2 Samuel 22 - Yn Vible Casherick 1775 1819

CAB. XXII

¹ As ghow David gys y Chiarn goan yn arrane-moyllee shoh, er y laa va’n Chiarn er livrey eh ass laue ooilley e noidyn, as veih laue Saul.

² As dooyrt eh, Yn Chiarn my chreg, my hoor lajer, as my er-livreyee;

³ Jee my chreg; ersyn ver-ym my varrant: eshyn my scaa, as niart my haualtys, my hoor ard, as my chemmyrk, my haualtagh; t’ou sauail mee veih tranlaasee.

⁴ Neem’s geamagh er y Chiarn, ta feeu dy ve er ny voylley: myr shen bee’m sauchey veih my noidyn.

⁵ Tra haink tonnyn y vaaish mygeayrt-y-moom, ren thooillaghyn deiney mee-chrauee m’y agglaghey;

⁶ Haink pianyn niurin mygeayrt-y-moom; va ribbaghyn y vaaish kiongoyrt rhym.

⁷ Ayns my heaghyn deïe mee gys y Chiarn, as ren mee my accan gys my Yee; as cheayll eh my choraa veih e hiamble, as hie m’accan stiagh gys e chleayshyn.

⁸ Eisht va’n thalloo er ny ghleashagh, as ren eh craa; ren undinyn niau scughey, as v’ad er-creau, ec e yymmoose.

⁹ Hie jaagh seose veih e enish, as aile stroialtagh voish e eddin: va smarageyn er nyn voaddey lesh.

¹⁰ Chroym eh ny niaughyn neesht, as haink eh neose; as fo e chassyn va dorraghys.

¹¹ As er cherub varkee eh, as ren eh getlagh: as er skianyn y gheayee v’eh er ny akin.

¹² As ren eh dorraghys e chabbane-reeoil mygeayrt-y-mysh, ushtaghyn dorraghey, as bodjallyn chiu yn aer.

¹³ Trooid y sollyssid hie roish va smarageyn aile er n’oaddey.

¹⁴ Hug y Chiarn taarnagh veih niau, as ren y fer syrjey coyrt magh e choraa.

¹⁵ As lhig eh magh e hideyn, as skeayl eh ad; as tendreil, dy choyrt ad bun-ry-skyn.

¹⁶ As va lhiabbaghyn yn aarkey er nyn vakin, as haink undinyn y theihll rish, ec oghsan y Chiarn, ec blest ennal e yymmoose.

¹⁷ Hug eh cooney veih’n yrjid, ren eh m’y ghoaill; hayrn eh mee ass ymmodee ushtaghyn;

¹⁸ Livrey eh mee veih my noid niartal, as vouesyn va dwoaie oc orrym: son v’ad ro lajer er my hon.

¹⁹ Haink ad orrym gyn-yss ayns laa my heaghyn: agh va’n Chiarn my chemmyrk.

²⁰ Hug eh lesh mee magh neesht gys boayl dy reamys; livrey eh mee, son dy row taitnys echey aynym.

²¹ Ren y Chiarn m’y chooilleeney lurg my ynrickys; cordail rish glennid my laueyn t’eh er my chooilleeney.

²² Son ta mee er vreayll raaidyn y Chiarn, as cha vel mee dy mee-chrauee er hreigeil my Yee.

²³ Son va ooilley e leighyn kiongoyrt rhym: as son e lattyssyn, cha hyndaa mee voue.

²⁴ Va mee myrgeddin ynrick kiongoyrt rish, as hug mee cooyl rish my olkys hene.

²⁵ Shen-y-fa ta’n Chiarn er m’y chooilleeney lurg my ynrickys; cordail rish my ghlennid ayns shilley e hooillyn.

²⁶ Da’n dooinney myghinagh nee oo soilshaghey oo-hene myghinagh, as da’n dooinney ynrick nee oo soilshaghey oo-hene ynrick.

²⁷ Dasyn ta glen nee oo soilshaghey oo-hene glen, as noi’n roonagh soilshee oo dty roon.

²⁸ As yn vooinjer seaghnit nee oo sauail: agh ta dty hooillyn er ny mooaralee, dy injillaghey ad.

²⁹ Son she uss my chainle, O Hiarn; as chyndaa-ee’n Chiarn my ghorraghys gys soilshey.

³⁰ Son liort’s ta mee er vrishey trooid sheshaght dy gheiney-caggee: liorish my Yee ta mee er lheim harrish voalley.

³¹ Er son Jee, ta e raad ynrick: ta goo’n Chiarn er ny phrowal: t’eh myr eïlley-caggee dauesyn ooilley ta treishteil ayn.

³² Son quoi ta’n Jee, agh y Chiarn? as quoi ta’n chreg, agh y Jee ainyn?

³³ Ta jee my niart, as my phooar: as t’eh jannoo my raad jeeragh.

³⁴ T’eh jannoo my chassyn myr cassyn feeaih; as soiaghey mee er m’ynnydyn ardey.

³⁵ T’eh gynsaghey my laueyn dy chaggey; myr shen dy vel bow steillyn er ny vrishey liorish my roihaghyn.

³⁶ T’ou myrgeddin er choyrt dou scape dty haualtys; as ta dty chenjallys ghraihagh er my hoiaghey seose.

³⁷ T’ou er choyrt reamys da my chesmadyn; myr shen nagh ren my chassyn skyrraghtyn.

³⁸ Ta mee er n’eiyrt er my noidyn, as er stroie ad; chamoo hyndaa mee reesht derrey va mee er stroie ad.

³⁹ As ta mee er stroie ad, as er lhottey ad, nagh voddagh ad girree: dy feer, t’ad er duittym fo my chassyn.

⁴⁰ Son t’ou er my choamrey lesh niart son y chaggey: adsyn dirree seose m’oï t’ou er vroo fo my chassyn.

⁴¹ T’ou er choyrt dou myrgeddin mwannallyn my noidyn, dy voddin stroie adsyn ta dwoaie oc orrym.

⁴² Yeeagh ad, agh cha row fer dy hauail; eer gys y Chiarn, agh cha dug eh clashtyn daue.

⁴³ Eisht cha myn as joan y thallooin ren mee ad y woalley; myr laagh ny straidyn ren mee ad y stampey, as skeayley ad dy lhean.

⁴⁴ Veih anvea my phobble t’ou myrgeddin er my livrey, t’ou er my reayll dy ve kione ny ashoonyn: nee pobble nagh nione dou mish y hirveish.

⁴⁵ Nee joarreeyn ginjillaghey ad-hene hym: cha leah’s chlinnys ad, ver ad biallys dou.

⁴⁶ Nee joarreeyn lheïe ersooyl, as bee ad agglagh ayns ny ynnydyn follit oc.

⁴⁷ Ta’n Chiarn bio; as bannit dy row my chreg, as ard-voylley dy row er ny choyrt da Jee, creg my haualtys.

⁴⁸ She Jee ta goaill cooilleeney dou, as ta coyrt y pobble sheese foym,

⁴⁹ As ta livrey mee veih my noidyn: t’ou myrgeddin er my hroggal seose dy ard er-nyn-skyn dirree seose m’oï: t’ou er my livrey veih’n dooinney tranlaasagh.

⁵⁰ Son yn oyr shoh, ver-yms booise dhyt, O Hiarn, mastey ny ashoonee, as goym arraneyn-moyllee gys dt’ennym.

⁵¹ Eshyn yn toor dy haualtys son e ree; as t’eh soilshaghey myghin da e er-ooilit, da David, as da e luight er son dy bragh.