Daniel 8 - Yn Vible Casherick 1775 1819

CAB. VIII

¹ Ayns y trass vleïn jeh reill ree Belshazzar, haink ashlish orrym, eer orrym’s Daniel, lurg shen haink orrym ec y toshiaght.

² As honnick mee ayns ashlish (as haink eh gy-kione, myr honnick mee, dy row mee ec Shushan ayns y phlaase, ta ayns cheer Elam) as er-lhiam pene ’syn ashlish, dy row mee liorish awin Ulai.

³ Eisht hrog mee seose my hooillyn as yeeagh mee, as cur-my-ner, va nyn shassoo liorish yn awin, rea as daa eairk er, as va’n daa eairk ard: agh va’n derrey yeh ny syrjey na’n jeh elley, as yn eairk b’yrjey s’jerree haink seose.

⁴ Honnick mee yn rea puttey lesh y sheear, as lesh y twoaie, as lesh y jiass; myr shen nagh by-loys da beisht erbee shassoo roish; chamoo va fer ayn oddagh livrey veih e laue, agh ren eh lurg e aigney hene, as daase eh pooaral.

⁵ As myr va mee smooinaghtyn, cur-my-ner, haink goayr-yrryn veih’n neear, er feaï-ny-cruinney, as s’coan venn eh rish y thalloo: as va eairk chronnal ec y ghoayr, eddyr e hooillyn.

⁶ As haink eh gys y rea lesh y daa eairk, honnick mee ny hassoo er broogh ny hawin, as roie eh er ayns eulys e phooar.

⁷ As honnick mee eh tayrn chion er y rea, as v’eh er ny vrasnaghey lesh sproght n’oï, as woaill eh yn rea, as vrish eh e ghaa eairk, as cha row fort ayns y rea dy hassoo roish, agh lhieg eh er y thalloo eh, as stamp eh er, as cha row fer oddagh yn rea y livrey ass e laue.

⁸ Shen-y-fa haink y ghoayr-yrryn dy ve feer niartal, as tra v’eh lajer, va’n eairk vooar er ny vrishey, as ’syn ynnyd haink seose kiare eairkyn cronnal, lesh ny kiare geayghyn yn aer.

⁹ As magh ass unnane jeu, haink eairk veg, daase feer vooar, lesh y jiass, as lesh y shiar, as lesh y cheer eunyssagh.

¹⁰ As daase eh mooar, eer corrym rish sheshaght-caggee niau, as cheau eh sheese paart jeh’n cheshaght-chaggee, as jeh ny rollageyn gys y thalloo, as stamp eh orroo.

¹¹ Dy jarroo ren eh soiaghey seose eh-hene dy ve eer corrym rish prince y cheshaght-chaggee, as liorishyn va’n oural-laaoil er ny ghoaill ersooyl, as ynnyd e hiamble casherick er ny lhieggal.

¹² As va pooar-caggee er ny choyrt da noi yn oural-laaoil, kyndagh rish drogh-yannoo, as cheau eh sheese yn ynrickys gys y thalloo, as hie eh er e hoshiaght, as haink eh lesh.

¹³ Eisht cheayll mee noo loayrt, as dooyrt noo dy row rish yn noo shen ren loayrt: Caïd nee yn ashlish farraghtyn, yn oural-laaoil ve goit ersooyl, as loght yn traartys tannaghtyn, as yn ynnyd casherick, as e heshaght dy ve stampit fo-chosh?

¹⁴ As dooyrt eh rhym, Derrey daa housane as three cheead laa; eisht bee yn ynnyd casherick er ny ghlenney.

¹⁵ As haink eh gy-kione, tra va mish, eer mish Daniel er vakin yn ashlish, as er hirrey bun er, eisht cur-my-ner, hass kiongoyrt rhym myr co-chaslys dooinney.

¹⁶ As cheayll mee coraa dooinney eddyr brooinyn Ulai, gyllagh, as gra, Ghabriel, cur er y dooinney shoh dy hoiggal yn ashlish.

¹⁷ Eisht haink eh er-gerrey da’n boayl raad va mee my hassoo: as tra haink eh, va mee fo atchim, as huitt mee er my eddin: agh dooyrt eh rhym, Gow toiggal, uss vac y dooinney: son ayns traa cooie bee jerrey er yn ashlish.

¹⁸ Nish myr v’eh loayrt rhym, va mee ayns cadley trome, lesh my eddin gys y thalloo: agh venn eh rhym, as hrog eh mee er my chassyn.

¹⁹ As dooyrt eh, Cur-my-ner, soilshee-ym dhyt, cre hig gy-kione ec jerrey yn jymmoose: son ec y traa pointit vees y jerrey er.

²⁰ Yn rea, honnick oo lesh daa eairk, t’ad reeaghyn Vedia as Phersia.

²¹ As ta’n goayr geyshteenagh ree Ghrecia, as yn eairk vooar, ta eddyr e hooillyn, ta’n chied ree.

²² Nish lurg da shen ve brisht; as dy daink seose ny ynnyd kiare elley, nee kiare reeriaghtyn troggal seose ass yn ashoon shen, agh cha nee ayns y phooar echeysyn.

²³ As ayns traa jerrinagh yn reeriaght oc, tra vees slane towse ny drogh-yantee jeant magh, nee ree dy eddin elgyssagh, as toiggal folliaghtyn, shassoo seose.

²⁴ As bee yn pooar echey niartal, agh cha nee liorish e phooar hene; as nee eh stroie ayns aght yindyssagh, as hed eh er e hoshiaght, as hig eh lesh, as ver eh naardey yn vooinjer niartal, as y pobble casherick.

²⁵ As trooid e chialgeyrys, ver eh er croutyn bishaghey ny laue: as nee eh lane y hoiaghey jeh hene ayns [mooaralys] e chree, as ec e chah nee eh ymmodee y stroie: nee eh shassoo seose myrgeddin noi yn prince dy phrinceyn, agh bee eh er ny vrishey fegooish laue.

²⁶ As ta ashlish yn astyr as y voghrey, va inshit, firrinagh: shen-y-fa jeigh seose yn ashlish, son bee eh gys ymmodee laghyn.

²⁷ As huitt mish Daniel my-neealloo, as va mee ching son earish: lurg shen hrog mee orrym, as hie mee mysh cooishyn y ree, as va mee ayns yindys dowin ec yn ashlish, agh va shoh gyn-yss da fer erbee.