Briwnyn 1 - Yn Vible Casherick 1775 1819

CAB. I

¹ Nish lurg baase Yoshua, haink eh gy-kione, dy ren cloan Israel shirrey coyrle jeh’n Chiarn, gra, Quoi hed seose hoshiaght er nyn son noi ny Canaaniteyn, dy chaggey?

² As dooyrt y Chiarn, Hed Judah seose: cur-my-ner, ta mish dy livrey yn cheer gys e laue.

³ As dooyrt Judah rish Simeon e vraar, Tar seose mârym gys my chronney, dy vod mayd caggey noi ny Canaaniteyn, as neem’s myrgeddin goll mayrt’s gys dty chronney’s. Myr shen hie Simeon mârish.

⁴ As hie Judah seose; as ren y Chiarn livrey ny Canaaniteyn as ny Perizziteyn gys nyn laueyn; as varr ad jeu ayns Bezek jeih thousane dooinney.

⁵ As haink ad seose rish Adoni-bezek ec Bezek; as ren ad caggey n’oï, as varr ad ny Canaaniteyn as ny Perizziteyn.

⁶ Agh chossyn Adoni-bezek roish: as deiyr ad er, as haare ad eh, as yiare ad jeh ordaagyn e laueyn, as ordaagyn e choshey.

⁷ As dooyrt Adoni-bezek, Three-feed as jeih reeaghyn, va nyn ordaagyn laue as coshey giarit jeu, ren teiy nyn mee fo my voayrd’s: myr ta mish er n’yannoo, myr shen ta Jee er my chooilleeney. As hug ad lhieu eh gys Jerusalem, as hooar eh baase ayns shen.

⁸ (Nish va cloan Yudah er chaggey noi Jerusalem, as er ghoaill eh, as er woalley eh lesh foyr y chliwe, as er hoiaghey yn ard-valley er aile.)

⁹ As ny lurg shen hie cloan Yudah sheese dy chaggey noi ny Canaaniteyn va cummal ayns y clieau, as ayns y jiass, as ayns y choan.

¹⁰ As hie Judah noi ny Canaaniteyn va cummal ayns Hebron, (nish yn ennym v’er Hebron roïe va Kirjath-arba,) as varr ad Sheshai, as Ahiman, as Talmai.

¹¹ As veih shen hie eh noi cummaltee Debir: (as yn ennym v’er Debir roïe va Kirjath-sepher:)

¹² As dooyrt Caleb, Eshyn woaillys Kirjath-sepher, as ghoys eh, dasyn ver-yms Achsah my inneen son ben.

¹³ As ren Othniel, mac Kenaz, braar saa Caleb goaill eh: as hug eh da Achsah e inneen son ben.

¹⁴ As haink eh gy-kione, tra v’ee er jeet huggey, dy dug ee coyrle da dy hirrey magher er e ayr, as harlheim ee jeh’n assyl; as dooyrt Caleb r’ee, Cre ta dty yeearree?

¹⁵ As dooyrt ee rish, Cur dty vannaght dou: son t’ou er choyrt dou thalloo chirrym jiass, cur dou myrgeddin farraneyn ushtey. As hug Caleb jee ny farraneyn heose as heese.

¹⁶ As hie cloan yn Kenite, ayr-’sy-leigh Voses, seose ass ard-valley ny biljyn-palm, marish cloan Yudah, gys faasagh Yudah, ta er cheu-jiass Arad: as hie ad as chum ad mastey’n pobble.

¹⁷ As hie Judah marish Simeon e vraar, as stroie ad ny Canaaniteyn va cummal ayns Zephath, as ren ad dy bollagh eh y choyrt mow: (as va ennym yn ard-valley Hormah.)

¹⁸ Ghow Judah myrgeddin Gaza as e ardjyn, as Askelon as e ardjyn, as Ekron as e ardjyn.

¹⁹ As va’n Chiarn marish Judah, as deiyr eh magh mooinjer-ny-ard, agh cha voddagh eh geiyrt magh cummaltee’n choan, er-yn-oyr dy row oc fainee yiarn.

²⁰ As hug ad Hebron da Caleb, myr va Moses er yialdyn: as deiyr eh veih shen three mec Anak.

²¹ Agh cha row cloan Venjamin dy slane er n’eiyrt magh ny Jebusiteyn va cummal ayns Jerusalem; agh ta ny Jebusiteyn cummal mastey cloan Venjamin ayns Jerusalem gys y laa jiu.

²² As hie cloan Yoseph myrgeddin seose noi Beth-el: as va’n Chiarn mâroo.

²³ As hug cloan Yoseph deiney dy scrial Beth-el: (nish va ennym Beth-el roïe Luz.)

²⁴ As honnick ny scrialtee dooinney cheet ass yn ard-valley; as dooyrt ad rish, Jeeagh dooin, ta shin guee ort, yn raad sassey dy chosney stiagh ’syn ard-valley, as bee mayd foayroil dhyt’s.

²⁵ As tra v’eh er yeeaghyn daue y raad, woaill ad yn ard-valley lesh foyr y chliwe; agh lhig ad y raad da’n dooinney as da ooilley e lught-thie.

²⁶ As hie yn dooinney gys cheer ny Hittiteyn, as hrog eh ard-valley, as denmys eh eh Luz: as shoh’n ennym t’er gys y laa jiu.

²⁷ Chamoo ren Manasseh geiyrt magh cummaltee Beth-shean as e baljyn, ny cummaltee Taanach as e baljyn, ny cummaltee Dor as e baljyn, ny cummaltee Ibleam as e baljyn, ny cummaltee Megiddo as e baljyn: agh va ny Canaaniteyn foast cummal ’sy cheer shen.

²⁸ As haink eh gy-kione, tra va Israel er ghoaill troshid, dy dug ad ny Canaaniteyn fo keesh, as cha deiyr ad magh ad dy bollagh.

²⁹ Chamoo ren Ephraim geiyrt magh ooilley ny Canaaniteyn va cummal ayns Gezer; agh va ny Canaaniteyn cummal ayns Gezer ny mast’ oc.

³⁰ Chamoo ren Zebulun dy slane geiyrt magh cummaltee Kitron, ny cummaltee Nahalol; agh va ny Canaaniteyn ny mast’ oc, as fo keesh.

³¹ Chamoo ren Asher geiyrt magh ooilley cummaltee Accho, ny cummaltee Zidon, ny Ahlab, ny Achzib, ny Helbah, ny Aphik, ny Rehob:

³² Agh ren ny Asheriteyn cummal mastey ny Canaaniteyn, as cummaltee’n cheer; son cha deiyr ad magh ad dy bollagh.

³³ Chamoo ren Naphtali dy slane geiyrt magh cummaltee Beth-shemesh, ny cummaltee Beth-anath; agh chum eh mastey ny Canaaniteyn, cummaltee yn cheer: agh va cummaltee Beth-shemesh as Beth-anath fo keesh.

³⁴ As deiyr ny Amoriteyn cloan Dan gys y clieau; son cha lhiggagh ad daue cummal ’sy choan:

³⁵ Agh va ny Amoriteyn foast cummal ayns cronk Heres ayns Aijalon er niart, as ayns Shaalbim: ny-yeih va laue yn eaghtyr ec cloan Yoseph, myr shen dy daink ad dy ve fo keesh.

³⁶ As va cagliagh ny Amoriteyn veih ard Akrabbim, veih’n chreg, as seose.