Amos 8 - Yn Vible Casherick 1775 1819

CAB. VIII

¹ Shoh myr ta’n Chiarn Jee er hoilshaghey dooys, as cur-my-ner, baskad dy vessyn-souree.

² As dooyrt eh, Amos, cre t’ou fakin? As dooyrt mee, Baskad dy vessyn-souree. Eisht dooyrt y Chiarn rhym’s, Ta’n jerrey er jeet er my phobble Israel, cha lhiggym shaghey ny-sodjey.

³ As bee kiaulleeaght y chiamble er ny hyndaa gys yllaghey, ’sy laa shen, ta’n Chiarn Jee dy ghra; bee ymmodee kirp marroo ayns dy chooilley voayl, tilgee ad magh ad dy follit.

⁴ Eaisht-jee rish shoh, O shiuish ta sluggey seose ny ymmyrchee, as dy feer cur naardey boghtyn y thallooin,

⁵ Gra, Cuin vees [feailley] yn eayst-noa harrish, dy vod mayd arroo y chreck? as y doonaght ec kione, dy gholl dy vargey lesh curnaght, jannoo yn ephah beg, as yn shekel mooar, as caghlaa ny meihaghyn ayns molteyrys?

⁶ Dy vod mayd kionnaghey ny boghtyn son argid, as ny ymmyrchee son piyr vraag; dy jarroo as creck jerrey yn churnaght?

⁷ Ta’n Chiarn er vreearrey liorish ooashley Yacob, Son shickyrys cha jarrood-ym dy bragh veg jeh ny obbraghyn oc.

⁸ Nagh bee yn thalloo er-creau son shoh? as dy chooilley unnane dobberan ta cummal ayn? as nee eh gatt seose dy slane myr thooilley; as bee eh lhieent harrish, as er ny vaih myr liorish awin Egypt.

⁹ As hig eh gy-kione ’sy laa shen, ta’n Chiarn Jee dy ghra, dy der-ym er y ghrian dy lhie ec y vun-laa, as nee’m y thalloo dorraghey ’sy laa hollys.

¹⁰ As chyndaa-ym ny feaillaghyn eu gys dobberan, as ooilley ny arraneyn eu gys keayney, as ver-ym aanrit-sack er dy chooilley ghreeym, as meaylid er dy chooilley chione: as ver-ym er dy ve myr yn dobberan son ynrycan mac, as yn jerrey echey myr laa doogh.

¹¹ Cur-my-ner, ta ny laghyn cheet, ta’n Chiarn Jee dy ghra, dy der-ym genney ’sy cheer, cha nee genney arran ny laccal ushtey, agh genney clashtyn goan y Chiarn.

¹² As nee ad rouail veih keayn gy keayn, as veih yn twoaie eer gys y shiar, roie-ee ad noon as noal dy hirrey goo yn Chiarn, as cha vow ad eh.

¹³ ’Sy laa shen nee ny moidynyn aalin, as ny deiney aegey goll neeal lesh paays.

¹⁴ Adsyn ta breearrey liorish peccah Samaria, as gra, Ta dty Yee’s bio, O Dan, as ta bioys ayns jee-jalloo Veer-sheba; dy feer, nee ad tuittym, as cha n’irree ad dy bragh arragh.