2 Samuel 4 - Yn Vible Casherick 1775 1819

CAB. IV

¹ As tra cheayll mac Saul dy row Abner marroo ayns Hebron, va ny laueyn echey moal, as va ooilley ny Israeliteyn seaghnit.

² As v’ec mac Saul daa ghooinney va captanyn er sheshaghtyn-caggee; va ennym y derrey yeh Baanah, as ennym y jeh elley Rechab, mec da Rimmon ny Veerothite, jeh cloan Venjamin: (son va Beeroth myrgeddin bentyn gys Benjamin:

³ As chossyn ny Beerothiteyn gys Gittaim, as ren ad cummal ayn derrey’n laa jiu.)

⁴ As v’ec Jonathan, mac Saul, mac va baccagh, as v’eh queig bleeaney d’eash tra haink naightyn jeh Saul as Jonathan veih Jezreel, as hrog e voandyr lh’ee eh, as chossyn ee rhymbee: as haink eh gy-kione myr v’ee ayns rouyr siyr dy chosney ersooyl, dy dooar eh lhieggey ren baccagh jeh. As va’n ennym echey Mephibosheth.

⁵ As hie Rechab as Baanah, mec Rimmon yn Beerothite, as haink ad mysh chiass y laa gys thie Ish-bosheth, va ny lhie er lhiabbee ec y vun-laa.

⁶ As hie ad stiagh ’sy thie, myr dy beagh ad mysh cur lhieu curnagh, as woaill ad eh fo’n wheiggoo asney: as chossyn Rechab as Baanah e vraar ersooyl.

⁷ Son tra haink ad stiagh ’sy thie, v’eh ny lhie er e lhiabbee ayns e hiamyr: as woaill ad as varr ad eh, as yiare ad yn kione jeh, as hug ad lhieu eh, as chossyn ad ersooyl raad yn aasagh fud-ny-hoie.

⁸ As hug ad lhieu kione Ish-bosheth gys David ec Hebron, as dooyrt ad rish y ree, Jeeagh shoh dhyt kione Ish-bosheth mac Saul, dty noid, va shirrey dty vioys; as ta’n Chiarn er y laa shoh er n’ghoaill cooilleeney ayns lieh my hiarn y ree er Saul as e luight.

⁹ As dreggyr David Rechab as Baanah e vraar, mec Rimmon yn Beerothite, as dooyrt eh roo, Myr ta’n Chiarn bio, t’er livrey m’annym veih dy chooilley arkys,

¹⁰ Tra dinsh fer dooys, gra, Cur-my-ner, ta Saul marroo, (smooinaghtyn dy row eh cheet lesh naightyn mie,) ghow mish greme er, as varr ayns Ziklag eshyn va smooinaghtyn dy gheddyn leagh son e skeeal.

¹¹ Cre-woad smoo, tra ta drogh gheiney er varroo dooinney gyn-loght ayns e hie hene, er e lhiabbee? nagh goyms er-y-fa shen nish cooilleeney erriuish son yn uill echey, as shiuish y yiarey jeh veih’n thalloo?

¹² As doardee David e gheiney aegey dy varroo ad; as yiare ad jeu ny laueyn as ny cassyn oc, as hrogh ad seose ad erskyn y loghan ayns Hebron. Agh ghow ad kione Ish-bosheth, as doanluck ad eh ayns oaie Abner ayns Hebron.