Briwnyn 7 - Yn Vible Casherick 1775 1819

CAB. VII

¹ Eisht ren Jerubbaal, (shen Gideon,) as ooilley’n pobble va mârish, girree dy moghey, as campal liorish chibbyr Harod: myr shen dy row sheshaght-caggee ny Midianiteyn my-hwoaie jeu, liorish cronk Moreh, ’sy choan.

² As dooyrt y Chiarn rish Gideon, Ta rouyr deiney mayrt’s dooys dy livrey ny Midianiteyn ayns nyn laueyn, nagh gow Israel oyr dy voggyssagh m’oï, gra, My laue hene ta er my hauail.

³ Immee nish er-y-fa shen, cur eam ayns clashtyn y pobble, gra, Quoi-erbee ta agglagh as lhag-chreeagh, lhig da chyndaa, as goll roish dy moghey veih slieau Ghilead: as hyndaa jeh’n pobble daa housane as feed, as duirree jeih thousaneyn.

⁴ As dooyrt y Chiarn rish Gideon, Ta rouyr sheshaght foast mayrt: cur lhiat ad sheese gys yn ushtey, as neem’s ad y phrowal er dty hon ayns shen: as shoh myr vees eh, mychione echey jir-yms rhyt, Eh shoh hed mayrt, yn er cheddin hed mayrt; as jeh quoi-erbee jir-yms rhyt, Cha jed eh shoh mayrt, eh shoh cha jed mayrt.

⁵ Myr shen hug eh lesh yn pobble sheese gys yn ushtey: as dooyrt y Chiarn rish Gideon, Dy chooilley unnane ta sliee seose yn ushtey lesh e hengey, myr moddey, eshyn ver oo er-lheh; dy chooilley unnane myrgeddin ta croymmey sheese er e ghlioonyn dy iu.

⁶ As yn earroo ocsyn ren giu ass nyn mass, va three cheead dooinney: agh ren ooilley yn chooid elley jeh’n pobble croymmey sheese er nyn glioonyn dy iu ushtey.

⁷ As dooyrt y Chiarn rish Gideon, Liorish ny three cheead dooinney ren sliee [yn ushtey] neem’s shiu y hauail, as livrey ny Midianiteyn gys dty laue: as lhig da ooilley yn chooid elley jeh’n pobble dagh dooinney goll gys e chummal hene.

⁸ Myr shen ghow yn pobble beaghey ayns nyn laue, as ny trumpetyn oc: as ooilley yn chooid elley jeh Israel hug eh ersooyl, dagh fer gys e chabbane hene; as dreill eh mârish ny three cheead shoh. As va sheshaght-caggee Vidian cheu-heese jeh ’sy choan.

⁹ As haink eh gy-kione yn oie cheddin, dy dooyrt y Chiarn rish, Trog ort, as immee sheese gys y cheshaght-chaggee shoh; son ta mish er livrey ad gys dty laue.

¹⁰ Agh my ta aggle ort dy gholl sheese, immee hene sheese gys y cheshaght-chaggee marish Phurah dty harvaant:

¹¹ As nee oo clashtyn cre t’ad dy ghra; as eisht vees dty laueyn er dyn niartaghey dy gholl sheese noi’n sheshaght-caggee shoh. Eisht hie eh sheese marish Phurah e harvaant gys y cheu-mooie jeh gard y cheshaght-chaggee.

¹² As va ny Midianiteyn, as ny Amalekiteyn, as ooilley cloan y shiar, lhie skeaylt ’sy choan myr locustyn son earroo; as va ny camelyn oc erskyn coontey, myr yn gheinnagh rish oirr ny marrey.

¹³ As tra va Gideon er jeet, cur-my-ner, va dooinney ayns shen ginsh dreamal da e heshey, as dooyrt eh, Cur-my-ner, ren mish dreamal, as cur-my-ner, ren berreen dy arran-oarn rowlal stiagh ayns camp Vidian, as haink eh noi cabbane, as woaill eh yn chabbane, as ve lhieggit, dy huitt eh, ny lhie kiart rish y thalloo.

¹⁴ As dansoor e heshey as dooyrt eh, Cha vel shoh monney agh cliwe Ghideon mac Yoash, dooinney dy Israel: son gys y laue echeysyn ta Jee er livrey Midian, as y slane sheshaght-caggee.

¹⁵ As shen myr ve, tra cheayll Gideon yn dreamal inshit, as kys ve er ny hoiggal, dy dug eh ooashley, as hyndaa eh gys sheshaght-caggee Israel, as dooyrt eh, Trog-jee, son ta’n Chiarn er livrey gys nyn laue sheshaght-caggee Vidian.

¹⁶ As rheynn eh ny three cheead dooinney ayns three sheshaghtyn, as hug eh trumpet ayns laue dagh dooinney, marish crockanyn follym as lampyn cheu-sthie jeh ny crockanyn.

¹⁷ As dooyrt eh roo, Jeeagh-jee orrym’s, as jean-jee myrgeddin: as cur-my-ner, tra hig-yms gys cheu-mooie jeh’n champ, shoh myr vees eh, myr hee shiu mish jannoo dy jean shiuish myrgeddin.

¹⁸ Tra neem’s sheidey yn trumpet, mish as ooilley ny ta mârym, eisht sheid-jee shiuish ny trumpetyn eu myrgeddin er dy chooilley heu jeh’n champ, as yllee-jee, Cliwe y CHIARN, as Ghideon.

¹⁹ Myr shen haink Gideon as ny keead dooinney va marish gys cheu-mooie jeh’n champ, ayns toshiaght watch y vean-oie; as ad nish er hoiaghey yn gard: as heid ad ny trumpetyn, as vrish ad ny crockanyn, va ayns nyn laueyn.

²⁰ As ren ny three sheshaghtyn-caggee sheidey ny trumpetyn, as vrish ad ny crockanyn, as chum ad ny lampyn ayns nyn laue chiare, as ny trumpetyn ayns nyn laue yesh dy heidey lhieu; as dyllee ad, Cliwe y CHIARN, as Ghideon.

²¹ As hass dy chooilley ghooinney er e ghrunt hene mygeayrt y champ: as roie yn slane sheshaght-caggee er-chea, as dyllee ad magh, as chossyn ad roue.

²² As heid ny three cheead ny trumpetyn, as hyndaa yn Chiarn cliwe dy chooilley ghooinney noi e heshey, trooid ooilley yn sheshaght-caggee: as roie ad er-chea gys Beth-shittah ayns Zererath, as gys ardjyn Abel-meholah, gys Tabbath.

²³ As va deiney Israel er nyn jaglym cooidjagh veih Naphtali, as Asher, as veih Manasseh, as deiyr ad er ny Midianiteyn.

²⁴ As hug Gideon magh chaghteryn trooid ooilley slieau Ephraim, gra, Tar-jee sheese noi ny Midianiteyn, as cosne-jee rouesyn gys aaghyn ny hawinyn gys Beth-barah as Jordan. Eisht va ooilley deiney Ephraim er nyn jaglym cooidjagh, as ghow ad ny ushtaghyn gys Beth-barah as Jordan.

²⁵ As ghow ad daa phrince ny Midianiteyn, Oreb as Zeeb; as varr ad Oreb er creg Oreb, as Zeeb varr ad ec press-feeyney Zeeb; as hie ad er-eiyrt’s Midian, as hug ad lhieu king Oreb as Zeeb gys Gideon er cheu elley dy Yordan.