Arrane Solomon 7 - Yn Vible Casherick 1775 1819

CAB. VII

¹ Cre cha stoamey ta dty chassyn lesh braagyn, O inney reeoil! ta juntyn dty lheaystyn myr jewellyn, obbyr-lauee yn er-keirdee schleioil.

² Ta dty imleig myr saagh feeyney aalin as lane: ta dty volg myr dash dy churnaght, soit mygeayrt lesh lileeyn.

³ Ta dty cheeaghyn myr cubbyl dy feeaïhee aegey ta nyn lannoonyn.

⁴ Ta dty wannal myr toor ivory, dty hooillyn myr ny loghanyn eeastee ayns Heshbon, liorish giat Vath-rabbim: ta dty stroin myr toor Lebanon, ta jeeaghyn lesh Damascus.

⁵ Ta dty chione myr Carmel, as ta folt dty ching myr ny atteeyn gorrym-jiarg, t’ayns ny shamyryn reeoil.

⁶ O my ghraih, cre cha aalin as t’ou, cre cha eunyssagh ayns maynrys dty ghraih!

⁷ T’ou jeeragh thollee myr y villey-palm, as dty cheeaghyn myr dhossanyn palmey.

⁸ Dooyrt mee, Hem seose er y villey-palm, neem’s greimmey ny banglaneyn eck: bee dty cheeaghyn nish myrgeddin myr dhossanyn yn villey-feeyney, as soar millish dty ennal myr ooylyn,

⁹ As glare dty veeal myr y feeyn share, son my ghraih, ta goll sheese dy blaystal, cur er ny meillyn cadlagh dy loayrt.

¹⁰ Ta mish lesh my ghraih, as orrym’s ta e chree’s soit.

¹¹ Tar mârym, my ghraih, lhig dooin goll magh gys y vagher: lhig dooin aaght y ghoaill ayns ny baljyn-cheerey.

¹² Lhig dooin ve dy moghey er nyn gosh ayns ny garaghyn-feeyney, dy akin vel y billey-feeyney blaaghey, vel yn berrish-feeyney meiygh fosley, as ny pomegranateyn cur magh nyn mlaa: shen y raad yiow slane soylley my ghraih.

¹³ Ta ny mandrakeyn cur soar millish, as ayns nyn dashtaghyn ta messyn jeh dy chooilley ghooghys, shenn as noa, ta mee er hashtey dty chour’s, O my ghraih.