Briwnyn 18 - Yn Vible Casherick 1775 1819

CAB. XVIII

¹ Ayns ny laghyn shen cha row ree ayns Israel: as ec y traa cheddin ren tribe ny Daniteyn shirrey magh eiraght sodjey daue hene dy chummal ayn; son gys y laa shen cha row ad er gheddyn nyn slane eiraght mastey tribeyn Israel.

² As hug cloan Dan magh veih ny ardjyn queig deiney jeh’n chynney oc hene, deiney dunnal, veih Zorah, as veih Eshtaol, dy scrial y cheer, as dy ghoaill baght jeh; as dooyrt ad roo, Immee-jee, gow-jee baght jeh’n cheer: as tra haink ad gys cronk Ephraim, gys thie Micah, ghow ad aaght ayns shen.

³ Tra v’ad ec thie Micah, ghow ad tastey jeh glare y dooinney aeg yn Levite; as hie ad stiagh, as dooyrt ad rish, Quoi hug lesh oo gys shoh? as cre ta dt’eilkin? as cre t’ad dy yannoo ayns shoh?

⁴ As dooyrt eh roo, Shoh, as myr shoh ta Micah dellal rhym; t’eh er vailley mee, as ta mee e haggyrt.

⁵ As dooyrt ad rish, Shir coyrle, ta shin guee ort, er Jee, dy vod fys ’ve ain, jig y jurnah ta shin dy ghoaill dy mie lhien.

⁶ As dooyrt y saggyrt roo, Immee-jee ayns shee: bee’n Chiarn nyn leeideilagh ’sy raad ta shiu goll.

⁷ Eisht hie ny queig deiney roue, as haink ad gys Laish, as hug ad tastey da ny cummaltee v’ayn, nagh row ad ayns aggle erbee roish noidyn, agh baghey ayns shee as sauchys, myr ny Zidonianee; as nagh row fer-oik ’sy cheer, dy choyrt ad gys nearey, son nhee erbee; as dy row ad foddey veih ny Zidonianee, as nagh row dellal oc rish dooinney erbee.

⁸ As hyndaa ad gys nyn mraaraghyn ec Zorah as Eshtaol; as dooyrt ny braaraghyn oc roo, Cre t’eu dy ghra?

⁹ As dooyrt ad, Trog-jee erriu, lhig dooin goll seose noi oc: son ta shin er vakin y cheer, as cur-my-ner, te feer vie; as vel shiuish nyn daaue? ny bee-jee liastagh dy gholl, as dy ghoaill dooin hene y cheer.

¹⁰ Tra hed shiu, nee shiu cheet gys pobble nagh vel eïe oc er noidyn, as gys cheer aalin: son ta Jee er choyrt eh gys nyn laueyn; boayl ta messoil ayns dy chooilley nhee t’er y thalloo.

¹¹ As hie magh veih shen, ass Zorah as Eshtaol, jeh kynney ny Daniteyn, shey cheead dooinney eïllit lesh greïnyn-caggee.

¹² As hie ad seose, as ren ad campal ayns Kirjath-jearim, ayns Judah: shen-y-fa denmys ad yn ynnyd shen Mahaneh-dan, gys y laa jiu: cur-my-ner, te my-hiar jeh Kirjath-jearim.

¹³ As hie ad er nyn doshiaght veih shen gys cronk Ephraim, as haink ad gys thie Vicah.

¹⁴ Eisht dreggyr ny queig deiney hie dy ghoaill baght jeh cheer Laish, as dooyrt ad rish nyn mraaraghyn, Vel fys eu dy vel ayns ny thieyn shoh, ephod, as teraphim, as jalloo grainnit, as jalloo lheït? nish er-y-fa shen, smooinee-jee cre t’eu dy yannoo?

¹⁵ As hyndaa ad gys shen, as haink ad gys y thie raad va’n dooinney aeg yn Levite, eer gys thie Vicah, as vannee ad da.

¹⁶ As ny shey cheead deiney eïllit lesh ny greïnyn-caggee, va jeh cloan Dan, hass ad ec y yiat.

¹⁷ As hie ny queig deiney scrialtee yn cheer seose, as haink ad stiagh, as ghow ad yn jalloo grainnit, as yn ephod, as yn teraphim, as yn jalloo lheït: as hass y saggyrt ’sy yiat, marish ny shey cheead deiney-caggee armit.

¹⁸ As hie ad shoh stiagh ayns thie Vicah, as hug ad lhieu magh yn jalloo grainnit, yn ephod, as yn teraphim, as yn jalloo lheït: eisht dooyrt y saggyrt roo, Cre shoh ta shiu jannoo?

¹⁹ As dooyrt ad rish, Bee dty host, cur dty laue er dty veeal, as tar mârin, as bee oo dooin son ayr as saggyrt: cree share dhyt dy ve dty haggyrt da thie un dooinney, ny dy ve dty haggyrt da tribe as kynney ayns Israel?

²⁰ As va cree yn taggyrt lhieu, as ghow eh yn ephod, as y teraphim, as y jalloo grainnit, as hie eh ayns mean y cheshaght.

²¹ Myr shen hyndaa ad, as jimmee ad rhymboo, as hug ad y vooinjer veggey, as yn ollagh, as y charriads, rhymboo.

²² As tra v’ad tammylt mie veih thie Vicah, va naboonyn Vicah er nyn jaglym cooidjagh, as haink ad seose rish cloan Dan.

²³ As deïe ad gys cloan Dan; as hyndaa ad mygeayrt, as dooyrt ad rish Micah, Cre ta jannoo ort, dy vel oo cheet lesh lheid y cheshaght?

²⁴ As dooyrt eh, Ta shiu er ghoaill ersooyl my yeeghyn ta mee er n’yannoo, as yn saggyrt, as er n’gholl ersooyl lhieu: as cre share t’aym? As vel shiu gra rhym, Cre ta jannoo ort?

²⁵ As dooyrt cloan Dan rish, Ny lhig da dty choraa v’er ny chlashtyn ny mast’ ain, er-aggle dy duitt feallagh fargagh ort, as dy gaill oo dty vioys, marish bioys dty lught-thie.

²⁶ As hie cloan Dan er nyn raad: as tra honnick Micah dy row ad ro lajer er e hon, hyndaa eh as hie eh reesht gys e hie hene.

²⁷ As ghow ad ny reddyn va Micah er n’yannoo, as y saggyrt v’echey, as haink ad gys Laish, gys pobble sheeoil as feagh: as woaill ad ad lesh foyr y chliwe, as hug ad yn ard-valley er aile.

²⁸ As cha row fer erbee dy livrey ad, er-yn-oyr dy row ad foddey veih Zidon, as cha row dellal oc rish dooinney erbee: as ve ayns y choan ta liorish Beth-rehob. As hrog ad ard-valley, as chum ad ayn.

²⁹ As denmys ad yn ard-valley Dan, lurg ennym Dan nyn ayr, va mac Israel: agh va ennym yn ard-valley roish shen Laish.

³⁰ As hoie cloan Dan seose yn jalloo grainnit: as va Jonathan mac Ghershom, mac Voses, eh-hene as e vec nyn saggyrtyn da tribe Dan gys traa cappeeys yn arg.

³¹ As hoie ad seose daue hene jalloo grainnit Vicah ooilley’n traa va thie Yee ayns Shiloh.