lesh dty laue: agh cha der oo corran fo arroo dty naboo.