Briwnyn 12 - Yn Vible Casherick 1775 1819

CAB. XII

¹ As haggil deiney Ephraim cooidjagh, as hie ad lesh y twoaie, as dooyrt ad rish Jephthah, Cre’n-fa hie uss harrish dy chaggey noi cloan Ammon, as nagh deïe oo orrin dy gholl mayrt? nee mayd lostey dty hie ort lesh aile.

² As dooyrt Jephthah roo, Va aym’s as ec my phobble cooish mooar caggee rish cloan Ammon; as tra deïe mee erriu, cha ren shiu m’y livrey ass nyn laueyn.

³ As tra honnick mee nagh daink shiu dy chooney lhiam, hug mee my vioys ayns my laueyn, as hie mee harrish noi cloan Ammon, as ren y Chiarn ad y livrey fo my laueyn: cre’n-oyr eisht ta shiu er jeet seose yn laa jiu, dy chaggey m’oï?

⁴ Eisht haggil Jephthah cooidjagh ooilley deiney Ghilead, as ren ad caggey noi Ephraim: as woaill deiney Ghilead Ephraim, er-yn-oyr, dy dooyrt ad, Cha vel shiuish Gileaditeyn agh nyn scapailtee veih Ephraim mastey ny Ephraimiteyn, as mastey ny Manassiteyn.

⁵ As ghow ny Gileaditeyn aaghyn Yordan roish ny Ephraimiteyn: as ve myr shen, tra dooyrt ny Ephraimiteyn ren scapail, Lhig dou goll harrish, dy dooyrt deiney Ghilead rish, Nee Ephraimite oo? My yarragh eh, Cha nee;

⁶ Eisht dooyrt ad rish, Abbyr nish Shibboleth; as dooyrt eh Sibboleth: son cha daink e hengey lesh dy ockley eh dy kiart. Eisht ghow ad, as varr ad eh ee aaghyn Yordan; as huitt ec y traa shen jeh ny Ephraimiteyn, daa housane as da-eed.

⁷ As ren Jephthah briwnys Israel shey bleeaney: eisht hooar Jephthah yn Gileadite baase, as v’eh oanluckit ayns ard-valley Ghilead.

⁸ As ny lurg-syn ren Ibzam yn Beth-lehemite briwnys Israel.

⁹ As v’echey jeih mec as feed, as jeih inneenyn as feed, hug eh magh ayns poosey, as ghow eh stiagh jeih inneenyn as feed son mraane da e vec: as ren eh briwnys Israel shiaght bleeaney.

¹⁰ Eisht hooar Ibzam baase, as v’eh oanluckit ec Beth-lehem.

¹¹ As ny lurg-syn ren Elon yn Zebulonite briwnys Israel jeih bleeaney.

¹² As hooar Elon yn Zebulonite baase, as v’eh oanluckit ayns Aijalon ayns cheer Zebulun.

¹³ As ny lurg-syn ren Abdon mac Hillel yn Pirathonite briwnys Israel.

¹⁴ As v’echey da-eed mac, as jeih oe as feed, va markiagh er three-feed as jeih lhiynyn assyl: as ren eshyn briwnys Israel hoght bleeaney.

¹⁵ As hooar Abdon, mac Hillel yn Pirathonite baase, as v’eh oanluckit ayns Pirathon ayns cheer Ephraim, ayns cronk ny Amalekiteyn.