Daniel 1 - Yn Vible Casherick 1775 1819

CAB. I

¹ Ayns y trass vleïn jeh reill Yehoiakim ree Yudah, haink Nebuchadnezzar ree Vabylon gys Jerusalem, dy chaggey n’oï.

² As hug y Chiarn Jehoiakim ree Yudah fo’n laue echey, marish paart jeh siyn casherick thie Yee ad shoh hug eh lesh gys cheer Shinar, gys thie e Yee, as hug eh ny siyn ayns thie-tashtee e Yee.

³ As loayr y ree rish Ashpenaz yn ard-eunuch, dy ghoaill huggey shiartanse dy chloan Israel, jeh’n sluight reeoil, as jeh ny princeyn;

⁴ Cloan, nagh row assee erbee orroo, agh aalin as arryltagh gys creenaght, as aggindagh gys tushtey, as dy ghoaill ynsaghey, ny lheid’s va feeu dy hassoo ayns plaase y ree, as daue dy choyrt ynsaghey as glare ny Caldeanee.

⁵ As doardee yn ree daue beaghey gagh-laa jeh boayrd y ree, as jeh’n feeyn v’eh hene dy iu: myr shen dy reir ad three bleeaney, as shen harrish, v’ad dy hassoo kiongoyrt rish y ree.

⁶ Nish ny mast’ oc shoh va, jeh cloan Yudah, Daniel, Hananiah, Mishael as Azariah:

⁷ Dauesyn hug yn ard-eunuch enmyn: son hug eh er Daniel yn ennym Belteshazzar, as er Hananiah, Shadrach, as er Mishael, Meshach, as er Azariah, Abed-nego.

⁸ Agh va Daniel kiarit ayns e chree, nagh jinnagh eh neu-ghlen jeh hene, lesh lhongey veih boayrd y ree, ny lesh y feeyn diu eh: shen-y-fa, ghuee eh er yn ard-eunuch, nagh beagh eh êginit dy leodaghey eh-hene.

⁹ Nish hug Jee er Daniel dy ve ayns foayr as slane aigney-mie rish yn ard-eunuch.

¹⁰ As dooyrt yn ard-eunuch rish Daniel, Ta mee ayns aggle roish my hiarn y ree, ta er phointeil diu nyn mee as nyn yough: son my hee-ys eh yn eddin euish, as neeal smessey orroo na er nyn goasanyn: eisht ver shiu mee ayns gaue my ching roish y ree.

¹¹ Eisht dooyrt Daniel rish Melzar, fo’n churrym echeysyn va’n ard-eunuch er choyrt Daniel, Hananiah, Mishael, as Azariah,

¹² Prow dty harvaantyn, guee-ym ort, jeih laa, as lhig dooin beaghey er messyn y thallooin, as giu ushtey.

¹³ Eisht gow uss baght jeh ny eddinyn ain, as eddin ny scollagyn ta gee cooid-ronney veih boayrd y ree; as myr t’ou fakin, dell rish dty harvaantyn.

¹⁴ Myr shen lhig eh lhieu ’sy chooish shoh, as phrow eh ad jeih laa.

¹⁵ As ec kione ny jeih laa va ny eddinyn oc jeeaghyn ny s’aalin as ny s’ruishagh ayns feill na ooilley ny scollagyn, va gee jeh’n chooid-ronney reeoil.

¹⁶ Er shoh ghow Melzar ersooyl yn cronney shen dy vee, as y feeyn va kiarit daue; as hug eh daue mess hallooinagh.

¹⁷ Agh er son ny kiare scollagyn shoh, hug Jee daue tushtey as schleï ayns dy chooilley ynsaghey as creenaght: as va fysseree ec Daniel ayns dy chooilley cheint dy ashlishyn as dreamallyn.

¹⁸ Nish ec kione ny laghyn shen va’n ree er ghoardrail dy chur lesh stiagh ad, eisht hug yn ard-eunuch lesh stiagh ad fenish Nebuchadnezzar.

¹⁹ As ren y ree taggloo roo, as nyn mast’ oc ooilley cha row fer ry-gheddyn casley rish Daniel, Hananiah, Mishael as Azariah: shen-y-fa hass ad kiongoyrt rish y ree.

²⁰ As ayns dy chooilley chooish dy chreenaght as toiggal, va’n ree briaght jeu, hooar eh ad jeih keayrtyn share na ooilley ny deiney-creeney as rollageydee v’ayns ooilley e reeriaght.

²¹ As shoh myr va Daniel, eer derrey’n chied vleïn jeh ree Cyrus.