2 Samuel 3 - Yn Vible Casherick 1775 1819

CAB. III

¹ Nish son earish foddey va caggey eddyr thie Saul as thie Ghavid: agh daase David ny s’troshey as ny s’troshey, as lheïe thie Saul ny s’lhag as ny s’lhag.

² As da David va mec ruggit ayns Hebron: as va’n fer by-hinney Amnon, rish Ahinoam yn Jezreelite;

³ As yn nah er Chileab, rish Abigail va ben Nabal yn Carmelite; as yn trass Absalom, mac Maacah inneen Talmai ree Yeshur:

⁴ As y chiarroo Adonijah, mac Haggith; as y wheiggoo Shephatiah, mac Abital;

⁵ As yn cheyoo Ithream, rish Eglah ben Ghavid. V’ad shoh ruggit da David ayns Hebron.

⁶ As haink eh gy-kione, choud’s va caggey eddyr thie Saul as thie Ghavid, dy hass Abner seose dy dunnal son thie Saul.

⁷ As va co-lhiabbagh ec Saul, va’n ennym eck Rizpah inneen da Aiah: as dooyrt Ish-bosheth rish Abner, Cre’n-fa t’ou er n’ghoaill co-lhiabbagh m’ayrey.

⁸ Eisht va Abner feer fargagh ec goan Ish-bosheth, as dooyrt eh, Vel oo dy my hoiaghey myr moddey noi Judah, mish ta er hoilshaghey kenjallys da thie Saul dt’ayr, da e vraaraghyn, as da e chaarjyn, gys y laa shoh, as cha vel mee er dty livrey seose gys laue Ghavid, dy vel oo nish cur foill my lieh mychione y ven shoh?

⁹ Dy jean Jee myr shen rish Abner as ny smoo neesht, mannagh jean-yms son David, myr ta’n Chiarn er vreearrey da;

¹⁰ Dy chaghlaa’n reeriaght veih thie Saul, as dy hoiaghey seose stoyl-reeoil Ghavid harrish Israel, as harrish Judah, veih Dan eer gys Beer-sheba.

¹¹ As cha by-lhoys da fockle d’ansoor y choyrt da Abner, son v’eh ayns aggle roish.

¹² As hug Abner chaghteryn gys David ass e lieh, gra, Quoi s’liesh y cheer? gra myrgeddin, Jean coardail rhym, as cur-my-ner bee my laue mayrt, dy chur lesh ooilley Israel mygeayrt hood.

¹³ As dooyrt eh, Feer vie; neem’s conaant rhyt: agh un red ta mee shassoo er, ta shen, Nagh jean oo m’eddin y akin, mannagh der oo lhiat hoshiaght mayrt Michal inneen Saul, tra hig oo ayns m’enish.

¹⁴ As hug David chaghteryn gys Ish-bosheth mac Saul, gra, Livrey hym Michal my ven, ren mee y chosney son keead crackan-chymmylt jeh ny Philistinee.

¹⁵ As hug Ish-bosheth fys as ghow eh ee veih e sheshey, eer veih Phaltiel mac Laish.

¹⁶ As hie e sheshey mâree keayney ny jeï choud’s Bahurim: eisht dooyrt Abner rish Immee royd thie. As hie eh roish.

¹⁷ As va glare eddyr Abner as princeyn Israel, gra, Traa dy row va shiu aggindagh er David dy ve yn ree eu:

¹⁸ Nish jean-jee eh: son ta’n Chiarn er loayrt mychione David, gra, Liorish laue my harvaant David neem’s my phobble Israel y hauail veih pooar ny Philistinee, as veih laue ooilley nyn noidyn.

¹⁹ As loayr Abner myrgeddin ayns clashtyn Venjamin: as hie Abner myrgeddin dy hoilshaghey da David ayns Hebron ooilley aigney-mie Israel huggeysyn, as aigney-mie slane thie Venjamin.

²⁰ Er shoh haink Abner gys David gys Hebron, as feed dooinney mârish: as ren David cuirraghyn da Abner, as da ny deiney va mârish.

²¹ As dooyrt Abner rish David, Trog-yms orrym, as hem roym, as goym ayns laue dy hayrn cooidjagh ooilley Israel gys my hiarn yn ree, dy yannoo conaant rhyt, as dy vod oo reill harrish ooilley ny ta dty chree dy yeearree. As lhig David y raad da Abner; as hie eh roish ayns shee.

²² As cur-my-ner, haink deiney Ghavid as Joab veih geiyrt er sheshaght [dy noidyn], as hug ad lhieu niart spooilley mâroo: (agh cha row Abner marish David ayns Hebron; son v’eh er choyrt eh ersooyl ayns shee.)

²³ Tra va Joab as ooilley e heshaght-chaggee er jeet, ve inshit da Joab, gra, Haink Abner mac Ner gys y ree, as t’eh er lhiggey’n raad da, as t’eh er n’gholl ayns shee.

²⁴ Eisht haink Joab gys y ree, as dooyrt eh, Cre shoh t’ou er n’yannoo? cur-my-ner, haink Abner hood; cre’n-fa lhig oo yn raad da, as dy vel eh er chosney roish.

²⁵ Shione dhyt Abner mac Ner, dy daink eh dy dty volley, as er-chee dy yannoo stiagh rhyt, dy gheddyn magh dty choyrleyn follit.

²⁶ As tra va Joab er jeet magh veih David, hug eh chaghteryn er-eiyrt’s Abner, hug lhieu reesht eh veih chibbyr Sirah: agh ve gyn-yss da David.

²⁷ As tra va Abner er jeet back gys Hebron, ghow Joab eh dy lhiattee ’sy yiat, myr-yien dy loayrt rish dy sheeoil, as woaill eh eh ayns shen fo’n wheiggoo asney, dy dooar eh baase, er coontey fuill Asahel e vraar.

²⁸ As ny lurg shen, tra cheayll David jeh, dooyrt eh, Ta mish as my reeriaght son dy bragh seyr fenish y Chiarn veih fuill Abner mac Ner:

²⁹ Lhig da lhie er kione Yoab, as er ooilley thie e ayrey; as cha bee thie Yoab dy bragh fegooish fer lesh roie-folley, ny lourane, ny baccagh, ny fer dy huittym er e chliwe, ny fer ta feme arran.

³⁰ Myr shen ren Joab as Abishai e vraar stroie Abner, er-yn-oyr dy row eshyn er varroo nyn mraar Asahel ayns y chaggey ec Gibeon.

³¹ As dooyrt David rish Joab, as ooilley’n pobble va mârish, Raip-jee nyn goamraghyn, as cur-jee aanrit-sack miu, as jean-jee dobberan roish Abner. As huill ree David eh-hene geiyrt er y charbyd.

³² As doanluck ad Abner ayns Hebron: as hrog y ree seose e choraa, as cheayn eh ec oaie Abner; as ren ooilley’n pobble keayney.

³³ As ren y ree dobberan harrish Abner, as dooyrt eh, Nee myr kymmagh hooar Abner baase?

³⁴ Dty laueyn cha row kianlt, ny yiarnyn er dty chassyn: myr ta dooinney tuittym liorish deiney folley, shen myr ren uss tuittym. As cheayn ooilley’n pobble reesht harrish.

³⁵ As tra haink y pobble dy gherjaghey David, as dy ghoaill beaghey mârish er y laa cheddin, ren David breearrey, gra, Myr shen as ny smoo dy jean Jee rhym’s, my neem’s arran ny nhee erbee elley y ghoaill, roish lhie ny greïney.

³⁶ As cheayll ooilley’n pobble shoh, as by-haittin lhieu eh: son shen ny va aigney’n ree va’n pobble booiagh lesh.

³⁷ Son hoig ooilley’n pobble, as ooilley Israel, er yn laa shen, nagh nee lesh aigney’n ree ve dy row Abner mac Ner er ny choyrt gy-baase.

³⁸ As dooyrt y ree rish e harvaantyn, Nagh vel fys euish dy vel prince as ard-ghooinney er duittym er yn laa jiu ayns Israel?

³⁹ As ta mish nish faase, ga dy vel mee my ree ooilit; as ta ny deiney shoh mec Zeruiah ro chreoi er my hon: nee’n Chiarn y drogh-yantagh y chooilleeney cordail rish e olkys.