Arrane Solomon 6 - Yn Vible Casherick 1775 1819

CAB. VI

¹ Cre’n raad ta dty ghraih er ghoaill, O uss s’aalin ta mastey mraane? cre’n raad ta dty ghraih er hyndaa? dy vod mayd mayrt’s shirrey er e hon.

² Ta my ghraih er n’gholl sheese gys e gharey, gys ny imraghyn spice, dy ee mess ny garaghyn, as dy haglym lileeyn.

³ Ta mish lesh my ghraih, as my ghraih lhiam’s: t’eh beaghey mastey ny lileeyn.

⁴ T’ou uss aalin, O my ghraih, myr Tirzah, stoamey myr Jerusalem, gloyroil myr slane sollyssid rollageagh yn aer.

⁵ Chyndaa dty hooillyn orrym, dy vod ad my vaynrey: ta dty olt myr shioltane dy ghoair t’er ny akin veih Gilead.

⁶ Ta dty eeacklyn myr shioltane keyrragh erreish daue ve nieet, dagh unnane jeu breh lannoon, as cha vel unnane gennish nyn mastey.

⁷ Ta dty cheeillyn myr blaa yn phomegranate fo dty vreidyn.

⁸ Ta three-feed princess, as kiare-feed co-lhiabbagh, marish ymmodee moidynyn:

⁹ Agh she my chalmane aalin ta my ynrycan graih; t’eeish lhiannoo ynrycan e moir, ynrycan ennoil jeeish hug gys y theihll ee: honnick ny moidynyn ee, as vannee ad ee, ny princessyn neesht, as ny co-lhiabbee hug moylley jee.

¹⁰ Quoi eh shoh ta brishey magh myr y voghrey, gial myr yn eayst, sollys myr yn ghrian, as gloyroil myr slane sheshaght rollageagh yn aer?

¹¹ Hie mee sheese gys garey ny croyn, dy chur shilley er troar ny glionney, as dy yeeaghyn row yn billey-feeyney blaaghey, as ny pomegranateyn cheet er nyn doshiaght.

¹² ’Sy tullogh, hie my annym er e eiyrt’s, cha bieau as cha tappee as fainee Amminadib.

¹³ Chyndaa, chyndaa, O Shulamite chyndaa, chyndaa, dy vod mayd blâkey ort: cre hee-ys shiu ’sy Shulamite? myr cooidjaghey daa heshaght-chaggee.