Daniel 4 - Yn Vible Casherick 1775 1819

CAB. IV

¹ Nebuchadnezzar y ree gys dy chooilley phobble, ashoon as glare er feaï-ny-cruinney, Shee dy row er ny vishaghey erriu.

² By-haittin lhiam dy hoilshaghey ny cowraghyn as yindyssyn, ta’n Jee ard er n’obbraghey orrym.

³ S’mooar ta e chowraghyn! as s’niartal ta e yindyssyn! ta’n reeriaght echeysyn reeriaght dy bragh farraghtyn, as e reiltys veih sheeloghe gys sheeloghe.

⁴ Va mish Nebuchadnezzar ec fea ayns my hie, as raahoil ayns my phlaase.

⁵ Honnick mee ashlish, daggle mee, as ren ny smooinaghtyn er my lhiabbee, as ashlishyn my chione m’y voirey.

⁶ Shen-y-fa doardee mee ooilley deiney-creeney Vabylon dy heet kiongoyrt rhym, dy hoilshaghey dou bree yn dreamal.

⁷ Eisht haink ny deiney-creeney, ny rollageydee, ny Caldeanee, as ny fir-faishnee, as dinsh mee daue yn dreamal, agh cha dug ad bun erbee er.

⁸ Agh fy-yerrey haink Daniel stiagh kiongoyrt rhym (va’n ennym echey Belteshazzar, cordail rish ennym my yee, as ayn ta spyrryd ny flaunyssee noo) as dasyn dinsh mee yn dreamal, gra,

⁹ O Velteshazzar, ard-vainshtyr ny deiney-creeney, er-yn-oyr dy vel fys aym, dy vel spyrryd ny flaunyssee noo aynyd’s, as nagh vel folliaght erbee erskyn dty roshtyn, insh dou ashlishyn my ghreamal, ta mee er n’akin, as cre t’er ny hoiggal liorish.

¹⁰ Shoh myr va ashlishyn mychione, er my lhiabbee: Honnick mee, as cur-my-ner, billey ayns mean yn ooir, as s’mooar va’n yrjid echey.

¹¹ Daase y billey, as ve lajer, as va’n yrjid echey roshtyn gys niau, as y chilley echey gys ardjyn sodjey magh y thallooin.

¹² Va ny duillagyn echey aalin, as e vess ymmodee, as ayn va beaghey son ooilley, va maase y vagheragh goaill fastee fo, as va eeanlee yn aer cummal ayns e vanglaneyn, as va dy chooilley eill er ny veaghey jeh.

¹³ Honnick mee ayns ashlishyn my chione er my lhiabbee, as cur-my-ner, haink arreyder, as fer flaunyssagh neose veih niau.

¹⁴ Dyllee eh dy ard, as shoh myr dooyrt eh, Lhieg y billey, as giare jeh e vanganyn, crie sheese e ghuillagyn, as skah e vess; lhig da’n maase cosney ersooyl veih fo yn scadoo echey, as ny eeanlee veih e vanglaneyn.

¹⁵ Ny-yeih faag bun ny fraueyn echey ayns y thalloo, eer lesh boandey yiarn as prash, ayns faiyr meiygh y vagheragh, as lhig da ve fluigh lesh druight yn aer, as lhig da’n cronney echey ve marish ny beïyn er faiyr y vagheragh.

¹⁶ Lhig da’n cree echey ve ceaghlit veih cree dooinney, as lhig da cree baagh ve currit da, as lhig da shiaght traaghyn goll harrish.

¹⁷ Ta’n chooish shoh liorish oardaghey ny arreyderyn, as y yeearree liorish goo ny flaunyssee, dy vod ny bioee toiggal, dy vel y Jee smoo syrjey reill ayns reeriaght deiney, as dy choyrt eh dauesyn saillish hene, as soiaghey harrish ny moodjeenyn s’inshley dy gheiney.

¹⁸ Yn dreamal shoh ta mish ree Nebuchadnezzar er vakin: nish uss, O Velteshazzar, soilshee yn bun echey, son wheesh as nagh vel ooilley deiney-creeney my reeriaght son soilshaghey bun y chooish: agh t’ou uss er y hon, son ta spyrryd ny flaunyssee noo aynyd’s.

¹⁹ Eisht hie e happey voish Daniel (va enmyssit Belteshazzar) son slane oor, as ren e smooinaghtyn eh y heaghney: dreggyr y ree, as dooyrt eh, Velteshazzar, ny lhig da’n dreamal, ny’n monney echey dty heaghney. Dreggyr Belteshazzar, as dooyrt eh, My hiarn, dy row yn dreamal ny chour ocsyn ta dwoaiagh ort, as dy ve cooilleenit er dty noidyn.

²⁰ Yn billey shen honnick oo, va gaase as lajer, yn yrjid echey va roshtyn gys ny niaughyn, as y chilley echey gys ooilley yn seihll;

²¹ E ghuillagyn va aalin, as e vess ymmodee, as ayn va beaghey son ooilley; fo va oayll ec maase y vagheragh, as va eeanlee yn aer goaill ayns e vanglaneyn:

²² She uss eh, O ree, ta er n’aase, as er jeet dy ve niartal; son ta dty ooashley er vishaghey, as er roshtyn gys niau, as dty reiltys gys ardjyn sodjey magh y thallooin.

²³ As son wheesh as dy vaik y ree arreyder, as fer flaunyssagh cheet neose veih niau, as gra, Lhieg sheese y billey, as stroie eh, ny-yeih faag bun ny fraueyn echey ayns y thalloo, eer lesh boandey yiarn as prash ayns faiyr meiygh yn vagheragh, as lhig da ve fluigh lesh druight yn aer, as lhig da’n cronney echey ve marish beïyn y vagheragh, derrey hed shiaght traaghyn harrish;

²⁴ Shoh bun yn ashlish, O ree, as shoh oardagh yn Jee smoo syrjey, ta er jeet er my hiarn y ree:

²⁵ Dy bee oo er dty imman veih deiney, as bee dty ynnyd-vaghee marish maase y vagheragh, as nee oo gee faiyr myr ny dew, as bee oo fluigh lesh druight yn aer, as hed shiaght traaghyn harryd, derrey vees toiggal ayd, dy vel y Jee smoo syrjey reill ayns reeriaght deiney, as coyrt eh da quoi-erbee saillish hene.

²⁶ As son wheesh as dy doardee ad, dy aagail bun fraueyn y villey; bee dty reeriaght shickyr dhyt, lurg fys ’ve ayd dy vel ny niaughyn reill.

²⁷ Shen-y-fa, O ree, gow dy arryltagh my choyrle’s, as brish jeh dty pheccaghyn liorish ynrickys, as dty vee-chairys liorish soilshaghey myghin da’n voght, hoiggal, myr shen dy bee dty vaynrys ny-sodjey beayn.

²⁸ Haink ooilley shoh er y ree Nebuchadnezzar.

²⁹ Kione ny bleeaney v’eh shooyl ayns thie reeoil reeriaght Vabylon.

³⁰ Loayr y ree, as dooyrt eh, Nagh nee shoh Babylon mooar, ta mee er hroggal son thie yn reeriaght, liorish niart my phooar, as son onnor my ooashley?

³¹ Choud as va’n goo foast ayns beeal y ree, haink coraa veih niau, gra, Ort’s, O ree Nebuchadnezzar, te sarit, Ta’n reeriaght er n’immeeaght voïd’s.

³² As eiyree ad magh oo veih deiney, as bee dty chummal marish maase y vagheragh: nee oo gee faiyr myr ny dew, as hig shiaght traaghyn ort, derrey vees toiggal ayd, dy vel y Jee smoo syrjey reill ayns reeriaght deiney, as coyrt eh da quoi-erbee saillish hene.

³³ Yn oor cheddin va’n chooish er ny chooilleeney er Nebuchadnezzar as v’eh eiyrit magh veih deiney, as d’ee eh faiyr myr ny dew, as va’n corp echey fluigh lesh druight yn aer, derrey va’n folt echey er n’aase myr fedjagyn urley, as ny yngnyn echey myr yngnyn eeanlee.

³⁴ As ec kione ny laghyn shen, hrog mish Nebuchadnezzar my hooillyn gys niau, as haink my hushtey hym reesht, as vannee mee yn er smoo syrjey, as hug mee moylley as ooashley dasyn ta dy bragh beayn, e reiltys ta reiltys dy bragh farraghtyn, as e reeriaght ta veih sheeloghe gys sheeloghe.

³⁵ As cha vel ooilley cummaltee ny hooirey agh jeh beggan foaynoo; as t’eh jannoo cordail rish e aigney ayns ny sheshaghtyn flaunyssagh, as fud cummaltee ny hooirey; as cha vod fer erbee y laue echeysyn y lhiettal, ny gra rishyn, Cre t’ou dy yannoo?

³⁶ Ec y traa cheddin, haink my resoon hym reesht, as son gloyr my reeriaght, haink my ooashley as sollyssid hym, as ren my ir-choyrlee as my hiarnyn shirrey my yeï; as va mee er my niartaghey ayns my reeriaght, as va ard-ooashley reeoil sodjey er ny choyrt dou.

³⁷ Nish ta mish Nebuchadnezzar cur moylley, as ard-voylley, as ooashley da ree ny flaunys, ta ooilley e obbraghyn firrinys, as e raaidyn briwnys, as adsyn ta gimmeeaght ayns moyrn t’eshyn niartal dy injillaghey.