2 Samuel 9 - Yn Vible Casherick 1775 1819

CAB. IX

¹ As dooyrt David, Vel foast veg er-mayrn jeh thie Saul, dy voddym kenjallys y yeeaghyn da er graih Yonathan?

² As va sharvaant jeh thie Saul enmyssit Ziba: as tra v’ad er n’eamagh er gys David, dooyrt yn ree rish, Nee uss Ziba? As dreggyr eh, Dty harvaant eh.

³ As dooyrt y ree, Nagh vel foast veg er-mayrn jeh thie Saul, dy voddym kenjallys Yee y yeeaghyn da? As dooyrt Ziba rish y ree, Ta mac foast ec Jonathan, ta baccagh.

⁴ As dooyrt y ree rish, Cre vel eh? As dooyrt Ziba rish y ree, Cur-my-ner, t’eh ayns thie Machir mac Ammiel, ayns Lodebar.

⁵ Eisht hug ree David fys, as hug ad lhieu eh veih thie Machir mac Ammiel, veih Lodebar.

⁶ Nish tra va Mephibosheth, mac Yonathan, mac Saul, er jeet gys David, huitt eh er e eddin, as ren eh biallys. As dooyrt David, Mephibosheth! As dreggyr eh, Cur-my-ner dty harvaant.

⁷ As dooyrt David rish, Ny bee aggle ort: son neem’s dy firrinagh aigney-mie y yeeaghyn dhyt er graih dty ayr Jonathan, as ver-yms oo reesht ayns eiraght Saul dt’ayr; as bee oo my ghoaldagh kinjagh ec my voayrd hene.

⁸ As chroym eh eh-hene, as dooyrt eh, Cre ta dty harvaant, dy jinnagh oo jeeaghyn orrym’s nagh vel veg share na moddey marroo?

⁹ Eisht deïe y ree er Ziba sharvaant Saul, as dooyrt eh rish, Ta mish er choyrt da mac dty vainshtyr ooilley ny ta bentyn da Saul, as da ooilley e hie.

¹⁰ Nee uss er-y-fa shen, as dty vec, as dty harvaantyn, laboragh y thalloo da, as ver oo lhiat stiagh ny messyn da, dy vod beaghey ve ec mac dty vainshtyr dy ghoaill: agh nee Mephibosheth mac dty vainshtyr dy kinjagh gee ec my voayrd hene. Nish v’ec Ziba, queig mec jeig, as feed sharvaant.

¹¹ Eisht dooyrt Ziba rish y ree, Cordail rish ooilley ny ta my hiarn y ree er choyrt er currym da e harvaant, myr shen nee dty harvaant. Er son Mephibosheth, dooyrt y ree, nee eh gee ec my voayrd hene, myr fer jeh mec y ree.

¹² As va mac aeg ec Mephibosheth, va’n ennym echey Michal. As va slane lught-thie Ziba sharvaantyn da Mephibosheth.

¹³ Shoh myr haink Mephibosheth dy chummal ayns Jerusalem: son d’ee eh dy kinjagh ec boayrd y ree; as v’eh baccagh er e ghaa chass.