Ashlish 8 - Yn Vible Casherick 1775 1819

CAB. VIII

¹ As tra v’eh er vosley yn chiaghtoo seal, cha row fockle dy chlashtyn ayns niau mysh lieh oor.

² As honnick mee ny shiaght ainleyn va nyn shassoo kiongoyrt rish Jee; as dauesyn v’er ny choyrt shiaght cayrnyn.

³ As haink ainle elley as hass eh ec yn altar, as plate airh echey; as va er ny choyrt da mooarane dy oural-millish, dy jinnagh eh shen y hebbal marish padjeryn ooilley ny nooghyn er yn altar dy airh, va kiongoyrt rish y stoyl-reeoil.

⁴ As hie bree yn oural-millish marish padjeryn ny nooghyn, seose kiongoyrt rish Jee, veih laue yn ainle.

⁵ As ghow yn ainle y censer, as lhieen eh eh lesh aile veih’n altar, as hilg eh eh er y thalloo: as va coraaghyn [agglagh,] as taarnaghyn, as tendreilyn, as craa-hallooin.

⁶ As ren ny shiaght ainleyn, oc va ny shiaght cayrnyn, kiartaghey ad-hene dy heidey.

⁷ Heid y chied ainle, as haink claghyn-sniaghtee as aile lesh fuill ny chione, as v’ad er nyn gheayrtey er y thalloo: as va’n trass ayrn jeh ny biljyn losht, as va ooilley yn faiyr glass losht.

⁸ As heid yn nah ainle, as va myr dy beagh slieau mooar lostey lesh aile tilgit ’syn aarkey; as haink y trass ayrn jeh’n aarkey dy ve fuill:

⁹ As hooar yn trass ayrn jeh ny cretooryn va bio ayns yn aarkey, baase; as va’n trass ayrn jeh ny lhongyn er nyn stroie.

¹⁰ As heid y trass ainle, as huitt rollage vooar veih niau, lostey myr dy beagh eh lamp, as huitt eh er y trass ayrn jeh ny awinyn, as er farraneyn ny hushtaghyn:

¹¹ As ta ennym y rollage enmyssit Ullymar: as haink y trass ayrn jeh ny ushtaghyn dy ve myr ullymar; as hooar ymmodee sleih baase liorish ny ushtaghyn, er-yn-oyr dy row ad sharroo.

¹² As heid y chiarroo ainle, as va’n trass ayrn jeh’n ghrian fo dorraghys, as y trass ayrn jeh’n eayst, as y trass ayrn jeh ny rollageyn; ayns wheesh as dy row yn trass ayrn jeu fo dorraghys, as cha daink y laa rish son y trass ayrn jeh, as yn oie myrgeddin.

¹³ As yeeagh mee, as cheayll mee ainle getlagh trooid mean niau, gra lesh ard-choraa, Smerg, smerg, smerg da cummaltee ny hooirey, er coontey feiyr cayrnyn elley ny three ainleyn ta foast ry-hoi sheidey.