2 Samuel 16 - Yn Vible Casherick 1775 1819

CAB. XVI

¹ As tra va David er n’gholl tammylt harrish mullagh y chronk, cur-my-ner, haink Ziba sharvaant Mephibosheth ny whail, lesh cubbyl dy assylyn jeeltit, as orroo daa cheead bwilleen arran, as keead dhoss dy raisinyn, as keead dy vessyn-souree, as saagh feeyney.

² As dooyrt y ree rish Ziba, Cre hon ta ooilley shoh? As dooyrt Ziba, Ta ny assylyn son lught-thie’n ree dy varkiagh orroo, as yn arran as ny messyn souree son beaghey da ny deiney aegey, as y feeyn dy ooraghey adsyn vees faiynt ’syn aasagh.

³ As dooyrt y ree, As cre vel mac dty vainshtyr? As dreggyr Ziba y ree, Cur-my-ner, t’eh fuirriaght ec Jerusalem: son dooyrt eh, Jiu ver lught-thie Israel dou reesht reeriaght m’ayrey.

⁴ Eisht dooyrt y ree rish Ziba, Cur-my-ner, lhiat’s ta ooilley ny va bentyn da Mephibosheth. As dooyrt Ziba, Shoh ta mee dy imlee guee ort, dy voddym agh foayr y gheddyn ayns dty hilley, my hiarn, O ree.

⁵ As tra va ree David er jeet gys Bahurim, cur-my-ner, haink magh veih dooinney jeh kynney Saul, va’n ennym echey Shimei, mac Gera: haink eh magh, as gweeaghyn kinjagh myr haink eh.

⁶ As hilg eh claghyn er David, as er ooilley sharvaantyn ree Ghavid: as va ooilley’n pobble as ooilley ny deiney caggee er e laue yesh as er e laue hoshtal.

⁷ As myr shoh loayr Shimei myr v’eh gweeaghyn, Magh lhiat, magh ass y cheer oo, uss ghooinney folley, as uss vac Velial:

⁸ Ta’n Chiarn e chooilleeney ort ooilley fuill thie Saul, ’syn ynnyd echey t’ou uss er reill, as ta’n Chiarn er livrey’n reeriaght gys laue Absalom dty vac: jeeagh nish, ta dty olkys hene er verraghtyn ort, son dy nee dooinney folley oo.

⁹ Eisht dooyrt Abishai mac Zeruiah rish y ree, Cre’n-fa ghoghe yn moddey custey shoh er dy ghweeaghyn da my hiarn y ree? lhig dou goll noon, ta mee guee ort, as giarey’n kione jeh.

¹⁰ As dooyrt y ree, Cre t’aym’s diuish nish dy yannoo er my hon, shiuish vec Zeruiah? Myr shen lhig da gweeaghyn, son dy vel y Chiarn er ghra rish, Gwee mollaght da David. Quoi ghoys er dy ghra, Cre hon t’ou er n’yannoo shoh?

¹¹ As dooyrt David rish Abishai, as rish ooilley e harvaantyn, Cur-my-ner, ta my vac, haink magh veih my veeghyn, shegin er my vioys: foddey sloo eisht ta’n Benjamite shoh dy ve cronnit. Faag-jee veue eh, as lhig da gweeaghyn: son ta’n Chiarn er lhiggey da.

¹² Foddee dy jean y Chiarn jeeaghyn er my hrimshey, as dy der y Chiarn cooilleeney mie dou son y ghweeaghyn echeysyn er y laa shoh.

¹³ As myr hie David as e gheiney er y raad, jimmee Shimei rish lhiattee’n chronk er-nyn-skyn, as v’eh gweeaghyn myr v’eh goll, as tilgey claghyn, as ceau joan er.

¹⁴ As haink y ree, as ooilley’n pobble va mârish, skee; as ren ad ooraghey ad-hene ayns shen.

¹⁵ As haink Absalom, as ooilley’n pobble deiney Israel, gys Jerusalem, as Ahitophel mâroo.

¹⁶ As haink eh gy-kione, tra va Hushai yn Archite, carrey Ghavid, er jeet gys Absalom, dy dooyrt Hushai rish Absalom, Dy bannee Jee yn ree, dy bannee Jee yn ree.

¹⁷ As dooyrt Absalom rish Hushai, Nee shoh dt’aigney-mie da dty charrey? cre’n-fa nagh jagh oo marish dty charrey?

¹⁸ As dooyrt Hushai rish Absalom, Nay; agh eshyn ta’n Chiarn, as y pobble shoh, as ooilley deiney Israel, dy reih, mârishyn beem’s, as leshyn neem’s shassoo.

¹⁹ As reesht, quoi lhisin shirveish? nagh lhisin shirveish fenish e vac? Myr ta mee er hirveish fenish dt’ayrey, myr shen nee’m ayns yn enish ayd’s.

²⁰ Eisht dooyrt Absalom rish Ahitophel, Cur-jee nyn goyrle dy cheilley cre nee mayd.

²¹ As dooyrt Ahitophel rish Absalom, Gow stiagh gys co-lhiabbee dt’ayrey, t’eh er vaagail dy ghoaill kiarail jeh’n thie; as Clynnee ooilley Israel dy vel dwoaie ec dt’ayr ort: eisht bee ny laueyn ocsyn ooilley ta mayrt er nyn niartaghey.

²² Er shoh skeayl ad cabbane da Absalom er mullagh y thie; as lhie Absalom marish co-lhiabbee e ayrey, ayns shilley ooilley Israel.

²³ As va coyrle Ahitophel ayns ny laghyn shen, myr dy beagh eh veih beeal Yee: myr shoh va ooilley coyrle Ahitophel, chammah marish David as marish Absalom.