2 Samuel 6 - Yn Vible Casherick 1775 1819

CAB. VI

¹ Lurg shoh, ren David chaglym cooidjagh ooilley deiney reiht Israel, jeih thousaneyn as feed.

² As hrog David er, as hie eh lesh ooilley’n pobble va mârish veih Baale ayns Judah, dy choyrt lhieu seose veih shen arg Yee, kiongoyrt rish t’ad geamagh er ennym y Chiarn dy heshaght-flaunyss, ta cummal eddyr ny Cherubim.

³ As hoie ad arg Yee er cart noa, as hug ad lhieu eh ass thie Abinadab v’ayns Gibeah: as Uzza as Ahio, mec Abinadab, deiyr y chart noa.

⁴ As hug ad lhieu eh ass thie Abinadab, v’ayns Gibeah, goll marish arg Yee; as jimmee Ahio roish yn arg.

⁵ As chloie David as ooilley thie Israel fenish y Chiarn, er dy chooilley horch dy ghreïnyn-kiaullee jeant dy uys, er claasaghyn as psaltereeyn, as er timbrelyn, as er cornettyn, as er cymballyn.

⁶ As tra rosh ad gys laare-vooie Nachon, heeyn Uzzah magh e laue gys arg Yee, as ghow eh greme er, son ve leaystey fo ny dew.

⁷ As va corree’n Chiarn er ny vrasnaghey noi Uzzah, as woaill Jee eh ayns shen son e ghaanys, as ayns shen hooar eh baase, liorish arg Yee.

⁸ As va David seaghnit, dy row corree’n Chiarn er vrishey magh er Uzzah: as denmys eh yn ynnyd Perez-uzzah, gys y laa t’ayn jiu.

⁹ As va aggle er David roish y Chiarn yn laa shen, as dooyrt eh, Cre’n aght hig arg yn Chiarn hym’s?

¹⁰ Myr shoh cha jinnagh David lesh arg y Chiarn gys ard-valley Ghavid: agh hie David dy lhiattee lesh gys thie Obed-edom yn Gittite.

¹¹ As va arg y Chiarn freilt ayns thie Obed-edom yn Gittite three meeaghyn: as vannee’n Chiarn Obed-edom, as ooilley lught e hie.

¹² As ve er n’insh da ree David, gra, Ta’n Chiarn er vannaghey thie Obed-edom, as ooilley ny va bentyn da, er coontey arg Yee. Myr shen hie David as hug eh lesh arg Yee seose, veih thie Obed-edom, gys ard-valley Ghavid, lesh ard-voggey.

¹³ As myr shen ve, tra v’adsyn va gymmyrkey arg y Chiarn, er n’gholl shey kesmadyn, dy heb eh dew as beiyn roauyrey ayns oural.

¹⁴ As ren David daunsin fenish y Chiarn lesh ooilley e niart, as va David coamrit lesh ephod aanrit.

¹⁵ Myr shoh hug David as ooilley thie Israel lhieu seose arg y Chiarn, lesh kiaulleeaght as lesh feiyr y trumpet.

¹⁶ As myr haink arg y Chiarn stiagh ayns ard-valley Ghavid, yeeagh Michal inneen Saul trooid uinniag, as honnick ee ree David lheimyragh as daunsin fenish y Chiarn, as hoie ee beg jeh ayns e cree.

¹⁷ As hug ad lhieu arg y Chiarn stiagh, as hoie ad eh ayns e ynnyd, ayns mean y chabbane-agglish va David er hroggal er y hon: as heb David ourallyn-losht as ourallyn-shee fenish y Chiarn.

¹⁸ As cha leah’s va David erreish chebbal ourallyn-losht as ourallyn-shee, vannee eh yn pobble ayns ennym y Chiarn dy heshaght-flaunyss.

¹⁹ As rheynn eh er ooilley’n pobble, eer er slane sheshaght Israel, chammah mraane as deiney, da dagh unnane bwilleen arran, as peesh vie d’eill, as cappan feeyney: myr shen hie ooilley’n pobble rhymboo, dagh fer gys e hie hene.

²⁰ Eisht hyndaa David dy vannaghey lught e hie: as haink Michal inneen Saul magh quail David, as dooyrt ee, Cre cha gloyroil va ree Israel jiu, yeeagh eh hene rooisht jiu ayns fakin inneenyn-veyl e harvaantyn, myr ta’n fer gyn-nearey roostey eh hene!

²¹ As dooyrt David rish Michal, Ve fenish y Chiarn, ren mish y reih roish dt’ayr, as roish ooilley e hie, dy phointeil mish my er-reill harrish pobble y Chiarn, harrish Israel: shen-y-fa neem’s cloie kiongoyrt rish y Chiarn.

²² As nee’m foast ny sloo na shoh y hoiaghey jee’m pene, as bee’m injil ayns my hooillyn hene: as liorish ny sharvaantyn, lhieu t’ou er my oltooaney, beem’s er my ooashlaghey.

²³ Shen-y-fa, cha row lhiannoo ec Michal inneen Saul, choud’s v’ee bio.