Arrane Solomon 2 - Yn Vible Casherick 1775 1819

CAB. II

¹ She mish rose Sharon, as lilee ny coanyn.

² Myr lilee mastey drineyn, myr shen ta my ghraih’s mastey ny mraane aegey.

³ Myr yn billey-ooyl mastey biljyn ny keylley, myr shen ta my ghraih mastey ny deiney aegey. Hoie mee sheese fo’n scadoo echey lesh mooarane taitnys, as s’millish va e vess gys my vlass.

⁴ Hug eh lesh mee gys thie e chuirraghyn, as skeayl eh harrym cullee e ghraih.

⁵ Niartee mee lesh glassyreeyn miljey, jean mish y ooraghey lesh ooylyn: son ta mee ching ayns graih.

⁶ Ta e laue chiare fo my chione, as ta’n laue yesh echey dy my ghlassey.

⁷ Ta mee cur currym erriu, O shiuish inneenyn Yerusalem, liorish y taitnys t’eu ayns ny feeaïhee sleitagh as magheragh, nagh boir-jee my ghraih, as nagh doost-jee eh derrey saillish hene.

⁸ Coraa my ghraih’s! cur-my-ner t’eh cheet lheim er ny sleityn, cor-lheimyragh er ny croink.

⁹ Ta my ghraih myr feeaïh aalin aeg: cur-my-ner, t’eh shassoo cooyl yn voalley ain, t’eh jeeaghyn magh er yn uinniag, t’eh dy yeeaghyn eh-hene trooid y chlea.

¹⁰ Loayr my ghraih, as dooyrt eh rhym, Trog ort, my ghraih, my chooid s’aalin, as tar royd.

¹¹ Son cur-my-ner ta’n geurey ceaut, ta’n fliaghey harrish as ersooyl.

¹² Ta ny blaaghyn ry-akin er y thalloo, ta imbagh kiaulleeaght ny ushagyn er jeet, as ta bingys yn turtle er ny chlashtyn ’sy cheer ain.

¹³ Ta’n billey-figgagh gymmyrkey figgyn glassey, as ta ny biljyn-feeyney lesh nyn merrishyn meiygh ceau soar millish. Trog ort, my ghraih, my chooid s’aalin, as tar royd.

¹⁴ O my chalmane ta ayns tuill ny creggyn, fo skellooyn yn eaynee, lhig dou dty eddin y akin, lhig dou dty choraa y chlashtyn; son s’eunyssagh dty choraa, as stoamey dty eddin aalin.

¹⁵ Soie ribbey son ny shynnee, son ny quallianyn shynnagh ta mhilley ny biljyn-feeyney: son ta ny berrishyn meiygh cheet magh er ny biljyn-feeyney.

¹⁶ Ta my ghraih lhiam’s, as mish leshyn: t’eh beaghey mastey ny lileeyn.

¹⁷ Derrey’n vadran, as skeayley ny bodjallyn, chyndaa my ghraih, as bee uss myr y vinjeig feïe, ny’n feeaïh aeg er sleityn Vether.