Briwnyn 14 - Yn Vible Casherick 1775 1819

CAB. XIV

¹ As hie Samson sheese gys Timnath, as honnick eh ben ayns Timnath jeh inneenyn ny Philistinee.

² As haink eh seose as dinsh eh da e ayr as e voir, as dooyrt eh, Ta mish er vakin ben ayns Timnath jeh inneenyn ny Philistinee: nish er-y-fa shen fow-jee dou ee son ben.

³ Eisht dooyrt e ayr as e voir rish, Nagh vel ben ry-gheddyn mastey inneenyn dty chynney, ny mastey ooilley my phobble, dy vel oo shirrey dy ghoaill dhyt ben jeh ny Philistinee chymmyltee? as dooyrt Samson rish e ayr, Fow dou ee, son s’laik lhiam ee dy mie.

⁴ Agh cha row fys ec e ayr ny e voir dy nee veih’n Chiarn ve, dy beagh shoh oyr streeu eddyr eh-hene as ny Philistinee: son ec y traa shen va reill ec ny Philistinee harrish Israel.

⁵ Eisht hie Samson, as e ayr, as e voir, sheese gys Timnath, as haink ad gys garaghyn-feeyney Timnath: as cur-my-ner, ren lion aeg garveigagh n’oï.

⁶ As haink Spyrryd y Chiarn dy niartal er; as raip eh eh myr raipagh eh mannan, as cha row veg echey ny laue: agh cha dinsh eh da e ayr ny e voir cre v’eh er n’yannoo.

⁷ As hie eh sheese dy loayrt rish y ven; as my-laik lesh Samson ee dy mie.

⁸ As lurg earish, hie eh dy ghoaill ee son ben, as hyndaa eh dy lhiattee dy yeeaghyn er convayrt y lion; as cur-my-ner, va swarm dy hellanyn as mill ayns convayrt yn lion.

⁹ As ghow eh jeh ayns e laueyn, as hie eh er y raad gee, as haink eh gys e ayr as e voir, as hug eh dauesyn, as ren ad gee: agh cha dinsh eh daue dy row eh er ghoaill y vill ass convayrt y lion.

¹⁰ As hie e ayr sheese gys y ven: as ren Samson bannish ayns shen; son shen myr va cliaghtey ny deiney aegey dy yannoo.

¹¹ As haink eh gy-kione, tra honnick ad eh, dy dug ad lhieu jeih deiney as feed dy ve son sheshaght da.

¹² As dooyrt Samson roo, Ver-yms magh raa-dorraghey: my oddys shiu dy jarroo bun y choyrt dou er cheu-sthie jeh shiaght laa yn vannish, as feddyn magh eh, eisht ver-yms diu jeih brelleenyn as feed, as jeih caghlaaghyn as feed dy gharmadyn;

¹³ Agh mannagh vod shiu, eisht ver shiu dooys jeih brelleenyn as feed, as jeih caghlaaghyn as feed dy gharmadyn. As dooyrt ad rish, Cur magh dty raa-dorraghey, dy vod mayd clashtyn eh.

¹⁴ As dooyrt eh roo, Ass yn eeder haink magh bee, as magh ass y fer lajer haink miljid. As cha voddagh ad ayns three laa cur bun er y raa-dorraghey.

¹⁵ As haink eh gy-kione er y chiaghtoo laa, dy dooyrt ad rish ben Samson, Jean dty heshey y chleayney, dy vod eh ginsh dooin yn raa-dorraghey, er-nonney nee mayd uss as thie dty ayrey y lostey lesh aile: nee dy nyn spooilley ta shiu er chuirrey shin? nagh nee shoh myr te?

¹⁶ As huitt ben Samson er keayney kiongoyrt rish, as dooyrt ee, She dwoaie t’ayd orrym, as cha nee graih: t’ou er choyrt magh raa-dorraghey roish cloan my phobble, as cha vel oo er hoilshaghey dooys eh. As dooyrt eh r’ee, Cur-my-ner, cha vel mee er n’insh eh da my ayr ny my voir, as nee dhyt’s insh-yms eh?

¹⁷ As cheayn ee kiongoyrt rish, rish shiaght laa ny banshey: as haink eh gy-kione er y chiaghtoo laa, dy dinsh eh jee, er-yn-oyr dy lhie ee dy chion er: as dinsh ish yn raa-dorraghey da cloan e pobble.

¹⁸ As dooyrt deiney yn ard-valley rish er yn chiaghtoo laa, my lhie yn ghrian, Cre ta ny s’miljey na’n mill? as cre ta ny s’troshey na’n lion? As dooyrt eh roo, Er-be dy ren shiuish traaue lesh my cholbagh, cha row shiu er gheddyn magh my raa-dorraghey.

¹⁹ As haink Spyrryd y Chiarn er, as hie eh sheese gys Ashkelon, as varr eh jeih deiney as feed jeu, as ghow eh yn spooilley oc, as hug eh caghlaaghyn garmad dauesyn hooar magh yn raa-dorraghey: as va farg er, as hie eh seose gys thie e ayrey.

²⁰ Agh va ben Samson er ny choyrt da e heshey, v’eh er ghoaill myr e charrey.