Arrane Solomon 1 - Yn Vible Casherick 1775 1819

CAB. I

¹ Arrane dy arraneyn mychione Solomon.

² Lhig da mish y phaagey lesh paagyn e veeal: son ta dty ghraih ny s’miljey na feeyn.

³ Son blass dty ooilyn miljey, ta dty ennym myr ooil er ny gheayrtey; shen-y-fa ta ny moidynyn ayns graih rhyt.

⁴ Jean m’y chleayney, as roie mayd geiyrt ort: ta’n ree er choyrt lesh mee stiagh gys e hiamyryn, bee mayd gennal, as gowee mayd boggey aynyd’s, bee mayd ny s’aggindee er dty ghraih na er feeyn: shynney lesh sleih mie oo.

⁵ O shiuish inneenyn Yerusalem, ta mee dorraghey myr cabbaneyn Chedar, agh stoamey myr curtanyn Solomon.

⁶ Ny jeeagh-jee orrym’s, son dy vel my neeal dorraghey, as dy vel y ghrian er chaghlaa my vlaa: va cloan my vayrey neu-ghooghyssagh rhym, hug ad mee dy arrey ny garaghyn-feeyney, agh my gharey-feeyney hene cha dreill mee.

⁷ Insh dou, O uss ghraih m’annym, c’raad t’ou fassaghey, cre’n raad ta’n chioltane ayd’s goaill nyn aash bwoaillee vun-laa: son cre’n-fa veign myr shaghrynagh mastey shioltaneyn dty heshaghyn?

⁸ Mannagh nhione dhyt, O uss s’aalin ta mastey mraane, immee magh ayns cassanyn yn chioltane, as fassee dty vannanyn liorish ny bwaagyn bochill.

⁹ Ta mee er dty hoylaghey, O my ghraih, gys cabbil aalin ayns fainee Pharaoh.

¹⁰ Ta dty cheeillyn bwaagh soit magh lesh roaghyn dy yewellyn, dty wannal lesh boandaghyn airhey.

¹¹ Nee mayd er dty hon chemmallyn airhey lesh taggadyn argid.

¹² Choud’s ta’n ree soie ec yn voayrd, nee’n spikenard aym’s soar millish y choyrt magh.

¹³ Ta my ghraih dooys myr dhossan myrrh; lhie fud-ny-hoie ayns my oghrish.

¹⁴ Ta my ghraih dooys myr croau camphire ayns garaghyn-feeyney En-gedi.

¹⁵ Cur-my-ner, t’ou aalin my ghraih; cur-my-ner t’ou aalin, ta ayd sooillyn calmane.

¹⁶ Cur-my-ner, t’ou aalin, my ghraih, dy jarroo eunyssagh: ta’n lhiabbee ain myrgeddin geayney.

¹⁷ Beamyn yn thie ain jeh cedar, as ny jeaystyn juys.