Briwnyn 21 - Yn Vible Casherick 1775 1819

CAB. XXI

¹ Nish va deiney Israel er vreearrey ayns Mizpeh, gra, Cha jean fer j’inyn cur yn inneen echey da Benjamin son ben.

² As haink y pobble gys thie Yee, as duirree ad ayns shen gys yn astyr fenish Yee, as hrog ad seose nyn goraa, as cheayn ad dy sharroo;

³ As dooyrt ad, O Hiarn Yee Israel, cre’n-oyr ta shoh er duittym er Israel, dy beagh un tribe nish caillit ayns Israel?

⁴ As haink eh gy-kione laa-ny-vairagh, dy dirree yn pobble dy moghey, as hrog ad altar ayns shen, as heb ad ourallyn-losht, as ourallyn-shee.

⁵ As dooyrt cloan Israel, Quoi t’ayn mastey ooilley tribeyn Israel nagh daink seose marish y cheshaght gys y Chiarn? son v’ad er n’yannoo breearrey chion n’oï-syn nagh daink seose gys y Chiarn gys Mizpeh, gra, Bee eh dy shickyr er ny choyrt gy-baase.

⁶ As ghow cloan Israel chymmey jeh Benjamin nyn mraar, as dooyrt ad, Ta un tribe giarit jeh veih Israel yn laa jiu:

⁷ Cre nee mayd son mraane dauesyn ta er-mayrn, fakin dy vel shin er vreearrey liorish y Chiarn, nagh der mayd ny inneenyn ain daue son mraane?

⁸ As dooyrt ad, Quoi t’ayn jeh tribeyn Israel, nagh daink seose gys Mizpeh gys y Chiarn? As cur-my-ner, cha daink dooinney veih Jabesh-gilead gys y champ ec yn eam.

⁹ Son va’n pobble er nyn earroo, as cur-my-ner, cha row unnane jeh cummaltee Yabesh-gilead ayns shen.

¹⁰ As hug y cheshaght nyn ’oï daa housane jeig jeh ny deiney s’dunnal, goardrail daue, gra, Immee-jee, as stroie-jee cummaltee Yabesh-gilead lesh foyr y chliwe, marish ny mraane as y chloan.

¹¹ As shoh t’er nyn gurrym, Nee shiu dy bollagh stroie dy chooilley vac dooinney, as dy chooilley ven nagh vel ny moidyn.

¹² As hooar ad mastey cummaltee Yabesh-gilead kiare cheead moidyn aegey, nagh bione daue dooinney; as hug ad lhieu ad gys y champ gys Shiloh, t’ayns cheer Chanaan.

¹³ As hug yn slane sheshaght chaghteryn dy loayrt rish cloan Venjamin, va ayns creg Rimmon, as dy hebbal daue shee.

¹⁴ As haink Benjamin reesht ec y traa shen; as hug ad daue ny mraane v’ad er hauail bio jeh mraane Yabesh-gilead; as ny-yeih myr shen hene huitt ad giare.

¹⁵ As va’n pobble seaghnit son Benjamin, er-yn-oyr dy row yn Chiarn er n’yannoo brishey ayns tribeyn Israel.

¹⁶ Eisht dooyrt shanstyr y phobble, Cre nee mayd er ny son ocsyn nagh vel mraane er roshtyn orroo, fakin nagh vel ben faagit ayns Benjamin?

¹⁷ As dooyrt ad, Shegin da’n eiraght ve ny chour ocsyn ta er-mayrn jeh Benjamin, nagh bee tribe er ny stroie ayns Israel.

¹⁸ Agh cha jig lhien dy choyrt daue mraane jeh ny inneenyn ainyn: son va cloan Israel er chiangley ad-hene fo mollaght, gra, Cursit vees eshyn ver ben da Benjamin.

¹⁹ Eisht dooyrt ad, Cur-my-ner, ta feailley-bleeaney dy ve freilt gys y Chiarn ayns Shiloh, ayns ynnyd my-hwoaie jeh Beth-el, er cheu-har jeh’n raad mooar ta goll seose veih Beth-el gys Shechem, as my-yiass jeh Lebonah.

²⁰ Shen-y-fa doardee ad da cloan Venjamin, gra, Immee-jee, as lhie-jee fo-chlea ayns ny garaghyn-feeyney;

²¹ As gow-jee tastey, tra hee shiu inneenyn Shiloh cheet magh ayns sheshaght dy ghaunsin, eisht roie-jee magh ass ny garaghyn-feeyney, as taare-jee dagh dooinney e ven jeh inneenyn Shiloh, as cosne-jee gys thalloo Venjamin.

²² As my hig nyn ayraghyn ny nyn mraaraghyn hooinyn dy phlaiynt, jir mayd roo, Bee-jee foayroil daue er y ghraih ainyn, er-yn-oyr nagh daag shin bio da dagh dooinney e ven ’sy chaggey: son cha nee shiuish ta nish er choyrt daue mraane, dy yannoo shiu-hene oolee.

²³ As shen myr ren cloan Venjamin, as cordail rish earroo ny deiney, ghow ad ben y pheesh, ren ad y haartyn jeusyn va daunsin: as hie ad rhymboo reesht gys nyn eiraght, as hrog ad ass-y-noa ny ard-valjyn, as ren ad cummal ayndoo.

²⁴ As hie cloan Israel myrgeddin roue ec y traa shen, dy chooilley ghooinney gys e hribe hene, as gys e lught-thie, as jimmee ad rhymboo veih shen dy chooilley ghooinney gys e eiraght hene.

²⁵ Ayns ny laghyn shen cha row ree ayns Israel: agh dy chooilley ghooinney jannoo lurg e aigney hene.