2 Samuel 8 - Yn Vible Casherick 1775 1819

CAB. VIII

¹ As lurg shoh haink eh gy-kione, dy woaill David ny Philistinee, as hug eh ad fo-chosh: as ghow David Metheg-ammah ass laue ny Philistinee.

² As woaill eh Moab, as howse eh yn cheer oc lesh line, lhieggal ny ard-valjyn gys y thalloo: eer lesh daa line ren eh ad y rheynn son baase, as lesh un line slane son bioys: as shoh myr haink ny Moabiteyn dy ve fo reill Ghavid, as v’ad fo keesh.

³ As woaill David myrgeddin Hadadezer mac Rehob, ree Zobah, myr hie eh dy hickyraghey e reeriaght ec awin Euphrates.

⁴ As ghow David veihsyn thousane fainagh, as shiaght thousane markee, as feed thousane coshee: as yiare David feh-yskid ooilley ny cabbil fainee, agh haue eh keead jeu son whilleen fainagh.

⁵ As tra haink Syrianee Ghamascus dy chooney lesh Hadadezer ree Zobah, varr David jeh ny Syrianee daa housane as feed dy gheiney.

⁶ Eisht hug David garrisonyn ayns Syria jeh Damascus: as haink ny Syrianee dy ve fo reill Ghavid, as v’ad fo keesh. As ren y Chiarn David y choadey raad erbee dy jagh eh.

⁷ As ghow David ny scapeyn airhey v’er deiney Hadadezer, as hug eh lesh ad gys Jerusalem.

⁸ As veih Betah, as veih Berothai, ard-valjyn Hadadezer, ghow David palchey erskyn towse dy phrash.

⁹ Tra cheayll Toi ree Hamath dy row David er woalley ooilley sheshaght-caggee Hadadezer,

¹⁰ Eisht hug Toi Joram e vac gys ree David, lesh bea as slaynt huggey, as dy ghoaill boggey mârish, son dy row eh er chaggey noi Hadadezer, as er varroo eh: (son va caggaghyn ec Hadadezer rish Toi:) as hug Joram lesh mârish siyn argid, as siyn airh, as siyn prashey:

¹¹ Ad shoh ren David neesht y chasherickey da’n Chiarn, marish yn argid as yn airh v’eh er chasherickey veih dy chooilley ashoon v’eh er gheddyn y varriaght orroo;

¹² Veih Syria, as veih Moab, as veih cloan Ammon, as veih ny Philistinee, as veih Amalek, as veih spooilley Hadadezer mac Rehob, ree Zobah.

¹³ As hooar David ard-ghoo da hene, tra hyndaa eh veih stroie hoght thousaneyn jeig jeh ny Syrianee ayns y choan-sollan.

¹⁴ As hug eh garrisonyn ayns Edom; trooid magh ooilley Edom hoie eh ad: as haink ooilley cummaltee Edom dy ve fo keesh da David. As ren y Chiarn David y choadey raad erbee dy jagh eh.

¹⁵ As ren David reill harrish ooilley Israel, as ren David shirveish briwnys as cairys er ooilley e phobble.

¹⁶ As va Joab mac Zeruiah harrish y cheshaght-chaggee; as va Jehoshaphat mac Ahilud ard-chleragh ny lioaryn;

¹⁷ As Zadok mac Ahitub, as Ahimelech mac Abiathar, va ny saggyrtyn; as Seraiah va’n scrudeyr;

¹⁸ As Benaiah mac Jehoiada va harrish ny Cherethiteyn as ny Pelethiteyn; as va mec Ghavid ny ard-reiltee.