Amos 5 - Yn Vible Casherick 1775 1819

CAB. V

¹ Eaisht-jee rish yn goo shoh, ta mee goaill seose noi eu, eer dobberan hene, O hie Israel.

² Ta moidyn Israel er duittym, cha n’irree ee arragh: t’ee treigit er e thalloo hene, cha vel unnane dy hroggal seose ee.

³ Son shoh myr ta’n Chiarn Jee dy ghra, Jeh yn ard-valley hie magh ny housane, cha bee faagit agh keead, as jeh shen hie magh keead, cha bee faagit agh jeih da thie Israel.

⁴ Son shoh myr ta’n Chiarn dy ghra rish thie Israel, Shir-jee hym’s, as bee shiu bio.

⁵ As ny shir-jee gys Beth-el, chamoo gow-jee stiagh ayns Gilgal, as ny immee-jee gys Beer-sheba: son hed Gilgal son shickyrys ayns cappeeys, as hed Beth-el naardey.

⁶ Shir-jee gys y Chiarn, as bee shiu bio, er-aggle dy brish eh magh myr aile ayns thie Yoseph, as stroie eh, as nagh bee unnane erbee dy vooghey eh ayns Beth-el.

⁷ Shiuish ta chyndaa briwnys gys ullymar, as jiooldey rish cairys ayns y theihll,

⁸ Shir-jee huggeysyn ta jannoo ny shiaght rollageyn, as Orion, as chyndaa scadoo yn vaaish gys soilshey yn voghrey, as yn laa gys dorraghys yn oie: ta geamagh er ushtaghyn ny marrey, as deayrtey magh ad er eaghtyr ny hooirey, yn Chiarn yn ennym echey:

⁹ Ta niartaghey yn tranlaasit noi yn tranlaasagh: myr shen dy jig yn tranlaasit noi yn chashtal.

¹⁰ T’ad cur feoh dasyn, ta cur oghsan ’sy yiat, as dwoaie oc ersyn, ta loayrt dy ynrick.

¹¹ Son wheesh, er-y-fa shen, as dy vel shiu stampey fo-chosh yn voght, as goaill voish erraghyn dy churnaght; ta shiu er droggal thieyn dy chlaghyn cummit, agh cha jean shiu cummal ayndoo: ta shiu er hoiaghey magh garaghyn-feeyney eunyssagh, agh cha n’iu shiu jeh’n feeyn oc.

¹² Son shione dooys nyn ymmodee loghtyn as earroo nyn ard-pheccaghyn: t’ad seaghney yn vooinjer chairal, t’ad goaill leagh, as cassey cooish chairal y voght ’sy yiat.

¹³ Shen-y-fa bee yn dooinney creeney ny host ayns lheid y traa, son s’olk yn traa te.

¹⁴ Eiyr-jee er y vie, as cha nee er drogh raaidyn, dy vod shiu ve beayn: as myr shen bee yn Chiarn, Jee ny flaunyssee, mêriu, myr ta shiu er yeearree.

¹⁵ Bee-jee dwoaiagh er yn olk, as aggindagh er y vie, as jean-jee briwnys y niartaghey ayns y yiat: foddee dy bee yn Chiarn Jee ny flaunyssee, graysoil da fooilliagh Yoseph.

¹⁶ Shen-y-fa, myr shoh ta’n Chiarn, Jee ny flaunyssee, yn Chiarn dy ghra, Bee dobberan ayns ooilley ny straïdyn, as nee ad gra ayns ooilley ny raaidyn mooarey, Ah treih, treih: as nee ad geamagh er yn eirinnagh gys dobberan, as ny bardoonee schleioil gys keayney.

¹⁷ As ayns dy chooilley gharey-feeyney vees coe: son hem dty hrooid’s, ta’n Chiarn dy ghra.

¹⁸ Smerg diuish ta geearree laa yn Chiarn! cre’n vondeish te diu? ta laa yn Chiarn dorraghys, as cha nee soilshey.

¹⁹ Myr dooinney ta chea veih lion, as meeiteil muc-awin: ny goll stiagh gys e hie, as lhie e laue er y voalley, as ard-nieu dy lhottey eh.

²⁰ Nagh bee laa yn Chiarn dorraghys, as cha nee soilshey? eer dorraghys hene, gyn failleish dy hoilshey?

²¹ Ta ny laghyn feailley eu dwoaiagh as feohdagh dou, chamoo goym taitnys ayns bree nyn jaglym casherick.

²² Ga dy vel shiu chebbal dooys ourallyn-losht, as nyn ourallyn-arran, cha jean-ym goaill roo: chamoo neem’s soiaghey jeh ourallyn-shee nyn maase roauyrey.

²³ Ersooyl voym lesh kiaull dty arraneyn, son cha n’eaisht-ym rish bingys dty violyn.

²⁴ Agh lhig da briwnys roie sheese myr ushtaghyn, as cairys myr thooilley niartal.

²⁵ Vel shiu er hebbal dooys ourallyn as chebballyn ’syn aasagh, son da-eed bleïn, O hie Israel?

²⁶ Agh ta shiu er n’ymmyrkey cabbane nyn Moloch as Chiun, ny jallooyn eu, rollage yn jee eu, ren shiu diu hene.

²⁷ Shen-y-fa, ver-ym erriu goll ayns cappeeys er cheu elley jeh Damascus, ta’n Chiarn dy ghra, ta’n ennym echey, Jee ny flaunyssee.