Briwnyn 4 - Yn Vible Casherick 1775 1819

CAB. IV

¹ As reesht ren cloan Israel olk ayns shilley’n Chiarn lurg baase Ehud.

² As ren y Chiarn ad y chreck gys laue Yabin ree Chanaan, va reill ayns Hazor; captan e heshaght-chaggee va Sisera, va e chummal ayns Harosheth jeh ny ashoonyn.

³ As ren cloan Israel gaccan gys y Chiarn; son va echey nuy cheead fainagh yiarn; as son feed bleïn ren eh dy mooar seaghney cloan Israel.

⁴ As va Deborah yn phadeyr, ben Lapidoth, briwnys Israel ec y traa shen.

⁵ As v’ee cummal fo billey-palm Deborah, eddyr Ramah as Beth-el ayns cronk Ephraim; as hie cloan Israel seose huic son briwnys.

⁶ As hug ee chaghteraght gys Barak mac Abinoam veih Kedesh-naphtali, as dooyrt ee rish, Nagh vel y Chiarn Jee Israel er harey, gra, Immee, as tayrn gys slieau Tabor, as gow mayrt jeih thousane dooinney jeh cloan Naphtali, as jeh cloan Zebulun?

⁷ As tayrn-yms hood, gys awin Kishon, Sisera captan armee Yabin, marish ny fainee echey as e heshaght-chaggee; as livrey-yms eh gys dty laue.

⁸ As dooyrt Barak r’ee, My hed uss mârym, eisht neem’s goll: agh mannagh jed uss mârym, eisht cha jean-yms goll.

⁹ As dooyrt ee, Neem’s son shickyrys goll mayrt: agh ny-yeih cha bee’n jurnah shoh t’ou dy ghoaill gys dty ooashley; son nee’n Chiarn Sisera y livrey gys laue ben. As hrog Deborah urree, as hie ee marish Barak gys Kedesh.

¹⁰ As ren Barak Zebulun as Naphtali y vusteral ec Kedesh; as hie eh seose lesh jeih thousane dooinney ec e voynyn: as hie Deborah seose mârish.

¹¹ Nish va Heber yn Kenite, va jeh cloan Hobab ayr-’sy-leigh Voses, er scarrey eh-hene veih ny Keniteyn, as er scughey e chabbane gys cheer-rea Zaanaim, va liorish Kedesh.

¹² As dinsh ad da Sisera dy row Barak mac Abinoam er n’gholl seose gys slieau Tabor.

¹³ As ren Sisera chaglym cooidjagh ooilley ny fainee echey, nuy cheead fainagh yiarn, as ooilley’n cheshaght va mârish, veih Harosheth jeh ny ashoonyn gys awin Kishon.

¹⁴ As dooyrt Deborah rish Barak, Seose oo; son er y laa shoh nee’n Chiarn livrey Sisera gys dty laue: nagh vel y Chiarn er n’gholl magh royd? Myr shen hie Barak sheese veih slieau Tabor, as jeih thousane dooinney geiyrt er.

¹⁵ As hug y Chiarn fo-chosh Sisera, as ooilley ny fainee, as ooilley e heshaght-chaggee, lesh foyr y chliwe, kiongoyrt rish Barak; myr shen dy ren Sisera tarlheim jeh’n fainagh, as chossyn eh ersooyl ry-chosh.

¹⁶ Agh deiyr Barak er ny fainee, as er y cheshaght-chaggee, derrey Harosheth jeh ny ashoonyn: as huitt ooilley sheshaght-caggee Sisera roish foyr y chliwe; as cha row dooinney jeu faagit.

¹⁷ Agh chossyn Sisera ersooyl ry-chosh gys cabbane Jael ben Heber yn Kenite: son va shee eddyr Jabin ree Hazor as thie Heber yn Kenite.

¹⁸ As hie Jael magh quail Sisera, as dooyrt ee rish, Chyndaa stiagh, my hiarn, chyndaa stiagh hym’s, ny bee aggle ort: as tra v’eh er jeet stiagh ayns y chabbane, ren ee coodaghey eh lesh curleïd.

¹⁹ As dooyrt eh r’ee, Cur dou, ta mee guee ort, red beg dy ushtey dy iu, son ta mee paagh: as doshil ee saagh dy vainney, as hug ee jough da, as ren ee eh y choodaghey.

²⁰ Eisht dooyrt eh r’ee, Shass ayns dorrys y chabbane; as my hig dooinney erbee dy vriaght jeed, Vel dooinney erbee ayns shoh? dy jir uss, Cha vel.

²¹ Eisht ghow Jael ben Heber unnane jeh kibbinyn y chabbane, as hammar ny laue, as hayrn ee dy aashagh er-gerrey da, as woaill ee yn kibbin trooid e chione, as ren ee shickyr jeh ’sy thalloo; (son v’eh ny hrome chadley, as skee:) myr shen hooar eh baase.

²² As cur-my-ner, myr va Barak er-eiyrt’s Sisera, haink Jael magh ny whail, as dooyrt ee rish, Tar stiagh, as jeeagh-yms dhyt yn dooinney t’ou dy hirrey. As tra haink eh stiagh ayns y chabbane eck, cur-my-ner, va Sisera ny lhie marroo, as y kibbin trooid cuishlin e ching.

²³ Myr shen hug Jee fo-chosh er y laa shen Jabin ree Chanaan roish cloan Israel.

²⁴ As va laue cloan Israel er ny niartaghey, dy dooar ad y varriaght er Jabin ree Chanaan, derrey v’ad er stroie Jabin ree Chanaan.