Briwnyn 15 - Yn Vible Casherick 1775 1819

CAB. XV

¹ Agh haink eh gy-kione tammylt ny lurg shen, ayns imbagh y fouyr-churnagh, dy jagh Samson dy yeeaghyn e ven, lesh mannan son cuirraghyn; as dooyrt eh, Hem’s stiagh gys my ven ’sy chamyr: agh cha lhiggagh yn ayr eck da goll stiagh.

² As dooyrt yn ayr eck, Smooinee mee dy jarroo dy r’ou dy bollagh er hreigeil ee; shen-y-fa hug mee da dty charrey ee: nagh vel e shuyr saa ny s’aalin na ish? gow ish, ta mee guee ort, ’syn ynnyd eck.

³ Er shoh smooinee Samson rish hene mychione oc, Cha vod ny Philistinee nish coyrt foill my lieh, ga dy jinnin’s assee dauesyn.

⁴ As hie Samson as haare eh three cheead shynnagh, as ghow eh torchyn, as hyndaa eh ad famman ry amman, as hug eh ny torchyn ’sy vean eddyr y daa amman.

⁵ As tra v’eh er choyrt aile gys ny torchyn, lhig eh’n raad daue ayns arroo ny Philistinee, as losht eh chammah ny sthookyn, as yn arroo creen marish ny garaghyn-feeyney as olive.

⁶ Eisht dooyrt ny Philistinee, Quoi t’er n’yannoo shoh? As dreggyr ad, Samson, mac-’sy-leigh yn Timnite, er-yn-oyr dy ghow eh yn ven echey, as dy dug eh ee da e charrey. As haink ny Philistinee seose, as losht ad ish as e ayr lesh aile.

⁷ As dooyrt Samson roo, Ga dy vel shiu er n’yannoo shoh, ny-yeih bee cooilleeney aym’s erriu, as eisht goym fea.

⁸ As woaill eh ad rass as cass, lesh cragh dewil: as hie eh sheese as chum eh er mullagh creg Etam.

⁹ Eisht hie ny Philistinee seose, as ren ad campal ayns Judah, as skeayl ad ad-hene ayns Lehi.

¹⁰ As dooyrt deiney Yudah, Cre’n-oyr ta shiu er jeet seose nyn ’oï? As dreggyr ad, Dy chiangley Samson ta shin er jeet seose, dy yannoo rishyn myr t’eshyn er n’yannoo rooinyn.

¹¹ Eisht hie three thousane dooinney dy Yudah seose gys mullagh creg Etam, as dooyrt ad rish Samson, Nagh vel fys ayd’s dy vel ny Philistinee reill harrin? cre shoh t’ou er n’yannoo rooin? As dooyrt eh roo, Myr ren adsyn rhym’s, myr shen ta mish er n’yannoo roosyn.

¹² As dooyrt ad rish, Ta shin er jeet sheese dy chiangley oo, dy vod shin oo y livrey gys laue ny Philistinee. As dooyrt Samson roo, Loo-jee dou nagh jean shiu hene tuittym orrym.

¹³ As loayr ad rish, gra, Cha jean mayd shen: agh nee mayd oo y chiangley dy shickyr, as livrey mayd oo gys y laue oc; agh dy firrinagh cha marr mayd oo: as chiangle ad eh lesh daa choyrd noa, as hug ad lhieu seose eh veih’n chreg.

¹⁴ As tra haink eh gys Lehi, dyllee ny Philistinee n’oï: as haink Spyrryd y Chiarn dy niartal er, as haink ny coyrdyn v’er e roihaghyn dy ve myr lieen losht lesh aile, as huitt ny geulaghyn veih e laueyn.

¹⁵ As hooar eh craue-keeill noa dy assyl, as ghow eh ny laue eh, as varr eh thousane dooinney lesh.

¹⁶ As dooyrt Samson, Lesh craue-keeill assyl, carnaneyn er carnaneyn, lesh craue-keeill assyl ta mee er varroo thousane dooinney.

¹⁷ As haink eh gy-kione, erreish da v’er ghra shoh, dy hilg eh yn chraue ass e laue, as denmys eh yn ynnyd shen Ramath-lehi.

¹⁸ As v’eh feer phaagh, as deïe eh er y Chiarn, as dooyrt eh, T’ou er choyrt yn varriaght vooar shoh ayns laue dty harvaant; as nish voym baase lesh paays, as tuittym ayns laueyn ny chymmyltee shoh?

¹⁹ Agh ren Jee fosley ’yannoo ayns yn ynnyd cheddin, as haink ushtey ass; as tra v’eh er n’iu, ghow eh cree reesht, as v’eh er ny niartaghey: shen-y-fa denmys eh yn ynnyd En-hakkore, ta ayns Lehi gys y laa jiu.

²⁰ As ren eh briwnys Israel rish lhing ny Philistinee, feed bleïn.