Arrane Solomon 4 - Yn Vible Casherick 1775 1819

CAB. IV

¹ Cur-my-ner t’ou uss aalin, my ghraih, cur-my-ner t’ou uss aalin, ta sooillyn calmane ayd fo dty vreidyn; ta dty olt myr shioltane dy ghoair, ta fassagh er cronk Ghilead.

² Ta dty eeacklyn goll-rish shioltane glen loamrit erreish daue ve nieet: jeu shoh ta dagh unnane lesh lannoon, as cha vel unnane gennish ny mast’ oc.

³ Ta dty veillyn goll-rish snaie scarleod, as s’meeley ta dty ghlare; ta dty cheeillyn myr blaa yn phomegranate fo dty vreidyn.

⁴ Ta dty wannal goll-rish toor Ghavid troggit son thie armyn, soit magh lesh thousane buckler, ooilley scapeyn ny treanee.

⁵ Ta dty cheeaghyn goll-rish daa feeaïh aegey ta nyn lannoonyn, fassagh mastey ny lileeyn.

⁶ Derrey brishey’n laa, as skeayley ny bodjallyn, hem’s roym gys y charnane myrrhey, as gys y chronk frankincense.

⁷ T’ou ooilley aalin, my ghraih, cha vel cron erbee aynyd’s.

⁸ Tar mârym’s voish Lebanon, my ven-phoosee, mârym’s voish Lebanon: jeeagh sheese voish mullagh Amana, veih yrjid Shenir as Hermon, voish ooig ny lionyn, voish sleityn y lion spottagh.

⁹ T’ou er chleayney my chree, my ghraih, my gherjagh, lesh un shallid jeh dty hooillyn, lesh un chyndaa jeh dty wannal t’ou er ghoaill my chree.

¹⁰ Cre cha eunyssagh ta dty ghraih, my huyr, my ven veen! ta dty ghraih foddey erskyn y feeyn share, as soar millish dty ennal roish bree dy chooilley spice s’blaystal.

¹¹ Ta dty veillyn, O my ven veen, shilley myr kere-volley: ta bainney as mill fo dty hengey, ta soar millish dty gharmadyn myr soar Lebanon.

¹² Garey dooint ta my ghraih, my ven heshey, t’ee chibbyr glast, as moir y gheill sealit.

¹³ T’ou uss myr garey Phargys, soit magh lesh pomegranateyn, lesh ny messyn s’aalin, lesh camphire as spikenard.

¹⁴ Spikenard as saffron, calamus as cinnamon, marish dy chooilley ghooghys dy viljyn frankincense, myrrh as aloes, marish dy chooilley spice costal.

¹⁵ Farrane ny garaghyn, chibbyr dy ushtey bio, as strooanyn voish Lebanon.

¹⁶ Gow fea, O gheay-jiass, agh dooisht, O gheay-twoaie, as tar magh, sheid er my gharey dy vod ny spiceyn blaaghey: lhig da my ghraih cheet gys e gharey hene, as gee jeh ny messyn s’taitnyssagh.