Deuteronomy 15 - Yn Vible Casherick 1775 1819

CAB. XV

¹ Ec kione dy chooilley shiaght bleeaney nee oo feaysley y yannoo.

² As shoh leigh yn feaysley: Dy chooilley ghooinney ta er eeasaght da e naboo, ver eh seose eh, cha jean eh troggal eh jeh e naboo, ny jeh e vraar, son dy nee bleïn feayslee yn Chiarn eh.

³ Jeh joarree foddee oo troggal eh; agh shen ny t’ou er n’eeasaght da dty vraar, ver dty laue seose eh:

⁴ Nagh bee ymmyrchee erbee ny mast’ eu: son nee’n Chiarn dy feoilt oo y vannaghey ’sy cheer ta’n Chiarn dty Yee dy choyrt dhyt son eiraght as cummal:

⁵ My vees oo agh imneagh dy eaishtagh rish coraa yn Chiarn dty Yee, dy ve tastagh dy reayll ooilley ny oardaghyn shoh ta mee dy harey dhyt jiu.

⁶ Son nee yn Chiarn dty Yee oo y vannaghey, myr yiall eh dhyt, as ver oo magh er eeasaght da ymmodee ashoonyn, agh cha jean oo goaill er eeasaght; as nee oo reill harrish ymmodee ashoonyn, agh cha jean ad reill harryd’s.

⁷ My vees dooinney boght erbee jeh dty vraaraghyn ny mast’ eu, er cheu-sthie jeh veg jeh dty yiattyn, ayns y cheer ta’n Chiarn dty Yee dy choyrt dhyt, cha jean oo dty chree y chreoghey, ny dty laue y yeigh noi dty vraar boght:

⁸ Agh nee oo fosley dty laue huggey dy lhean, as nee oo, son shickyrys, geeasaght da wheesh as nee magh y ymmyrch.

⁹ Jeeagh nagh bee drogh smooinaght ayns dty chree, gra, Ta’n chiaghtoo vleïn, bleïn yn eaysley er-gerrey: as dy bee dty hooill neu-erreeishagh noi dty vraar boght, as nagh der oo veg da, as dy jean eh geam gys y Chiarn dt’oï, as dy bee shoh son peccah dhyt:

¹⁰ Ver oo dy jarroo firrinagh da, cha jean dty chree mooaraghey, tra t’ou coyrt da: er-yn-oyr dy jean y Chiarn son y red shoh oo y vannaghey ayns ooilley dty obbraghyn, as ayns ooilley ny t’ou coyrt dty laue huggey.

¹¹ Son cha bee yn cheer dy bragh gyn voghtyn: shen-y-fa ta mee cur currym ort, gra, Nee oo fosley dty laue dy feoilt da dty vraar boght, as ymmyrchagh, ayns dty heer.

¹² As my vees dooinney Hebrewnagh, ny ben Hebrewnagh, jeh dty vraaraghyn, er ny chreck rhyt, as er hirveish oo shey bleeaney; ver oo eisht ayns y chiaghtoo vleïn e reamys da.

¹³ As tra t’ou coyrt e reamys da; cha der oo eh ersooyl follym:

¹⁴ Nee oo magh eh dy feoilt ass dty hioltane, as veih dty hoalt, as veih dty ghoagh-feeyney; jeh shen, lesh ta’n Chiarn er dty vannaghey, ver oo dasyn.

¹⁵ As nee oo cooinaghtyn dy r’ou hene ayns bondiaght ayns cheer Egypt, as dy ren y Chiarn dty Yee dty livrey: shen-y-fa ta mee coyrt yn red shoh er dty churrym jiu.

¹⁶ As my jir eh rhyt, Cha jem roym voïd (son dy nhynney lesh uss as dty hie, son dy vel eh farrail dy mie mayrt.)

¹⁷ Nee oo eisht mennee y ghoaill, as ver oo trooid e chleaysh eh gys y dorrys, as bee eh dty harvaant son dy bragh: as nee oo er yn aght cheddin rish dty inney-veyl.

¹⁸ Cha smooinee oo shoh dy ve creoi ort, tra t’ou cur e reamys da, son v’eh ny share dhyt’s na daa harvaant failt, ayns shirveish oo shey bleeaney: as nee’n Chiarn dty Yee dty vannaghey ayns ooilley ny t’ou dy yannoo.

¹⁹ As y chied ingan fyrryn ta cheet jeh dty helloo, as jeh dty hioltane, nee oo y chasherickey gys y Chiarn dty Yee: cha jean obbyr erbee lesh dty ghow jeh’n chied ingan, chamoo nee oo lommyrt yn chied eayn jeh dty chirree.

²⁰ Nee oo gee eh kiongoyrt rish y Chiarn dty Yee bleïn lurg bleïn, ayns yn ynnyd nee’n Chiarn y reih, uss as lught dty hie.

²¹ As my vees lheamys erbee er, ta shen, my te croobagh, ny doal, ny my ta doghan erbee ayn, cha jeb oo eh ayns oural gys y Chiarn dty Yee,

²² Nee oo baarail eh er cheu-sthie jeh dty yiattyn: nee’n persoon glen as neu-ghlen gee jeh co-laik, myr jeh’n feeaih mooar fyrryn, ny bwoirryn.

²³ Agh cha n’ee oo yn uill echey: nee oo eh y gheayrtey er y thalloo myr ushtey.