Briwnyn 2 - Yn Vible Casherick 1775 1819

CAB. II

¹ As haink ainle y Chiarn seose veih Gilgal gys Bochim, as dooyrt eh, Hug mee lhiam shiu ass Egypt, as er leeideil shiu gys y cheer ren mee gialdyn da ny ayraghyn eu; as dooyrt mee, Cha brish-ym dy bragh my chonaant riu.

² As cha jean shiu coardail erbee rish cummaltee yn cheer shoh; nee shiu ny altaryn oc y lhieggal: agh cha vel shiu er ve biallagh gys my choraa: cre’n-fa ta shiu er n’yannoo shoh?

³ Shen-y-fa dooyrt mish myrgeddin, Cha jean-yms ad y imman magh kiongoyrt riu; agh bee ad myr drineyn ayns nyn lhiattee, as ny jeeghyn oc son ribbeh diu.

⁴ As haink eh gy-kione, tra va ainle y Chiarn er loayrt ny goan shoh rish ooilley cloan Israel, dy hrog y pobble seose nyn goraa, as ren ad dobberan.

⁵ As denmys ad yn ynnyd shen Bochim: as ayns shen heb ad oural gys y Chiarn.

⁶ As tra va Joshua er lhiggey’n raad da’n pobble; hie cloan Israel dy chooilley ghooinney gys e eiraght dy ghoaill possession jeh’n cheer.

⁷ As ren y pobble shirveish yn Chiarn ooilley laghyn Yoshua, as ooilley laghyn ny shanstyryn va er-mayrn lurg Joshua, va er vakin ooilley obbraghyn yindyssagh y Chiarn, v’eh er n’yannoo son Israel.

⁸ As hooar Joshua mac Nun, sharvaant y Chiarn, baase ec queig-feed as jeih bleeaney dy eash.

⁹ As doanluck ad eh, ayns oirr e eiraght hene ayns Timnath-heres, ayns cronk Ephraim, er cheu-twoaie jeh cronk Gaash.

¹⁰ As va ooilley’n sheeloghe shen myrgeddin er nyn jaglym gys nyn ayraghyn: as hrog seose sheeloghe elley nyn yeï, nagh dug geill da’n Chiarn, ny foast da ny obbraghyn v’eh er n’yannoo son Israel.

¹¹ As ren cloan Israel peccah ayns shilley’n Chiarn, as hirveish ad Baalim:

¹² As hreig ad Chiarn Jee nyn ayraghyn, hug lesh ad magh ass cheer Egypt, as deiyr ad er jeeghyn elley, jeeghyn y pobble va mygeayrt-y-moo, as chroym ad sheese ad hene huc, as vrasnee ad y Chiarn gys corree.

¹³ As hreig ad y Chiarn, as hirveish ad Baalim as Ashtaroth.

¹⁴ As va jymmoose yn Chiarn er ny vrasnaghey noi Israel, as ren eh ad y livrey gys laueyn ny spooilleyderyn ren ad y roostey, as chreck eh ad gys laueyn nyn noidyn ooilley mygeayrt, myr shen nagh voddagh ad veg sodjey shassoo roish nyn noidyn.

¹⁵ Raad erbee dy jagh ad magh, va laue y Chiarn nyn ’oï son olk, myr va’n Chiarn er ghra, as myr va’n Chiarn er vreearrey daue: as v’ad dy mooar seaghnit.

¹⁶ Agh ny-yeih ren y Chiarn briwnyn y hroggal seose, ren ad y livrey ass ny laueyn ocsyn ren tranlaase orroo.

¹⁷ As ny-yeih cha dug ad geill da ny briwnyn oc, agh hie ad er-shaghryn geiyrt er jeeghyn elley, dy choyrt ooashley daue: hyndaa ad dy tappee jeh’n raad ayn jimmee nyn ayraghyn, va biallagh gys saraghyn y Chiarn; agh cha ren adsyn myr shen.

¹⁸ As tra va’n Chiarn er hroggal seose briwnyn daue, eisht va’n Chiarn marish y vriw shen, as ren eh ad y livrey ass laue nyn noidyn ooilley laghyn y vriw: (son ghow’n Chiarn chymmey jeh ny osnaghyn oc, kyndagh roosyn va seaghney as jannoo tranlaase orroo.)

¹⁹ As haink eh gy-kione, tra va’n briw marroo, dy dug ad cooyl as ren ad ny smessey na nyn ayraghyn, ayns geiyrt er jeeghyn elley dy hirveish ad, as dy chroymmey sheese huc: cha scuirr ad veih nyn obbraghyn, ny veih’n drogh-yannoo oc hene.

²⁰ As va corree yn Chiarn cheh noi Israel; as dooyrt eh, Er-yn-oyr dy vel y pobble shoh er vrishey my chonaant ren mee rish nyn ayraghyn, as nagh vel ad er choyrt geill da my choraa’s;

²¹ Cha jean-yms myrgeddin maghey shoh geiyrt ersooyl voue veg jeh ny ashoonyn daag Joshua tra hooar eh baase;

²² Lioroo dy voddym prowal Israel, jean ad freayll raad yn Chiarn dy immeeaght ayn, myr ren nyn ayraghyn, mannagh jean.

²³ Shen-y-fa ren y Chiarn gymmyrkey lesh ny ashoonyn shoh, fegooish geiyrt ad magh ooilley cooidjagh; chamoo ren eh livrey ad gys laue Yoshua.