Arrane Solomon 8 - Yn Vible Casherick 1775 1819

CAB. VIII

¹ O dy beagh oo myr my vraar, ren jiole keeaghyn my voir; tra yoin oo mooie, yinnin oo y phaagey, as cha beagh foill dy gheddyn dou.

² Jeeaghin dhyt y raad, yinnin lhiam oo gys thie my vayrey, yinnagh mish y ynsaghey: yinnin’s dhyt jough feeyney spiceit lesh soo my phomegranate.

³ Veagh e laue chiare fo my chione, as veagh e laue yesh mygeayrt-y-moom.

⁴ Ta mee cur currym erriu, O inneenyn Yerusalem, nagh brish shiu cadley my ghraih, ny doostey eh derrey saillish hene.

⁵ Quoi ee shoh ta cheet seose veih’n aasagh, croymmey er e graih? fo’n billey-ooyl ren mee sooree ort, shen y raad v’ou giallit dou liorish dty voir, ayns shen v’ou nasht rhym lioreeish hug son y theihll oo.

⁶ Soie mish myr seal er dty chree, myr cowrey er dty roih: son ta graih lajer myr yn baase, ta eadaghey dewil myr yn oaie: ta’n ghuin echey myr smarageyn aile ta ceau chiass loshtee.

⁷ Cha jean thooillaghyn ushtey graih y vooghey, chamoo oddys ny tonnyn y vaih ee, my yinnagh dooinney ooilley e chooid-seihlt son graih, cha beagh yn soiagh sloo jeant jeh.

⁸ Ta shuyr veg ain, as cha vel keeaghyn urree, cre nee mayd son nyn shuyr, er y laa vees ee er ny hirrey ayns poosey?

⁹ My she voalley ee, trog mayd urree plaase dy argid: as my she dorrys ee, nee mayd ee y choodagh lesh buird cedar.

¹⁰ She voalley mee, as ta my cheeaghyn myr tooryn: eisht va mee ayns ny sooillyn echey, myr e charrey smoo ennoil.

¹¹ Va garey-feeyney ec Solomon ayns Baal-hamon, hoie eh yn garey-feeyney rish jiuleanyn; va dagh fer jeu son mayle y troar dy eeck thousane peesh dy argid.

¹² Ta’n garey-feeyney va lhiam’s kiongoyrt rhym: shegin da thousane ve ayd’s, O Solomon, as daa cheead ocsyn ta goaill kiarail jeh’n mess echey.

¹³ Uss ta cummal ayns ny garaghyn, ta dty heshaghyn geaishtagh rish dty choraa; lhig dooys myrgeddin clashtyn eh.

¹⁴ Jean siyr, my ghraih, as bee myr y vinjeig feïe, ny myr yn feeaïh aeg er sleityn ny spiceyn.