Deuteronomy 16 - Yn Vible Casherick 1775 1819

CAB. XVI

¹ Cur tastey da’n vee Abib, as freill y chaisht gys y Chiarn dty Yee: son ayns y vee Abib hug y Chiarn dty Yee lesh uss magh ass Egypt er yn oie.

² Nee oo er-y-fa shen yn eayn-caisht y ouralley gys y Chiarn dty Yee, jeh’n chioltane as y chelloo, ’syn ynnyd nee’n Chiarn y reih dy chur e ennym ayn.

³ Cha jean oo gee arran soor lesh: rish shiaght laa nee oo gee arran gyn soorit lesh, eer yn arran dy heaghyn: (son haink oo magh ass cheer Egypt ayns siyr) dy vod oo cooinaghtyn er y laa haink oo magh ass thalloo Egypt, ooilley laghyn dty vea.

⁴ As cha bee arran soor ry-akin ayd ayns ooilley dty ardjyn rish shiaght laa, chamoo vees veg jeh’n eill, t’ou er hebbal er y chied laa syn astyr, er-mayrn fud-ny-hoie derrey’n voghrey.

⁵ Cha marr oo yn eayn-caisht er cheu-sthie jeh veg jeh dty yiattyn, ta’n Chiarn dty Yee dy choyrt dhyt.

⁶ Agh ’syn ynnyd nee’n Chiarn dty Yee y reih dy chur e ennym ayn, shen y raad nee oo yn eayn-caisht y varroo, ’syn astyr ec lhie ny greïney, mysh y traa haink oo magh ass Egypt.

⁷ As nee oo roastey, as gee eh ’syn ynnyd nee’n Chiarn dty Yee y reih: as nee oo chyndaa ’sy voghrey, as goll royd gys dty chabbaneyn.

⁸ Rish shey laa nee oo gee arran gyn soorit, as er y chiaghtoo laa vees chaglym casherick gys y Chiarn dty Yee: cha jean oo obbyr erbee er.

⁹ Shiaght shiaghtinyn nee oo coontey dhyt hene: gow toshiaght dy choontey ny shiaghtinyn veih’n traa t’ou goaill toshiaght dy choyrt y chorran fo’n arroo.

¹⁰ As nee oo freayll feailley ny shiaghtinyn gys y Chiarn dty Yee, lesh keesh dy oural-arryltagh dty laue, nee oo y choyrt da’n Chiarn dty Yee, rere myr ta’n Chiarn dty Yee dy dty vannaghey.

¹¹ As nee oo boggey ’ghoaill kiongoyrt rish y Chiarn dty Yee, uss, as dty vac, as dty inneen, as dty er-mooinjerey, ad dty inney-veyl, as y Levite t’er cheu-sthie jeh dty yiattyn, as y joarree, as y lhiannoo gyn ayr, as y ven-treoghe ta ny mast’ eu, ’syn ynnyd nee’n Chiarn dty Yee y reih dy choyrt e ennym ayn.

¹² As nee oo cooinaghtyn dy r’ou hene fo bondiaght ayns Egypt: as ver oo tastey dy chooilleeney ooilley ny slattyssyn shoh.

¹³ Nee oo freayll feailley ny cabbaneyn shiaght laa, erreish dhyt v’er haglym stiagh yn arroo as y feeyn ayd.

¹⁴ As nee oo boggey y ghoaill ayns dty laghyn feailley, uss as dty vac, as dty inneen, as dt’er-mooinjerey, as dt’inney-veyl, as y Levite, as y joarree, as y lhiannoo gyn ayr, as y ven-treoghe, t’er cheu-sthie jeh dty yiattyn.

¹⁵ Rish shiaght laa nee oo freayll feailley casherick gys y Chiarn dty Yee, ’syn ynnyd nee’n Chiarn y reih; er-yn-oyr dy jean y Chiarn dty Yee uss y vannaghey ayns ooilley dty vishaghey, as ayns ooilley obbraghyn dty laueyn, shen-y-fa nee oo dy jarroo goaill boggey.

¹⁶ Three keayrtyn ’sy vleïn hig ooilley ny fyrrynee ayd kionfenish y Chiarn dty Yee, ’syn ynnyd nee eh reih: er feailley yn arran-millish, er feailley ny shiaghtinyn, as er feailley ny cabbaneyn: as cha jig ad lhome-lauee fenish y Chiarn.

¹⁷ Ver dy chooilley ghooinney rere e fort, rere y bannaght ta’n Chiarn dty Yee er choyrt dhyt.

¹⁸ Briwnyn as fir-oik nee oo y phointeil dhyt hene ayns ooilley dty yiattyn, ta’n Chiarn dty Yee dy choyrt dhyt trooid magh dty hribeyn: as nee adsyn briwnys kiart y hirveish er y pobble.

¹⁹ Cha jean oo briwnys y chassey; cha jean oo soiaghey jeh persoonyn, chamoo nee oo gioot y ghoaill: son ta gioot dolley sooillyn y vooinjer creeney, as cassey cooishyn y sleih cairagh.

²⁰ Er eer chairys nee oo dy slane geiyrt, dy vod oo ve beayn, as geddyn eiraght ’sy cheer ta’n Chiarn dty Yee dy choyrt dhyt.

²¹ Cha jean oo soiaghey keyll dy viljyn erbee er-gerrey da altar yn Chiarn dty Yee, nee oo y yannoo dhyt hene.

²² Chamoo ver oo seose jalloo erbee, red ta feoh ec y Chiarn dty Yee er.