2 Samuel 2 - Yn Vible Casherick 1775 1819

CAB. II

¹ As haink eh gy-kione lurg shoh, dy ren David briaght jeh’n Chiarn, gra, Jem seose gys veg jeh ard-valjyn Yudah? As dooyrt y Chiarn rish, Gow seose. As dooyrt David, Quoi jeh ny ard-valjyn? As dooyrt eh, Gys Hebron.

² Er shoh hie David seose gys shen, as e ghaa ven mârish, Ahinoam yn Jezreelite, as Abigail ben Nabal yn Carmelite.

³ As ny deiney va mârish hug David lesh seose, dy chooilley ghooinney lesh lught e hie: as ren ad cummal ayns ard-valjyn Hebron.

⁴ As haink deiney Yudah, as ayns shen ren ad David y ooilaghey ny ree harrish thie Yudah. As dinsh ad da David, gra, Dy nee deiney Yabesh-gilead ren Saul y oanluckey.

⁵ As hug David chaghteryn gys deiney Yabesh-gilead, as dooyrt eh roo, Bannit dy row shiuish jeh’n Chiarn, son y chenjallys shoh ta shiu er hoilshaghey da nyn jiarn, eer da Saul, as dy vel shiu er n’oanluckey eh.

⁶ As nish dy jean y Chiarn kenjallys as firrinys y hoilshaghey diuish: as neem’s myrgeddin shoh nyn aigney-mie y chooilleeney, son dy vel shiu er n’yannoo yn red shoh.

⁷ Shen-y-fa nish, lhig da nyn laueyn v’er nyn niartaghey, as bee-jee dunnal: son ta nyn mainshtyr Saul marroo, as er shoh ta thie Yudah er my ooilaghey dy ve ree harrystoo.

⁸ Agh Abner mac Ner, captan sheshaght-caggee Saul, ghow eh Ish-bosheth mac Saul, as hug eh lesh eh harrish gys Mahanaim:

⁹ As ren eh eh ny ree harrish Gilead, as harrish ny Ashuriteyn, as harrish Jezreel, as harrish Ephraim, as harrish Benjamin, as harrish ooilley Israel.

¹⁰ Va Ish-bosheth mac Saul da-eed bleïn dy eash tra ren eh toshiaght dy reill harrish Israel, as v’eh er reill daa vleïn. Agh deiyr thie Yudah er David.

¹¹ (As y traa va David ny ree ayns Hebron harrish thie Yudah, va shiaght bleeaney as shey meeaghyn.)

¹² As hie Abner mac Ner, as sharvaantyn Ish-bosheth mac Saul, magh veih Mahanaim gys Gibeon.

¹³ As hie Joab mac Zeruiah, as sharvaantyn Ghavid, magh, as haink ad dy cheilley, ec loghan Ghibeon: as ghow ad grunt, ad shoh er y cheu shoh jeh’n loghan, as ad shid er y cheu elley.

¹⁴ As dooyrt Abner rish Joab, Lhig da ny deiney aegey nish girree, as cloie-caggee y yeeaghyn dooin. As dooyrt Joab, Lhig daue girree.

¹⁵ Eisht hrog ad orroo, as hie ad harrish, ghaa yeig jeh Benjamin, v’er cheu Ish-bosheth mac Saul, as ghaa-yeig jeh deiney Ghavid.

¹⁶ As haare ad dagh fer e heshey er y chione, as roie eh e chliwe ayns lhiattee e heshey; myr shen dy huitt ad sheese cooidjagh. Shen-y-fa va’n ynnyd shen enmyssit Helkath-hazzurim t’ayns Gibeon.

¹⁷ As va magher feer dewil ayn er y laa shen: as chossyn sharvaantyn Ghavid y laa er Abner, as er deiney Israel.

¹⁸ As va three jeh mec Zeruiah ayns shen, Joab, as Abishai, as Asahel: as va Asahel coshee cha skibbylt as feeaïh ’sy vagher.

¹⁹ As deiyr Asahel er Abner; as ayns e immeeaght cha hyndaa eh gys y laue yesh ny gys y laue chiare veih geiyrt er.

²⁰ Eisht yeeagh Abner ny yeï, as dooyrt eh, Nee uss Asahel? As dreggyr eh, Mish eh.

²¹ As dooyrt Abner rish, Chyndaa dy lhiattee gys y laue yesh ny gys y laue hoshtal, as glack fer jeh ny deiney aegey, as gow yn eïlley-caggee echeysyn. Agh cha jyndaagh Asahel dy lhiattee veih geiyrt er Abner.

²² As dooyrt Abner reesht rish Asahel, Chyndaa dy lhiattee veih geiyrt orrym’s; nagh lhieg-yms oo gys y thalloo: kys eisht oddin’s m’eddin y yeeaghyn da Joab dty vraar?

²³ Ny-yeih, dob eh dy hyndaa dy lhiattee: shen-y-fa woaill Abner eh lesh kione e shleiy fo’n wheiggoo asney, dy daink yn shleiy magh trooid e ghreeym; as huitt eh sheese ayns shen, as hooar eh baase ’syn ynnyd cheddin: as shen myr ve, whilleen as haink gys y boayl raad huitt Asahel sheese, as hooar eh baase, dy hass ad.

²⁴ Hie Joab myrgeddin as Abishai er-eiyrt’s Abner: as ve mysh lhie ny greïney tra rosh ad gys cronk Ammah, ta jeeragh er Giah, lesh faasagh Gibeon.

²⁵ As hayrn cloan Venjamin ad-hene cooidjagh dy gholl er-eiyrt’s Abner, as haink ad dy ve un heshaght, as hass ad er mullagh cronk.

²⁶ Eisht deïe Abner gys Joab, as dooyrt eh, Vel yn cliwe ry-hoi stroie son dy bragh? nagh vel fys ayd dy bee’n obbyr shoh trimshey ec y jerrey? caïd eisht nee oo lhiggey shaghey dy lhiettal y pobble veih geiyrt er nyn mraaraghyn?

²⁷ As dooyrt Joab, Myr ta Jee bio, er-be dty ghoan hene ’sy voghrey, va’n pobble son shickyrys er skeayley gyn dooinney dy eiyrt er e vraar.

²⁸ Myr shen ren Joab sheidey trumpet, as hault ooilley’n pobble, as cha deiyr ad er Israel ny sodjey, as va’n caggey ec kione.

²⁹ As huill Abner as e gheiney fud-ny-hoie shen trooid y thalloo-rea, as hie ad harrish Jordan, as jimmee ad trooid ooilley Bithron, as haink ad gys Mahanaim.

³⁰ As hyndaa Joab veih geiyrt er Abner: as tra v’eh er haglym ooilley e gheiney cooidjagh, va dy laccal jeh sharvaantyn Ghavid nuy deiney jeig, as Asahel.

³¹ Agh va sharvaantyn Ghavid er woalley as er varroo jeh Benjamin, as jeh deiney Abner, three cheead as three-feed.

³² As hrog ad lhieu Asahel, as doanluck ad eh ayns oaie e ayrey, v’ayns Beth-lehem. As hie Joab as e gheiney fud-ny-hoie, as haink ad gys Hebron ec brishey’n laa.