Briwnyn 8 - Yn Vible Casherick 1775 1819

CAB. VIII

¹ As dooyrt deiney Ephraim rish, Kys dy vel oo er hirveish shin myr shoh, nagh deïe oo orrin tra hie oo dy chaggey rish ny Midianiteyn? As v’ad feer chorree rish.

² As dooyrt eh roo, Cre ta mish nish er n’yannoo ayns soylaghey jiuish? Nagh vel jeelym fouyr-feeyney Ephraim ny share na slane fouyr-feeyney Abiezer?

³ Ta Jee er livrey gys nyn laueyn princeyn Vidian, Oreb as Zeeb: as cre va mish abyl dy yannoo ayns soylaghey jiuish? Eisht va’n chorree oc er ny veiyghey, tra dooyrt eh shoh.

⁴ As haink Gideon gys Jordan, as hie eh harrish, eh-hene, as y three cheead dooinney va mârish, faiynt, ny-yeih geiyrt orroo.

⁵ As dooyrt eh rish deiney Succoth, Cur-jee, ta mee guee erriu, bwilleenyn arran da’n pobble ta geiyrt orrym; son t’ad gannooinaghey, as ta mee geiyrt er Zeba as Zalmunnah, reeaghyn Vidian.

⁶ As dooyrt princeyn Succoth, Vel laueyn Zebah as Zalmunnah nish fo dty laue’s, dy jinnagh shinyn arran da’n armee ayd’s?

⁷ As dooyrt Gideon, Shen-y-fa, tra nee yn Chiarn livrey Zebah as Zalmunna gys my laue’s, eisht neem’s raipey yn eill euish lesh drineyn yn aasagh as lesh dressyn.

⁸ As hie eh seose veih shen gys Penuel, as loayr eh roosyn myrgeddin: as dansoor deiney Penuel eh myr ren deiney Succoth.

⁹ As loayr eh myrgeddin rish deiney Penuel, gra, Tra hig-yms reesht ayns shee, lhieg-yms sheese y toor shoh.

¹⁰ Nish va Zebah as Zalmunna ayns Karkor, as nyn sheshaght-caggee mâroo, mysh queig thousane jeig, wheesh as va er-mayrn jeh ooilley ny sheshaghtyn-caggee cloan y shiar: son huitt shey-feed thousane dooinney va tayrn y chliwe.

¹¹ As ghow Gideon e raad gys y cheer ocsyn va cummal ayns cabbaneyn, my-hiar jeh Nobah as Jogbehah, as woaill eh yn cheshaght-chaggee; va jeeaghyn orroo hene dy ve ass roshtyn dangere.

¹² As myr va Zebah as Zalmunna roie er-chea, deiyr eh orroo, as ghow eh yn daa ree Vidian, Zebah as Zalmunna, as skeayl eh ooilley’n cheshaght-chaggee.

¹³ As ren Gideon mac Yoash chyndaa veih’n chaggey roish irree ny greïney.

¹⁴ As haare eh dooinney aeg jeh cummaltee Succoth dy vriaght jeh: as hug eh shoh coontey da jeh princeyn Succoth, as y chanstyr, eer three-feed as shiaght-jeig.

¹⁵ As haink eh gys deiney Succoth, as dooyrt eh, Cur-my-ner Zebah as Zalmunna, my-nyn-gione ren shiu boggyssagh harrym, gra, Vel laueyn Zebah as Zalmunna nish fo dty laue’s, dy jinnagh shinyn arran da dty gheiney ta skee as tooillit?

¹⁶ As ghow eh shanstyryn yn ard-valley, as drineyn yn aasagh as dressyn, as lhieu shoh ren eh kerraghey dy dewil deiney Succoth.

¹⁷ As vrish eh sheese toor Penuel, as varr eh deiney’n ard-valley.

¹⁸ Eisht dooyrt eh rish Zebah as Zalmunna, Cre’n mec deiney v’ad shen ren shiu y varroo ee Tabor? As dreggyr ad, Myr t’ou uss, shen myr v’adsyn; va dagh fer jeu, dy yeeaghyn orroo, goll-rish cloan ree.

¹⁹ As dooyrt eh, My vraaraghyn v’ad, eer mec my vayrey: myr ta’n Chiarn bio, dy beagh shiu er hauail yn vioys ocsyn, cha jinnin’s y vioys euish y ghoaill.

²⁰ As dooyrt eh rish Jether e vac shinney, Seose oo, as cur dy baase ad: agh cha hayrn y scollag e chliwe: son va aggle er, er-yn-oyr dy row eh foast agh aeg.

²¹ Eisht dooyrt Zebah as Zalmunna, Trog hene ort, as tuitt orrin: son myr ta’n dooinney, myrgeddin ta e niart. As dirree Gideon, as varr eh Zebah as Zalmunna, as ghow eh ny colliaryn aalin va mysh mwannallyn ny camelyn oc.

²² Eisht dooyrt deiney Israel rish Gideon, Reill uss harrin, chammah oo-hene as dty vac, as cloan dty chlienney myrgeddin, son t’ou livrey shin ass laue Vidian.

²³ As dooyrt Gideon roo, Cha jean-yms reill harrishdiu, chamoo nee my vac reill harrishdiu: yn Chiarn reillys harrishdiu.

²⁴ As dooyrt Gideon roo, Ta aghin aym dy yeearree erriu, dy der shiu ooilley dou fainaghyn-cleaysh nyn spooilley: (son va oc fainaghyn-cleaysh airhey, myr she Ishmaeliteyn v’ad.)

²⁵ As dreggyr ad, Ver mayd dy arryltagh ad. As skeayl ad garmad, as cheau ad ayn dagh dooinney fainaghyn-cleaysh e spooilley.

²⁶ As va trimmid ny fainaghyn airh ren eh y hirrey thousane as shiaght cheead shekel dy airh, cheu-mooie jeh coamraghyn, as jewellyn, as garmadyn purple v’er reeaghyn Vidian, as ny colliaryn airh va mysh mwannallyn ny camelyn.

²⁷ As jeu shoh ren Gideon Ephod, as hoie eh seose eh ayns Ophrah, yn ard-valley echey hene: as hie ooilley Israel er-shaghryn liorish coyrt ooashley da: yn red cheddin haink dy ve ribbeh da Gideon, as da e hie.

²⁸ Shoh myr va Midian er ny injillaghey fo cloan Israel, myr shen nagh hrog ad seose nyn ghing arragh: as va’n cheer ayns shee da-eed bleïn rish lhing Ghideon.

²⁹ As hie Jerubbaal mac Yoash, as chum eh ’sy hie hene.

³⁰ As va ec Gideon three-feed as jeih mec, er ny gheddyn jeh e chorp hene: son va echey ymmodee mraane.

³¹ As y co-lhiabbagh v’echey ayns Shechem, ren ish myrgeddin gymmyrkey da mac, ren eh genmys Abimelech.

³² As hooar Gideon mac Yoash baase tra v’eh shenn dy mie, as v’eh er ny oanluckey ayns lhiaght Yoash e ayr, ayns Ophrah jeh ny Abiezriteyn.

³³ As haink eh gy-kione, lurg baase Ghideon, dy ren cloan Israel chyndaa dy lhiattee, as hie ad er-shaghryn geiyrt er Baalim; as ghow ad Baal-berith dy ve yn jee oc.

³⁴ As cha ren cloan Israel cooinaghtyn er y Chiarn y Jee oc, va er livrey ad ass laueyn nyn noidyn er dy chooilley heu:

³⁵ Chamoo hoilshee ad kenjallys da thie Jerubbaal, ta shen Gideon, son ooilley ny obbraghyn mie v’eh er n’yannoo son Israel.