2 Samuel 23 - Yn Vible Casherick 1775 1819

CAB. XXIII

¹ Nish ad shoh goan s’jerree Ghavid. Dooyrt David mac Jesse, as y dooinney v’er ny hroggal seose dy ard, as fer-ooilit Jee Yacob, as kiaulleyder millish Israel, dooyrt eh,

² Loayr Spyrryd y Chiarn liorym’s, as va e ghoan ayns my hengey.

³ Ta Jee Israel er ghra, ta creg Israel er loayrt rhym’s, Shegin dasyn ta reill harrish deiney ve cairagh, reill ayns aggle Yee:

⁴ As bee eh myr soilshey’n voghrey, ec irree ny greïney, eer myr moghrey gyn bodjallyn; myr y faiyr ta gaase ass y thalloo liorish bree sollys y ghrian lurg frassyn.

⁵ Ga nagh vel my hie’s agh fardalagh roish Jee; ny-yeih t’eh er n’yannoo rhym conaant beayn, er ny oardrail dy kiart as dy shickyr ayns dy chooilley nhee: son aynsyn ta my haualtys, as ooilley my yeearree, ga nagh jig eh chelleeragh.

⁶ As bee ooilley mec Velial tilgit dy lhiattee, myr drineyn nagh vod v’er nyn loaghtey.

⁷ Agh y dooinney vennys roo, shegin da ve eïllit lesh yiarn, as cass shleiy; as bee ad dy bollagh er nyn lostey lesh aile, ayns yn ynnyd ta kiarit daue.

⁸ Shoh enmyn ny deiney niartal v’ayns shirveish Ghavid: Yn Tachmonite, yn er b’yrjey soit jeh mastey ny captanyn; (yn er cheddin va Adino yn Eznite;) hrog eh seose e shleiy noi hoght cheead, ren eh y varroo ec yn un traa.

⁹ As by-niessey dasyn va Eleazar mac Dodo yn Ahohite, fer jeh ny three treanee va marish David, tra hug ad y-lane fo ny Philistinee v’ayns shen er nyn jaglym cooidjagh gys caggey, as va cloan Israel er gosney roue:

¹⁰ Hrog eh er, as woaill eh ny Philistinee, derrey va’n laue echey skee, as lhiannee e laue gys y chliwe: as dobbree’n Chiarn barriaght vooar y laa shen; as cha hyndaa’n pobble mârish, agh dy spooilley.

¹¹ As ny lurg-syn va Shammah mac Agee yn Hararite: as va ny Philistinee er nyn jaglym cooidjagh ayns sheshaght, raad va peesh dy ghrunt lane arroo; as chur y pobble cooyl rish ny Philistinee:

¹² Agh hass eh ayns mean y vagher, as ren eh fendeil eh, as varr eh ny Philistinee: as hug y Chiarn da slane barriaght.

¹³ As hie three jeh ny ard-chaptanyn jeh ny jeih as feed dy gheiney reiht sheese, as haink ad gys David ayns imbagh yn ouyr gys ooig Adullam: as ren sheshaght ny Philistinee campal ayns coan Rephaim.

¹⁴ As va David ec y traa shen ayns ynnyd lajer, as va garrison ny Philistinee ’sy traa cheddin ayns Beth-lehem.

¹⁵ As va David miandagh, as dooyrt eh, O dy jinnagh fer erbee jough dou jeh ushtey chibbyr Veth-lehem, ta liorish y yiat!

¹⁶ As vrish ny three deiney niartal trooid sheshaght ny Philistinee, as hayrn ad ushtey ass chibbyr Veth-lehem, va liorish y yiat, as ghow ad, as hug ad lhieu eh gys David: ny-yeih cha jinnagh eh giu jeh, agh gheayrt eh magh eh fenish y Chiarn.

¹⁷ As dooyrt eh, Foddey dy row eh voym’s, O Hiarn, dy jinnin’s shoh: nagh nee shoh fuill ny deiney hie ayns gaue nyn mioys? shen-y-fa cha jinnagh eh giu jeh. Shoh myr ren ny three deiney niartal.

¹⁸ As va Abishai, braar Yoab, mac Zeruiah, yn ard-er mastey three; as hrog eh seose e shleiy noi three cheead, as varr eh ad, as va goo echey mastey’n three shoh.

¹⁹ Nagh nee eshyn va’n er s’ooasle jeh’n three? shen-y-fa, eh va’n captan oc: ny-yeih cha row eh corrym rish y chied three.

²⁰ As Benaiah, mac Jehoiada, mac dy ghooinney dunnal, jeh Kabzeel, va eh-hene dy mennick er phrowal e ghunnallys, varr eh daa Voabite, deiney myr lionyn: hie eh sheese myrgeddin, as varr eh lion ayns ooig, ayns earish sniaghtee.

²¹ As varr eh Egyptian, va ny ghooinney thollee stoamey: as va shleiy ayns laue’n Egyptian; agh hie eh sheese huggey lesh lorg, as chass eh yn shleiy ass laue’n Egyptian, as varr eh eh lesh y shleiy echey hene.

²² Ny reddyn shoh ren Benaiah mac Jehoiada, as va’n goo echey mastey ny three treanee s’jerree.

²³ V’eshyn onnoroil mastey’n jeih as feed, agh cha daink eh seose gys y chied three: as hoie David eh harrish y ghard echey hene.

²⁴ Va Asahel braar Yoab fer jeh’n jeih as feed; Elhanan mac Dodo veih Beth-lehem.

²⁵ Shammah yn Harodite, Elika yn Harodite,

²⁶ Helez yn Paltite, Ira mac Ikkesh yn Tekoite,

²⁷ Abiezer yn Anethothite, Mebunnai yn Hushathite,

²⁸ Zalmon yn Ahohite, Maharai yn Netophathite,

²⁹ Heleb mac Baanah, yn Netophathite; Ittai mac Ribai, ass Gibeah jeh cloan Venjamin,

³⁰ Benaiah yn Pirathonite, Hiddai jeh coanyn Ghaash,

³¹ Abi-albon yn Arbathite, Azmaveth yn Barhumite,

³² Eliahba yn Shaalbonite; jeh mec Jashen, Jonathan,

³³ Shammah yn Hararite, Ahiam mac Sharar yn Hararite,

³⁴ Eliphelet mac Ahasbai, mac yn Maachathite; Eliam mac Ahitophel yn Gilonite,

³⁵ Hezrai yn Carmelite, Paarai yn Arbite,

³⁶ Igal mac Nathan jeh Zobah, Bani yn Gadite,

³⁷ Zelek yn Ammonite; Naharai yn Beerothite, armyder Yoab mac Zeruiah,

³⁸ Ira yn Ithrite, Gareb yn Ithrite,

³⁹ Uriah yn Hittite; shiaght-jeig as feed ayns ooilley.