Briwnyn 11 - Yn Vible Casherick 1775 1819

CAB. XI

¹ Nish va Jephthah yn Gileadite ny ghooinney niartal caggee, agh v’eh mac oainjyr: as hooar Gilead Jephthah.

² As ren ben Ghilead gymmyrkey mec da; as tra daase ad seose, hyndaa ad magh Jephthah, as dooyrt ad rish, Cha vow uss eiraght ayns thie nyn ayrey, son mac ben joarree oo.

³ Eisht chossyn Jephthah roish veih e vraaraghyn, as chum eh ayns cheer Tob: as va deiney eddrym as wagaantee er nyn jaglym gys Jephthah, as hie ad magh mârish.

⁴ As haink eh gy-kione lurg earish, dy ren cloan Ammon caggey noi Israel.

⁵ As ve myr shen, tra ren cloan Ammon caggey noi Israel, dy jagh shanstyr Ghilead dy chur lhieu Jephthah veih cheer Tob.

⁶ As dooyrt ad rish Jephthah, Tar uss, as bee dty chaptan harrin, dy vod mayd caggey rish cloan Ammon.

⁷ As dooyrt Jephthah rish shanstyr Ghilead, Nagh row dwoaie eu orrym, as nagh deiyr shiu magh mee veih thie my ayrey? as vel shiu cheet hym’s nish tra ta shiu ayns nyn êgin?

⁸ As dooyrt shanstyr Ghilead rish Jephthah, Son yn oyr shoh, ta shin nish cheet hood’s, dy vod oo goll mârin dy chaggey noi cloan Ammon, as dy ve yn leeideilagh ain harrish ooilley cummaltee Ghilead.

⁹ As dooyrt Jephthah rish shanstyr Ghilead, My ver shiu lhieu mee thie reesht dy chaggey noi cloan Ammon, as dy jean y Chiarn ad y livrey fo my laue, nee mish vees nyn leeideilagh?

¹⁰ As dooyrt shanstyr Ghilead rish Jephthah, Ta’n Chiarn hene ny eanish eddyr shin, dy jean mayd mie yn choardail shoh.

¹¹ Eisht hie Jephthah marish shanstyr Ghilead, as ren yn pobble eh ny ard-chaptan harroo: as ren Jephthah fockley yn chonaant va eddyr ad fenish y Chiarn ayns Mizpeh.

¹² As hug Jephthah chaghteryn gys ree cloan Ammon, gra, Cre’n eïe t’ad orrym’s, dy vel oo er jeet dy chaggey m’oï ayns my heer hene?

¹³ As dreggyr ree cloan Ammon chaghteryn Jephthah, Er-yn-oyr dy ghow Israel my heer voym, tra haink ad seose veih Egypt, veih Arnon dy jarroo gys Jabbok, choud’s Jordan: nish er-y-fa shen, livrey hym reesht yn cheer shoh dy sheeoil.

¹⁴ As hug Jephthah chaghteryn reesht gys ree cloan Ammon,

¹⁵ As dooyrt eh rish, Myr shoh ta Jephthah gra, Cha ghow Israel ersooyl cheer Voab, ny cheer cloan Ammon:

¹⁶ Agh tra haink Israel seose veih Egypt, trooid yn aasagh gys y Faarkey Jiarg, as haink eh gys Kadesh;

¹⁷ Eisht hug Israel chaghteryn gys ree Edom, gra, Lhig dou, ta mee guee ort, goll trooid dty heer: agh cha jinnagh ree Edom geaishtagh rish. As myrgeddin hug ad fys gys ree Voab; agh dob eh: as duirree Israel ayns Kadesh.

¹⁸ Eisht hie ad trooid yn aasagh, as ghow ad combaase mygeayrt cheer Edom as cheer Voab, as haink ad stiagh er cheu-har jeh cheer Voab, as champ ad er cheu elley dy Arnon, agh cha daink ad stiagh er ardjyn Voab: son Arnon va cagliagh Voab.

¹⁹ As hug Israel chaghteryn gys Sihon ree ny Amoriteyn, va reill ayns Heshbon; as dooyrt Israel rish, Lhig dooin, ta shin guee ort, goll trooid dty heer gys my ynnyd ta roym.

²⁰ Agh cha hreishtagh Sihon er Israel dy gholl trooid ny ardjyn echey: son va Sihon er haglym cooidjagh ooilley e phobble, as champ ad ayns Jahaz, as ren eh caggey rish Israel.

²¹ As ren y Chiarn Jee Israel livrey Sihon as ooilley e phobble gys laue Israel, as hooar shin slane barriaght orroo: shoh myr hooar Israel cairys ayns ooilley cheer ny Amoriteyn, cummaltee yn cheer shen.

²² As ghow ad possession jeh ooilley ardjyn ny Amoriteyn, veih Arnon eer gys Jabbok, as veih’n aasagh choud’s Jordan.

²³ Shoh myr ta’n Chiarn Jee Israel er choyrt ass possession ny Amoriteyn roish e phobble Israel; as cre’n chairys t’ayd’s ayn eisht?

²⁴ Nagh jean uss freayll possession jeh shen ny ta Chemosh dty yee dy choyrt dhyt? Er yn aght cheddin quoi-erbee nee’n Chiarn y Jee ain geiyrt magh roïnyn, ad shen nee mayd y ghoaill dooin hene.

²⁵ As nish vel uss veg share na Balak mac Zippor, ree Voab? ren eshyn rieau streeu noi Israel, ny rieau caggey nyn ’oï,

²⁶ Ooilley’n traa va Israel cummal ayns Heshbon as e baljyn, as ayns Aroer as e baljyn, as ayns ooilley ny baljyn ta liorish ardjyn Arnon, son three cheead bleïn? cre’n-oyr er-y-fa shen nagh ren shiu ad y chlaimal rish choud dy hraa?

²⁷ Shen-y-fa cha vel mish er n’yannoo aggair erbee dhyt’s, agh t’ou uss jannoo aggair dooys liorish caggey m’oï: lhig da’n Chiarn, yn briw cairagh, briwnys eddyr cloan Israel as cloan Ammon er y laa t’ayn jiu.

²⁸ Ny-yeih cha dug ree cloan Ammon geill da chaghteraght Jephthah.

²⁹ Eisht haink spyrryd y Chiarn er Jephthah, as hie eh harrish Gilead as Manasseh, as hie eh er e hoshiaght harrish Mizpeh jeh Gilead, as veih Mizpeh jeh Gilead noi cloan Ammon.

³⁰ As ren Jephthah breearrey y yannoo gys y Chiarn, as dooyrt eh, My nee uss dy jarroo livrey cloan Ammon gys my laue’s,

³¹ Shen myr vees eh, cre-erbee hoshiaght hig magh my whail ass dorryssyn my hie’s, tra hig-ym reesht ayns shee veih cloan Ammon, dy bee shen dy shickyr er ny chasherickey gys y Chiarn, ny er ny hebbal son oural-losht.

³² Myr shen hie Jephthah harrish noi cloan Ammon dy chaggey roo; as ren y Chiarn ad y livrey gys e laueyn.

³³ As woaill eh ad veih Aroer derrey Minnith, eer feed ard-valley, as gys cheer-rea ny garaghyn-feeyney, lesh cragh feer dewil. Myr shoh va cloan Ammon er nyn goyrt fo-chosh liorish cloan Israel.

³⁴ As haink Jephthah gys e hie ec Mizpeh, as cur-my-ner, haink yn inneen echey magh ny whail, lesh greïnyn-kiaullee as daunsin; as v’ee e ynrycan lhiannoo, cha row cloan arragh echey.

³⁵ As haink eh gy-kione tra honnick eh ee, dy raip eh e eaddagh, as dooyrt eh, Aless, my inneen! t’ou er my injillaghey dy treih, as er hayrn seaghyn trome orrym: son ta mee er vosley my veeal ayns breearrey gys y Chiarn, as cha voddym goll n’oï.

³⁶ As dooyrt ee rish, My ayr, my t’ou uss er vosley dty veeal gys y Chiarn, jean rhym’s cordail rish dty vreearrey; son wheesh as dy vel y Chiarn er choyrt dhyt’s y varriaght er dty noidyn, eer er cloan Ammon.

³⁷ As dooyrt ee rish e ayr, Lhig da shoh ve jeant er my hon: Cur dou daa vee dy hraa, dy voddym goll noon as noal er ny sleityn, as dobberan stayd my voidynys, mish as my heshaghyn.

³⁸ As dooyrt eh, Immee royd: as hug eh ee ersooyl son daa vee; as hie ish marish e sheshaghyn, as ren ee dobberan stayd e moidynys er ny sleityn.

³⁹ As ec kione daa vee hyndaa ee gys e ayr, ren r’ee cordail rish e vreearrey: as cha bione jee dooinney. As ve cliaghtey ayns Israel,

⁴⁰ Dy jagh inneenyn Israel dy chooilley vleïn dy ghobberan marish inneen Jephthah yn Gileadite kiare laa ’sy vleïn.