Deuteronomy 2 - Yn Vible Casherick 1775 1819

CAB. II

¹ Eisht hyndaa shin, as ghow shin nyn yurnah veih Kadesh gys yn aasagh, rish raad yn Aarkey Jiarg, myr doardee’n Chiarn dou: as duirree shin rish ymmodee laghyn mygeayrt cronk Seir.

² As loayr y Chiarn rhym, gra,

³ Ta shiu er gholl mysh y clieau shoh foddey dy liooar; chyndaa-jee my-hwoaie.

⁴ As cur uss sarey da’n pobble, gra, Ta shiu dy gholl trooid ardjyn nyn mraaraghyn cloan Esau, ta cummal ayns Seir, as bee ad ayns aggle reue: shen-y-fa bee-jee er nyn dwoaie.

⁵ Ny cur-jee eïe orroo; son cha der-yms diuish wheesh lheead trie jeh’n cheer oc, er-yn-oyr dy vel mee er choyrt cronk Seir da Esau son eiraght.

⁶ Nee shiu beaghey y ’chionnaghey vouesyn lesh argid, dy vod shiu gee; as nee shiu myrgeddin ushtey ’chionnaghey voue lesh argid, dy vod shiu giu.

⁷ Son ta’n Chiarn dty Yee er dty vannaghey, ayns ooilley obbraghyn dty laue: shione da dty immeeaght trooid yn aasagh mooar shoh: rish da-eed bleïn nish, ta’n Chiarn dty Yee er ve mayrt, cha r’ou feme nhee erbee.

⁸ As lurg dooin v’er gholl shaghey, veih nyn mraaraghyn cloan Esau, va cummal ayns Seir, trooid raad y choan, veih Elath, as veih Ezion-gaber, ghow shin raad faasagh Voab.

⁹ As dooyrt y Chiarn rhym’s, Faag-jee veue ny Moabiteyn, chamoo gow-jee dy chaggey roo: son cha der-yms diuish cummal ’sy cheer oc, er-yn-oyr dy vel mee er choyrt Ar da cloan Lot son eiraght.

¹⁰ Ren ny Emimee cummal ayn rish earishyn foddey, pobble mooar as ymmodee, thollee myr ny Anakimee;

¹¹ Va myrgeddin ennym foawir oc, myr ny Anakimee, agh ta ny Moabiteyn genmys ad Emimee.

¹² Va ny Horimee myrgeddin roish nish cummal ayns Seir, agh haink cloan Esau nyn ynnyd, erreish daue v’er stroie ad roue, as er chummal ’syn ynnyd oc, myr ren Israel ayns cheer e eiraght, hug y Chiarn daue.

¹³ Trog-jee nish erriu, dooyrt mee, as fow-jee harrish awin Zered: as hie shin harrish awin Zered.

¹⁴ As va’n traa neayr’s daag shin Kadesh-barnea, derrey va shin er roshtyn harrish yn awin Zered, hoght bleeaney jeig as feed: derrey va slane sheeloghe ny deiney-caggee er lheïe ersooyl veih mastey’n cheshaght, myr va’n Chiarn er vreearrey daue.

¹⁵ Son va dy jarroo laue’n Chiarn noi oc, dy stroie ad veih mastey’n cheshaght, derrey hie ad ooilley naardey.

¹⁶ Myr shoh haink eh gy-kione, tra va ooilley ny deiney-caggee er duittym, as marroo veih mastey’n pobble.

¹⁷ Dy loayr y Chiarn rhym’s, gra,

¹⁸ T’ou dy gholl trooid Ar, harrish ardjyn Voab, yn laa jiu.

¹⁹ As tra hayrnys oo er-gerrey da cloan Ammon, ny jean caggey roo, ny cur eïe orroo: son cha der-yms dhyt’s veg yn eiraght ayns thalloo cloan Ammon, er-yn-oyr dy vel mee er choyrt eh son eiraght da cloan Lot.

²⁰ (Va goo ec y cheer shen neesht son foawir, va foawir cummal ayn ’sy chenn earish, as ta ny Ammoniteyn genmys ad Zamzummim;

²¹ Pobble mooar as ymmodee, thollee myr ny Anakimee, agh ren y Chiarn ad y stroie rhymboo, as haink ad nyn yeï, as chum ad ’syn ynnyd oc:

²² Myr ren eh rish cloan Esau va cummal ayns Seir, tra stroie eh ny Horimee roue, as haink ad, as chum ad ’syn ynnyd oc, eer gys y laa jiu:

²³ As ny Avimee va cummal ayns Hazerim, eer gys Azzah, ren ny Caphtorim haink veih Caphtor stroie, as chum ad’syn ynnyd oc)

²⁴ Trog-jee erriu, gow-jee nyn yurnah, as immee-jee harrish yn awin Arnon: cur-my-ner, ta mee er livrey gys dty laue Sihon yn Amorite ree Heshbon, as e heer: immee er dty hoshiaght, as jean caggey rish.

²⁵ Yn laa jiu neem’s toshiaght dy choyrt yn atchim, as yn aggle jeed’s, er dy chooilley ashoon fo niau nee clashtyn goo jeed, as bee ad er-creau, as ayns angaish kyndagh rhyt.

²⁶ As hug mee chaghteryn veih faasagh Kedemoth, gys Sihon ree Heshbon, chebbal shee da, gra,

²⁷ Lhig dou goll er my hoshiaght trooid dty heer: goym y raad mooar, cha jyndaa-ym gys y laue yesh, ny gys y laue hoshtal.

²⁸ Nee oo beaghey y chreck rhym son argid, dy voddym gee: as ver oo ushtey dou son argid, dy voddym giu: cha jem ny hrooid, agh rish my chosh:

²⁹ (Myr ren cloan Esau ta cummal ayns Seir, as ny Moabiteyn ta cummal ayns Ar y yannoo rhym) derrey vee’m harrish Jordan, gys y cheer ta’n Chiarn nyn Yee dy choyrt dooin.

³⁰ Agh dob Sihon ree Heshbon raad dooin dy gholl er nyn doshiaght, son ren y Chiarn dty Yee e chree creoi, as roonagh nyn ’oï, er-chee dy livrey eh gys dty laue, myr te ry-akin jiu.

³¹ As dooyrt y Chiarn rhym’s, Cur-my-ner, ta mee er n’yannoo toshiaght er choyrt dhyt Sihon as e heer, fo dty laue: gow er dty hoshiaght dy ghoaill eh, dy vod y cheer echey ve ayd son eiraght.

³² Er shoh haink Sihon magh nyn ’oï, lesh ooilley e gheiney, dy chaggey ec Jahaz.

³³ As ren y Chiarn nyn Yee y livrey eh hooin, as stroie shin eh, as e vec, as ooilley e gheiney.

³⁴ As ghow shin ooilley e ard-valjyn ec y traa cheddin, as stroie shin dy bollagh ny deiney, as ny mraane, as cloan veggey dy chooilley ard-valley; cha daag shin veg er-mayrn:

³⁵ Agh yn ollagh ghow shin son spooilley dooin hene, as spooilley ny ard-valjyn ghow shin.

³⁶ Veih Aroer, ta rish oirr awin Arnon, as veih’n ard-valley ta rish yn awin, eer gys Gilead, cha row ard-valley hene ro lajer er nyn son: ren y Chiarn nyn Yee ooilley y livrey dooin.

³⁷ Agh noi cheer cloan Ammon cha daink oo, ny gys ynnyd erbee jeh’n awin Jabbok, ny gys ard-valjyn ny sleityn, ny gys ynnyd erbee dy ren y Chiarn nyn Yee nyn lhiettal.