Arrane Solomon 5 - Yn Vible Casherick 1775 1819

CAB. V

¹ Ta mee er jeet stiagh ayns my gharey, my huyr, my ven heshey, ta mee er haglym yn myrrh, marish ny spiceyn millish, ta mee er ee my chere-volley marish my vill, ta mee er iu my feeyn marish my vainney: ee-jee, O my chaarjyn, iu-jee, dy jarroo, iu-jee dy palchey, O my ghraihaltee.

² Ta mee saveenagh, agh ta my chree dooisht: she coraa my ghraih t’ayn ta cronkal, gra, Foshil dooys, my chree, my ghraih, my chalmane, my red ôney: son ta my chione fluigh lesh y druight, as folt my ching lesh bineyn ny hoie.

³ Ta mee er choyrt jee’m my gharmadyn, kys yioym ad moom? ta mee er niee my chassyn, kys nee’m ad y vroghey?

⁴ Hug my ghraih e laue stiagh er glass y dorrys, as va my chree seaghnit er e hon.

⁵ Dirree mee dy osley da my ghraih, as ren my laueyn shilley lesh myrrh er holtyn y ghlass, as my veïr lesh y myrrh s’costal.

⁶ Doshil mee da my ghraih, agh va my ghraih er n’immeeaght, as er n’gholl roish, hie e ghoan gys my annym: hir mee er e hon, agh cha dooar mee eh; deïe mee er, agh cha dreggyr eh mee.

⁷ Hooar ny arreyderyn mee myr v’ad goll mygeayrt yn ard-valley, woaill ad mee, as vroo ad mee; as ghow gard ny voallaghyn my vreid voym.

⁸ Ta mee cur currym erriu, O inneenyn Yerusalem, my veeitys shiu my ghraih, cre jir shiu rish; insh-jee da, dy vel mish ching ayns graih.

⁹ Cre t’ayns dty ghraih erskyn graih erbee elley, O uss s’aalin ta mastey mraane? vel dty ghraih’s wheesh shen share na dy chooilley ghraih elley, dy vel oo cur lheid y currym orrin?

¹⁰ Ta my ghraih’s gial as ruishagh, yn reih dooinney mastey jeih thousaneyn.

¹¹ Ta e chione myr yn airh share, ta folt e ching dossagh, as doo myr y feeagh.

¹² Ta ny sooillyn echey myr sooillyn calmane liorish awinyn ny ushtaghyn, myr nieet ayns bainney, as soit dy stoamey.

¹³ Ta ny keeillyn echey myr dash dy spiceyn, myr blaaghyn miljey: ta ny meillyn echey myr lileeyn, shilley myrrh millish breeoil.

¹⁴ Ta ny laueyn echey myr fainaghyn airh soit lesh beryl: ta e challin myr ivory sollys soit lesh sapphireyn.

¹⁵ Ta ny lurgaghyn echey myr pillaryn marble soit er laanyn dy airh ghlen, ta’n eddin echey myr Lebanon, thollee myr ny cedaryn.

¹⁶ Ta e veeal miljid hene: dy feer t’eh ooilley-cooidjagh aalin. She shoh my ghraih, as lheid shoh my charrey, O inneenyn Yerusalem.