2 Samuel 5 - Yn Vible Casherick 1775 1819

CAB. V

¹ Eisht haink ooilley tribeyn Israel gys David ec Hebron, as dooyrt ad, Cur-my-ner, ta shinyn dty chraue as dt’eill.

² Myrgeddin roish nish, tra va Saul ny ree harrin, uss va ard-leeideilagh Israel: as dooyrt y Chiarn rhyt’s, Bee uss bochilley er my phobble Israel, as bee uss dty ard-chaptan harrish Israel.

³ Myr shoh haink ooilley shanstyr Israel stiagh gys y ree ec Hebron; as ren ree David conaant roo ayns Hebron fenish y Chiarn: as ren ad David y ooilaghey ny ree harrish Israel.

⁴ Va David jeih bleeaney as feed dy eash tra ren eh toshiaght dy reill, as ren eh reill da-eed bleïn.

⁵ Ayns Hebron ren eh reill harrish Judah shiaght bleeaney as shey meeaghyn; as ayns Jerusalem ren eh reill three bleeaney jeig as feed harrish ooilley Israel as Judah.

⁶ As hie’n ree as e gheiney seose gys Jerusalem noi ny Jebusiteyn: as dooyrt cummaltee’n cheer rish David, Cha jig oo stiagh ayns shoh, son nee ny doail as ny baccee uss y reayll magh, gra, Cha jig oo stiagh ayns shoh.

⁷ Ny-yeih ghow David cashtal lajer Zion: ta’n boayl cheddin ard-valley Ghavid.

⁸ As dooyrt David er y laa shen, Quoi-erbee chosnys stiagh er ny gutteryn-ushtey, as woaillys ny Jebusiteyn, as ny baccee, as ny doail, ta dwoaie oc er annym Ghavid, bee eshyn ny ard-chaptan. Shen-y-fa te oc myr raa, Cre dooyrt ny doail as ny baccee rish [David]? Cha vow eh stiagh ’sy voayl shoh.

⁹ Myr shoh ren David cummal ’sy chashtal, as ren eh genmys eh Ard-valley Ghavid: as hrog David ooilley mygeayrt, veih Millo as er cheu-sthie jeh.

¹⁰ As hie David er e hoshiaght, as haink eh lesh dy mie; as va’n Chiarn Jee dy heshaght-flaunyss mârish.

¹¹ As hug Hiram ree Tyre chaghteryn gys David, as biljyn-cedar, as seyir, as masoonee; as hrog ad thie da David.

¹² As hoig David dy row’n Chiarn er n’yannoo eh ny ree harrish Israel, as dy row eh er niartaghey e reeriaght er graih e phobble Israel.

¹³ As ghow David huggey t’ooilley co-lhiabbee, dy vraane ass Jerusalem, erreish da v’er jeet veih Hebron; as va t’ooilley mec as inneenyn ruggit da David.

¹⁴ As shoh ny enmyn oc va ruggit da ayns Jerusalem: Shammua, as Shobab, as Nathan, as Solomon,

¹⁵ Ibhar myrgeddin, as Elishua, as Nepheg, as Japhiah,

¹⁶ As Elishama, as Eliada, as Eliphalet.

¹⁷ Agh tra cheayll ny Philistinee dy row ad er n’ooilaghey David ny ree harrish Israel, haink ooilley ny Philistinee seose noi David; as cheayll David jeh, as hie eh sheese gys y chashtal lajer.

¹⁸ Haink ny Philistinee myrgeddin, as skeayl ad ad-hene ayns coan Rephaim.

¹⁹ As hir David coyrle jeh’n Chiarn, gra, Jem seose noi ny Philistinee? jean oo ad y livrey gys my laue? As dooyrt y Chiarn rish David, Gow seose; son neem’s son shickyrys ny Philistinee y livrey gys dty laue.

²⁰ As haink David gys Baal-perazim, as woaill David ad ayns shen, as dooyrt eh, Ta’n Chiarn er vrishey magh er my noidyn kiongoyrt rhym, myr brishey magh ushtaghyn. Shen-y-fa denmys eh yn ynnyd shen Baal-perazim.

²¹ As ayns shen daag ad ny jallooyn oc, as losht David as e gheiney ad.

²² As haink ny Philistinee seose reesht, as skeayl ad ad-hene ayns coan Rephaim.

²³ As tra va David er hirrey coyrle jeh’n Chiarn, dooyrt eh, Cha jed oo seose; agh gow combaase nyn yeï, as tar stiagh er y chooyl oc, liorish ny biljyn-mulberry.

²⁴ As tra chlinnys oo feiyr mastey ny biljyn-mulberry myr sheean sleih er march, dy jean oo eisht gleashagh oo-hene dy gastey: son eisht ta’n Chiarn goll magh royd, dy woalley sheshaght ny Philistinee.

²⁵ As myr shen ren David, myr va’n Chiarn er chur roish; as woaill eh ny Philistinee veih Geba derrey Gazer.