Briwnyn 20 - Yn Vible Casherick 1775 1819

CAB. XX

¹ Eisht hie ooilley cloan Israel magh, as v’ad er nyn jaglym cooidjagh myr un dooinney, veih Dan eer gys Beer-sheba, marish cheer Ghilead, fenish y Chiarn ayns Mizpeh.

² As haink ard-gheiney ooilley’n pobble, eer jeh ooilley tribeyn Israel, dy hebbal ad-hene ayns chaglym-cooidjagh pobble Yee, kiare cheead thousane coshee va tayrn y chliwe.

³ (Nish va cloan Venjamin er chlashtyn dy row cloan Israel er n’gholl seose gys Mizpeh.) Eisht dooyrt cloan Israel, Soilshee dooin kys va’n obbyr eajee shoh er ny yannoo?

⁴ As dreggyr y Levite, dooinney yn ven varroo, as dooyrt eh, Haink mish as my cho-lhiabbagh gys Gibeah, ta bentyn gys Benjamin, dy ghoaill aaght:

⁵ As dirree deiney Ghibeah m’oï, as ren ad chionney orrym mygeayrt y thie ’syn oie, er-chee dy my varroo; as my ven ghow ad er-êgin, dy vel ee marroo.

⁶ As ghow mee my ven, as yiare mee ee ayns peeshyn, as hug mee ad trooid ooilley’n cheer eiraght Israel: son t’ad er n’yannoo obbyr naareydagh as scammyltagh ayns Israel.

⁷ Cur-my-ner, ta shiu ooilley cloan Israel, cur-jee nyn goyrle ’sy chooish shoh.

⁸ As hrog ooilley’n pobble myr un dooinney, gra, Cha jed dooinney j’in gys e chabbane, chamoo hed fer j’in gys e hie:

⁹ Agh shoh myr nee mayd rish Gibeah, tilg mayd lottyn quoi hed n’oï:

¹⁰ As nee mayd goaill jeih deiney veih keead, trooid ooilley tribeyn Israel, as keead veih thousane, as thousane veih jeih thousaneyn, dy hirveish y champ lesh beaghey, tra hig ad gys Gibeah jeh Benjamin, dy vod ad cooilleeney ’ghoaill orroo, cordail rish ooilley’n olk t’ad er n’obbraghey ayns Israel.

¹¹ Myr shen va ooilley deiney Israel er nyn jaglym noi’n ard-valley, sniemmit dy cheilley myr un dooinney.

¹² As hug tribeyn Israel chaghteryn trooid ooilley tribe Venjamin, gra, Cre’n obbyr dwoaiagh shoh, ta jeant ny mast’ eu?

¹³ Nish er-y-fa shen, livrey-jee seose hooin ny deiney, cloan Velial, t’ayns Gibeah, dy vod mayd ad y choyrt gy-baase, as y loght y scughey veih Israel. Agh cha dug cloan Venjamin clashtyn da coraa nyn mraaraghyn, cloan Israel:

¹⁴ Agh ren cloan Venjamin chaglym ad-hene cooidjagh ass nyn ard-valjyn gys Gibeah, dy gholl magh dy chaggey noi cloan Israel.

¹⁵ As va earroo cloan Venjamin er ny ghoaill ec y traa shen, ayns ny ard-valjyn, shey thousaneyn as feed va tayrn y chliwe, gyn-eïe er cummaltee Ghibeah, va’n earroo oc shiaght cheead reih deiney.

¹⁶ Mastey ooilley’n pobble shoh, va shiaght cheead reih deiney cha jesh lesh y laue chiare dy voddagh dagh fer jeu clagh y hilgey ass sling, gys lheead renaig, gyn missal.

¹⁷ As va earroo cloan Israel, gyn-eïe er cloan Venjamin, kiare cheead thousane deiney-cliwe; v ad shoh ooilley deiney-caggee.

¹⁸ As dirree cloan Israel, as hie ad seose gys thie Yee, dy hirrey coyrle er Jee, as dooyrt ad; Quoi hed seose hoshiaght dy chaggey noi cloan Venjamin? as dooyrt y Chiarn, Judah hed seose hoshiaght.

¹⁹ As hrog cloan Israel orroo ’sy voghrey, as champ ad noi Gibeah.

²⁰ As hie cloan Israel magh dy chaggey noi Benjamin, as hug cloan Israel ad-hene ayns order-caggee nyn ’oï ec Gibeah.

²¹ As haink cloan Venjamin magh ass Gibeah, as stroie ad sheese gys y thalloo jeh ny Israeliteyn, yn laa shen, daa housane as feed.

²² As ren cloan Israel ad-hene y niartaghey, as hayrn ad seose yn cheshaght oc ayns order-caggee, ’sy ghrunt cheddin v’ad er y laa roïe.

²³ (As hie cloan Israel seose, as ren ad dobberan fenish y Chiarn, derrey’n astyr, as hir ad coyrle jeh’n Chiarn, gra, Jem seose reesht dy chaggey noi cloan Venjamin my vraar? As dooyrt y Chiarn, Gow seose n’oï.)

²⁴ As hayrn cloan Israel er-gerrey da cloan Venjamin yn nah laa.

²⁵ As hie Benjamin magh ass Gibeah nyn ’oï yn nah laa, as stroie ad sheese gys y thalloo, jeh cloan Israel reesht, hoght thousaneyn jeig: v’ad shoh ooilley deiney-cliwe.

²⁶ Eisht hie ooilley cloan Israel seose, as haink ad gys thie Yee, as hoie ad ayns shen dobberan kiongoyrt rish y Chiarn, as hrosht ad yn laa shen derrey’n astyr, as heb ad ourallyn-losht as ourallyn-shee kiongoyrt rish y Chiarn.

²⁷ As ren cloan Israel shirrey coyrle veih’n Chiarn, (son shen y raad va arg conaant Yee, ayns ny laghyn shoh;

²⁸ As she Phinehas, mac Eleazar, mac Aaron, va shirveish kiongoyrt rish ec y traa cheddin,) as dooyrt ad, Jig eh lhiam dy chaggey reesht noi cloan Venjamin my vraar, ny jean-ym goaill fea? As dooyrt y Chiarn, Gow seose; son mairagh livrey-ym ad gys dty laue.

²⁹ As hoie cloan Israel deiney dy lhie cooyl-chlea ooilley mygeayrt Gibeah.

³⁰ As hie cloan Israel seose noi cloan Venjamin er y trass laa, as hug ad ad-hene ayns order-caggee noi Gibeah, myr roïe.

³¹ As hie cloan Venjamin magh noi’n pobble, as v’ad er nyn dayrn ersooyl veih’n ard-valley, as ren ad toshiaght dy woalley sheese yn pobble, as dy varroo, myr ren ad roïe, ayns ny raaidyn mooarey, yn derrey yeh jeu ta goll seose lesh thie Yee, as y jeh elley lesh Gibeah ’sy vagher, mysh jeih deiney as feed jeh Israel.

³² As dooyrt cloan Venjamin, T’ad giarit sheese kiongoyrt rooin myr ec y toshiaght. Agh dooyrt cloan Israel, Lhig dooin chea, as tayrn ad veih’n ard-valley gys ny raaidyn mooarey.

³³ As hrog ooilley deiney Israel seose veih nyn ynnyd, as hug ad ad-hene ayns order-caggee ec Baal-tamar; as haink adsyn jeh Israel va ny lhie cooyl-chlea magh ass nyn ynnydyn follit, ass lheeantyn Ghibeah.

³⁴ As haink noi Gibeah jeih thousane reih deiney ass ooilley Israel, as va’n caggey trome: agh cha row fys oc dy row’n chragh cha faggys daue.

³⁵ As hug y Chiarn Benjamin fo-chosh kiongoyrt rish Israel: as stroie cloan Israel jeh ny Benjamiteyn yn laa shen queig thousaneyn as feed as keead dooinney; v’ad shoh ooilley deiney-cliwe.

³⁶ Myr shen honnick cloan Venjamin dy row’n chooish smessey oc: son lhig deiney Israel orroo dy row ad chea veih ny Benjamiteyn, er-yn-oyr dy hreisht ad hucsyn, va lhie cooyl-chlea liorish Gibeah.

³⁷ As dirree adsyn va ny lhie cooyl-chlea dy tappee, as roie ad stiagh er Gibeah, as skeayl ad trooid yn ard-valley, as stroie ad eh lesh foyr y chliwe.

³⁸ Nish va cowrey pointit eddyr deiney Israel as y vooinjer va dy lhie fo-chlea, dy jinnagh ad aile mooar lesh jaagh dy hroggal ass yn ard-valley.

³⁹ As tra ren deiney Israel coyrt cooyl ’sy chaggey, ren Benjamin toshiaght dy woalley sheese as dy varroo jeh deiney Israel mysh jeih deiney as feed; son dooyrt ad, Shickyr t’ad giarit sheese kiongoyrt rooin, myr v’ad ’sy chied chaggey.

⁴⁰ Agh tra ren yn aile toshiaght dy hroggal seose ass yn ard-valley lesh bodjal dy yaagh, yeeagh ny Benjamiteyn nyn gooyl, as cur-my-ner, ren lossey yn ard-valley troggal seose dy ard ’syn aer.

⁴¹ As tra hyndaa deiney Israel dy chur eddin daue, va deiney Venjamin atchimagh; son honnick ad dy row’n olk er jeet orroo.

⁴² Shen-y-fa hug ad cooyl rish deiney Israel gys raad yn aasagh; agh verr y caggey orroo: as adsyn haink ass ny ard-valjyn ren ad y stroie eddyr ad.

⁴³ Myr shoh ren ad ny Benjamiteyn y hionney stiagh er dy chooilley heu, as hie ad er nyn eiyrt’s, as stamp ad sheese ad dy aashagh,’ cheu-har jeh Gibeah lesh irree ny greiney.

⁴⁴ As huitt jeh deiney Venjamin hoght thousaneyn jeig: v’ad shoh ooilley deiney niartal.

⁴⁵ As hyndaa ad, as chossyn ad roue lesh yn aasagh, gys creg Rimmon: as ren ad jeelym jeu ayns ny raaidyn mooarey, queig thousaneyn dooinney; as deiyr ad dy creoi geiyrt orroo gys Gidom, as varr ad daa housane dooinney jeu.

⁴⁶ Myr shen ooilley ny huitt yn laa cheddin jeh Benjamin va queig thousaneyn as feed dooinney va tayrn y chliwe: v’ad shoh ooilley deiney niartal.

⁴⁷ Agh ren shey cheead dooinney chyndaa, as chossyn ad gys yn aasagh, gys creg Rimmon, as duirree ad ayns creg Rimmon kiare meeaghyn.

⁴⁸ As hyndaa deiney Israel reesht er cloan Venjamin, as woaill ad ad lesh foyr y chliwe, chammah deiney dy chooilley ard-valley, as maase, as ooilley ny haink gys laue: myrgeddin hoie ad er aile dy chooilley ard-valley haink ad huggey.