2 Samuel 19 - Yn Vible Casherick 1775 1819

CAB. XIX

¹ As ve inshit da Joab, Cur-my-ner, ta’n ree keayney as dobberan son Absalom.

² As va’n varriaght er y laa shen er ny hyndaa gys trimshey da ooilley’n pobble: son cheayll ad er y laa shen kys va’n ree seaghnit son e vac.

³ As ren y pobble sheeley ersooyl voish er y laa shen gys yn ard-valley, myr sleih dy naareydagh geid ersooyl tra t’ad chea veih’n chaggey.

⁴ Agh choodee’n ree e eddin, as dyllee eh lesh coraa ard, O my vac Absalom! O Absalom, my vac, my vac!

⁵ As haink Joab stiagh ’sy thie gys y ree, as dooyrt eh, T’ou er y laa jiu er naaraghey eddin ooilley dty harvaantyn, ta jiu er hauail dty vioys, as bioys dty vec, as dt’inneenyn, as bioys dty vraane, as bioys dty cho-lhiabbee;

⁶ Ayns wheesh as dy vel oo er yeeaghyn aigney-mie da dty noidyn, as dwoaie da dty chaarjyn: son t’ou er hoilshaghey er y laa jiu, nagh vel scansh ayd jeh princeyn, ny sharvaantyn: son ta mee cur-my-ner jiu, dy beagh Absalom er ve bio, as shinyn ooilley er ve giarit jeh er y laa jiu, nagh beagh eh wheesh dy hrimshey dhyt.

⁷ Shen-y-fa nish, irree, gow magh, as loayr dy gerjoilagh rish dty harvaantyn: son ta mee breearrey liorish y Chiarn, mannagh jed oo magh, cha bee fer nee fuirriaght mayrt’s noght: as bee shen ny smessey dhyt na dy chooilley olk t’er duittym ort veih dty aegid derrey nish.

⁸ Eisht dirree’n ree, as hoie eh ’sy yiat. As dinsh ad da ooilley’n pobble, gra, Cur-my-ner, ta’n ree ny hoie ’sy yiat. As haink ooilley’n pobble kiongoyrt rish y ree; son va Israel er gosney ersooyl dy chooilley ghooinney gys e chummal.

⁹ As va anvea mastey ooilley’n pobble, trooid ooilley tribeyn Israel, gra, Haue y ree shin ass laue nyn noidyn, as livrey eh shin ass laue ny Philistinee; as nish t’eh er roie’n cheer kyndagh rish Absalom.

¹⁰ As Absalom, ren shin y ooilaghey harrin, t’eh marroo ’sy chaggey: nish er-y-fa shen, kys te nagh vel shiu loayrt fockle mychione coyrt lhieu back y ree?

¹¹ As hug David fys gys Zadok as gys Abiathar ny saggyrtyn, gra, Loayr-jee rish shanstyr Yudah, gra, Kys te dy vel shiuish cha liastey ayns coyrt lhieu back y ree gys e hie? (fakin dy vel glare ooilley Israel er jeet gys y ree, eer gys e hie.)

¹² Shiuish my vraaraghyn, shiuish my chraueyn, as my eill: cre’n-fa eisht ta shiuish yn vooinjer s’jerree dy gheddyn back y ree?

¹³ As abbyr-jee rish Amasa, Nagh vel uss jeh my chraue, as jeh my eill? Dy jean Jee myr shen rhym’s, as ny smoo neesht, mannagh bee uss ard-chaptan y cheshaght-chaggee aym’s choud’s bio oo, ayns ynnyd Yoab.

¹⁴ As hyndaa eh cree ooilley deiney Yudah, myr cree un dooinney; myr shen dy dug ad y chaghteraght shoh gys y ree, Tar hooin reesht oo-hene, as ooilley dty harvaantyn.

¹⁵ Myr shen hyndaa’n ree, as haink eh gys Jordan. As haink Judah gys Gilgal, dy gholl quail y ree, dy choyrt eh harrish Jordan.

¹⁶ As ren Shimei, mac Gera, ny Venjamite, va jeh Bahurim, siyr, as haink eh neose marish deiney Yudah dy gholl quail ree David.

¹⁷ As va thousane dy gheiney Venjamin mârish, as Ziba sharvaant dy hie Saul, as e wheig mec jeig, as feed sharvaant mârish, as hie ad harrish Jordan roish y ree.

¹⁸ As hie baatey dy choyrt lesh harrish lught-thie’n ree, as dy hendeil er. As huitt Shimei mac Gera sheese kiongoyrt rish y ree, tra v’eh er jeet harrish Jordan;

¹⁹ As dooyrt eh rish y ree, Ny lhig da my hiarn cur my ghrogh-yannoo my lieh, chamoo cooinee er shen ny ren dty harvaant dy olkyssagh er y laa hie my hiarn y ree magh ass Jerusalem, dy goghe y ree eh gys e chree.

²⁰ Son ta fys ec dty harvaant dy vel mee foiljagh: shen-y-fa, cur-my-ner, ta mish yn chied er jeh ooilley thie Yoseph, t’er jeet er y laa jiu dy gholl sheese quail my hiarn y ree.

²¹ Agh dreggyr Abishai mac Zeruiah, as dooyrt eh, Nagh bee Shimei er ny choyrt gy-baase son shoh, dy ren eh gwee mollaght er ree ooilit y Chiarn?

²² As dooyrt David, Cre t’enish dy yannoo rhym’s ’sy chooish shoh, shiuish vec Zeruiah, dy ve wheesh m’oï er y laa shoh? Bee dooinney erbee er ny choyrt gy-baase er y laa jiu ayns Israel? son nagh vel fys aym dy vel mee nish my ree harrish Israel?

²³ Shen-y-fa dooyrt y ree rish Shimei, Cha bee oo er dty choyrt gy-baase: as ren y ree breearrey da.

²⁴ As haink Mephibosheth mac Saul neose quail y ree, as cha row eh chamoo er niee e chassyn, ny er vaarey e aasaag, ny er chaghlaa e choamrey er-dyn laa hie’n ree roish derrey’n laa haink eh reesht ayns shee.

²⁵ As haink eh gy-kione, tra v’eh er jeet gys Jerusalem dy veeiteil y ree, dy dooyrt y ree rish, Cre’n-fa nagh jagh uss mârym’s, Mephibosheth?

²⁶ As dreggyr eh, My hiarn, O ree, ren my harvaant m’y volley; son dooyrt mish dty harvaant, Cur jeelt er yn assyl dou dy varkiagh, dy gholl quail y ree, er-yn-oyr dy vel dty harvaant baccagh.

²⁷ As t’eh er luney dty harvaant gys my hiarn y ree; agh ta my hiarn y ree myr ainle Yee: shen-y-fa jean shen ta mie ayns dty hilley.

²⁸ Son cha row ooilley thie m’ayrey agh deiney marroo kiongoyrt rish my hiarn y ree: ny-yeih hoie oo dty harvaant mastey goaldee dty voayrd hene. Cre’n chairys eisht t’aym’s dy yannoo aghin sodjey gys y ree?

²⁹ As dooyrt y ree rish, Cha lhiass dhyt loayrt ny sodjey mychione dty chooishyn? ta mee er ghra, Gow uss as Ziba yn thalloo eddyr shiu.

³⁰ As dooyrt Mephibosheth rish y ree, lhig da eer y slane y ghoaill, fakin dy vel my hiarn y ree er jeet reesht ayns shee gys e hie hene.

³¹ As haink Barzillai yn Gileadite neose veih Rogelim, as hie eh harrish Jordan marish y ree, dy akin eh harrish Jordan.

³² Nish va Barzillai ny ghooinney feer shenn, eer kiare-feed bleïn dy eash, as v’eh er n’yannoo magh y ree lesh beaghey choud’s duirree eh ec Mahanaim; son v’eh dooinney feer ooasle.

³³ As dooyrt y ree rish Barzillai, Tar harrish mârym’s, as nee oo beaghey mârym pene ayns Jerusalem.

³⁴ As dooyrt Barzillai rish y ree, Caïd t’aym’s dy ve bio, my lheid’s dy gholl seose marish y ree, gys Jerusalem?

³⁵ Ta mish jiu kiare-feed bleïn dy eash; as voddym’s briwnys eddyr mie as sie? vod blass ve ec dty harvaant jeh ny ta mee gee, ny giu? voddym’s arragh taitnys ’ghoaill ayns bingys deiney as mraane kiaullee? cre’n-fa eisht veagh dty harvaant foast ny errey da my hiarn y ree?

³⁶ Hed dty harvaant tammylt beg sodjey harrish Jordan marish y ree; as cre’n-fa yinnagh y ree mish y chooilleeney lesh lheid y chenjallys ooasle?

³⁷ Lhig da dty harvaant, ta mee guee ort, chyndaa back reesht, dy voddym baase y gheddyn ayns my ard-valley hene, as ve oanluckit ayns oaie m’ayr as my voir: agh cur-my-ner dty harvaant Chimham, lhig dasyn goll harrish marish my hiarn y ree; as jean er e hon lurg dt’aigney hene.

³⁸ As dansoor y ree, Hed Chimham harrish mârym, as neem’s er e hon lurg dt’aigney hene: as cre-erbee nee oo geearree orrym, shen nee’m er dty hon’s.

³⁹ As hie ooilley’n pobble harrish Jordan, as tra va’n ree er gheddyn harrish, ren y ree paagey Barzillai, as vannee eh eh; as hyndaa eh gys e hie hene.

⁴⁰ Eisht hie’n ree er e hoshiaght gys Gilgal, as Chimham mârish; as va ooilley pobble Yudah goll marish y ree, as myrgeddin lieh jeh pobble Israel.

⁴¹ As cur-my-ner, haink ooilley deiney Israel gys y ree, as dooyrt ad rish y ree, Cre’n-fa ta nyn mraaraghyn, deiney Yudah, er gheid oo ersooyl, as er choyrt lhieu yn ree, as lught e hie, as ooilley deiney Ghavid mârish, harrish Jordan?

⁴² As dreggyr ooilley deiney Yudah deiney Israel, Er-yn-oyr dy vel y ree faggys mooinjerys dooin: cre’n-fa eisht ta shiu corree son y chooish shoh? vel shin er veaghey eddyr ec cost y ree? ny vel eh er chur dooin leagh erbee?

⁴³ As dreggyr deiney Israel deiney Yudah, as dooyrt ad, Ta jeih ayrnyn ain ayns y ree, as ta myrgeddin ny smoo dy chairys ainyn ayns David na t’euish: cre’n-fa eisht hoie shiu cha beg j’inyn, as nagh row’n choyrle ain hoshiaght er ny hirrey ayns coyrt lesh back y ree ainyn? As va goan deiney Yudah ny s’fargagh na goan deiney Israel.