Deuteronomy 14 - Yn Vible Casherick 1775 1819

CAB. XIV

¹ Shiuish cloan y Chiarn nyn Yee: cha jean shiu giarey shiu hene, ny meaylid erbee y yannoo erskyn nyn sooillyn son ny merriu.

² Son pobble casherick oo gys y Chiarn dty Yee, as ta’n Chiarn er ghoaill oo son pobble reiht da hene, erskyn dy chooilley ashoon t’er y thalloo.

³ Cha jean oo gee red neu-ghlen erbee.

⁴ Shoh ny beiyn nee shiu gee: yn dow, yn keyrrey, as y goayr,

⁵ Yn feeaih jeh dagh cheint, yn goayr feïe, as y pygarg, yn dow feïe, as y chamois,

⁶ As dy chooilley vaagh ta rheynn yn yngyn, as skeilt-chassagh, as caigney-cheeilley mastey beiyn: shen nee shiu gee.

⁷ Ny-yeih, ad shoh cha jean shiu gee, jeusyn ta caigney-cheeilley, ny jeusyn ta rheynn yn yngyn skeilt; lheid as y camel, as y mwaagh, as y conning, ga t’ad caigney-cheeilley, agh cha vel ad rheynn yn yngyn: shen-y-fa t’ad neu-ghlen diu.

⁸ As y vuc, ga dy vel eh rheynn yn yngyn, ny-yeih cha vel eh caigney-cheeilley: te neu-ghlen diuish: jeh’n eill oc cha jean shiu gee, as rish y chorp marroo oc cha jean shiu bentyn.

⁹ Ad shoh nee shiu gee jeh ooilley ny t’ayns ny ushtaghyn: dy chooilley eeast skianagh as scaailagh nee shiu gee:

¹⁰ As cre-erbee nagh vel skianagh as scaailagh, cha jean shiu gee; te neu-ghlen diu.

¹¹ Jeh ooilley ny eeanlee glen nee shiu gee.

¹² Agh shoh adsyn nagh jean shiu gee: yn urley, as yn ossifrage, as yn ospray,

¹³ As yn shawk, as y shyrragh, as y vulture lurg e cheint,

¹⁴ As dy chooilley feeagh lurg e cheint.

¹⁵ As yn hullad, as y shawk-oie, as y chooag, as dagh shawk lurg e cheint,

¹⁶ Yn hullad beg, as yn hullad mooar, as yn ollay,

¹⁷ As y pelican, as yn eagle sloo, as y feeagh marrey,

¹⁸ As y stork, as y coar-ny-hastan lurg e cheint, as yn earkan, as y chraitnag.

¹⁹ As dy chooilley red snauee ta getlagh, te neu-ghlen diu: cha bee ad er nyn ee.

²⁰ Agh jeh dy chooilley eean glen foddee shiu gee.

²¹ Cha jean shiu gee red erbee ta geddyn baase jeh hene: shen ver shiu da’n joarree t’er cheu-sthie jeh dty yiattyn, dy yannoo ymmyd jeh, ny foddee oo creck eh rish joarree: son t’ou uss dty phobble casherick da’n Chiarn dty Yee. Cha jean oo broie yn mannan ayns bainney e vayrey.

²² Ver oo jaghee firrinagh jeh ooilley bishaghey dty rass, ta’n magher gymmyrkey magh dy chooilley vleïn.

²³ As nee oo gee kiongoyrt rish y Chiarn dty Yee, ’syn ynnyd nee eh reih dy chur e ennym ayn, yn jaghee jeh dty arroo, jeh dty feeyn, as jeh dty ooil, as y chied ingan jeh dty hellooyn, as dty hioltaneyn: dy vod oo gynsaghey dy ghoaill aggle dy kinjagh roish y Chiarn dty Yee.

²⁴ As my s’liauyr lhiat y raad, as yn errey ro hrome dhyt, ny my vees yn ynnyd, nee’n Chiarn dty Yee ’reih dy chur e ennym ayn, roud voïd, tra ta’n Chiarn er dty vannaghey:

²⁵ Nee oo eisht argid jeh, as nee oo kiangley seose yn argid ayns dty laue, as hed oo gys yn ynnyd nee yn Chiarn dty Yee ’reih.

²⁶ As nee oo baarail yn argid er cre-erbee dy nailt, er dew, ny er kirree, ny er feeyn, ny er jough lajer, ny cre-erbee ta aigney ayd er: as ayns shen nee oo gee eh kiongoyrt rish y Chiarn dty Yee, as nee oo boggey ’ghoaill, oo hene as lught dty hie.

²⁷ As y Levite t’er cheu-sthie jeh dty yiattyn, cha jean oo treigeil eh: son nagh vel ayrn ny eiraght echey mayrt.

²⁸ As ec kione three bleeaney nee oo soiaghey magh slane jaghee dty hroar bleeaney, as shen y choyrt dy lhiattee cheu-sthie jeh dty yiattyn.

²⁹ As hig y Levite (son nagh vel ayrn ny eiraght echey mayrt) as y joarree, as y lhiannoo gyn ayr, as y ven-treoghe, t’er cheu-sthie jeh dty yiattyn, as nee ad gee, as bee ad jeant magh: dy vod yn Chiarn dty Yee oo y vannaghey ayns dy chooilley obbyr t’ou cur dty laue huggey.