2 Samuel 15 - Yn Vible Casherick 1775 1819

CAB. XV

¹ As haink eh gy-kione lurg shoh, dy ren Absalom soiaghey magh da hene fainee as cabbil, as jeih deiney as da-eed son coshee dy roie roish.

² As dirree Absalom dy moghey, as hass eh ayns giat ny cooyrtey: as shoh myr ve, tra haink dooinney erbee va shuit-leigh echey gys y ree son briwnys, eisht dy deïe Absalom er, as dooyrt eh, Cre’n ard-valley t’ou uss jeh? As dooyrt eh, Ta dty harvaant fer jeh lheid y tribe shen ayns Israel.

³ As dooyrt Absalom rish, Hee’m dy vel dty chooish mie as cairagh: agh cha vel dooinney erbee fo’n ree dy choyrt clashtyn dhyt.

⁴ As dooyrt Absalom ny-sodjey, O dy beign’s my vriw ayns y cheer, dy voddagh dy chooilley ghooinney ta shuit ny cooish erbee echey cheet hym’s, as yinnin’s cairys da!

⁵ As myr shoh ve, tra haink dooinney erbee dy yannoo biallys da, dy heeyn eh magh e laue as ghow eh eh, as hug eh paag da.

⁶ As er yn aght shoh ren Absalom rish ooilley Israel, haink gys y ree son briwnys. Myr shoh chleayn Absalom creeaghyn deiney Israel.

⁷ As haink eh gy-kione, lurg kiare bleeaney, dy dooyrt Absalom rish y ree, Ta mee guee ort, lhig dou goll gys Hebron dy chooilleeney my vreearrey ta mee er n’yannoo da’n Chiarn,

⁸ Son ren dty harvaant breearrey ’yannoo tra va mee ec Geshur ayns Syria, gra, My ver y Chiarn lesh mee reesht eer gys Jerusalem, eisht neem’s shirveish y Chiarn.

⁹ As dooyrt y ree rish, Immee royd ayns shee. Er shoh hrog eh er, as hie eh gys Hebron.

¹⁰ Agh hug Absalom chaghteryn follit trooid ooilley tribeyn Israel, gra, Cha leah’s chlinnys shiu sheean y trumpet, eisht abbyr-jee, Ta Absalom reill ayns Hebron.

¹¹ As marish Absalom hie da cheead dooinney ass Jerusalem, v’er nyn guirrey; as hie ad shoh ayns ônid nyn gree, as cha row veg y toiggal oc jeh’n chooish.

¹² As hug Absalom fys son Ahitophel yn Gilonite, fer-coyrlee Ghavid, veih e ard-valley, eer veih Giloh, dy ve mârish ec yn oural. As va sheshaght y choyrle-follit niartal: son ren y pobble bishaghey gagh laa, as cheet stiagh gys Absalom.

¹³ As haink chaghter gys David, gra, Ta creeaghyn deiney Israel soit er Absalom.

¹⁴ As dooyrt David rish ooilley e harvaantyn va mârish ec Jerusalem, Irree-jee, as lhig dooin cosney ersooyl; er-nonney cha jean mayd scapail veih Absalom: lhig dooin siyr ’yannoo dy gholl roïn, er-aggle dy jig eh orrin doaltattym, as cragh y choyrt orrin, as dy bwoaill eh yn ard-valley lesh foyr y chliwe.

¹⁵ As dooyrt sharvaantyn y ree rish, Cur-my-ner ta dty harvaantyn aarloo dy yannoo cre-erbee nee my hiarn y ree pointeil.

¹⁶ As hie’n ree magh, as ooilley e vooinjer mârish: as daag y ree jeih mraane, e cho-lhiabbee, dy reaylley’n thie.

¹⁷ As hie’n ree magh, as ooilley’n pobble geiyrt er, as duirree ad ayns ynnyd va foddey jeh.

¹⁸ As hie ooilley e harvaantyn er dagh cheu jeh; as hie ooilley ny Cherethiteyn, as ooilley ny Pelethiteyn, as ooilley ny Gittiteyn shey cheead dooinney deiyr er veih Gath, er nyn doshiaght roish y ree.

¹⁹ Eisht dooyrt y ree rish Ittai yn Gittite, Cre’n-fa t’ou uss myrgeddin goll mârin? chyndaa gys dty ynnyd, as fuirree marish y ree [noa]; son t’ou uss dty yoarree, as myrgeddin eiyrit magh veih dty heer hene.

²⁰ Fakin nagh daink uss agh er y gherrit shoh, cre’n-fa ragh oo noon as noal mârin? as dy vel fys aym’s cre’n raad ny ghoaill, chyndaa uss, as gow mayrt dty vraaraghyn: as myghin as firrinys dy row mayrt.

²¹ As dreggyr Ittai yn ree, as dooyrt eh, Myr ta’n Chiarn bio, as myr ta my hiarn y ree bio, son shickyrys, raad erbee dy bee my hiarn y ree, lhig eh ve ayns baase ny bioys, dy feer, ayns shen myrgeddin vees dty harvaant.

²² As dooyrt David rish Ittai, Immee royd, as fow harrish. As hie Ittai yn Gittite harrish, as ooilley e gheiney, as ooilley’n vooinjer veggey va mârish.

²³ As cheayn ooilley’n cheer lesh ard choraa, as hie ooilley’n pobble harrish: hie’n ree eh-hene myrgeddin harrish awin Kidron, as hie ooilley’n pobble er nyn doshiaght lesh raad yn aasagh.

²⁴ As cur-my-ner, va Zadok neesht, as ooilley ny Leviteyn mârish, gymmyrkey arg conaant Yee: as lhig ad sheese arg Yee; as hie Abiathar seose, derrey va ooilley’n pobble er n’gholl magh ass yn ard-valley.

²⁵ As dooyrt David rish Zadok, Cur lhiat back arg Yee stiagh ’syn ard-valley: my yioyms foayr ayns shilley’n Chiarn, ver eh lesh mee reesht, as jeeaghee eh dou chammah shen as e chabbane-agglish.

²⁶ Agh my jir eh myr shoh, Cha vel taitnys erbee aym aynyd: cur-my-ner, ta mee ayns shoh, lhig da jannoo rhym myr ta mie ayns e hilley.

²⁷ Dooyrt y ree myrgeddin rish Zadok yn saggyrt, Nagh nee fakyder oo? chyndaa gys yn ard-valley ayns shee, as nyn mec mêriu, Ahimaaz dty vac, as Jonathan mac Abiathar.

²⁸ Jeeagh-jee, fuirr-yms ayns cheer-rea yn aasagh, derrey yioym fys veue dy choyrt shickyrys dou.

²⁹ Shen-y-fa hug Zadok as Abiathar lhieu arg Yee reesht gys Jerusalem; as duirree ad ayns shen.

³⁰ As hie David seose lesh cronk Olivet, keayney myr v’eh goll seose, lesh e chione coodit, as e chassyn rooisht: as dy chooilley ghooinney va mârish lesh e chione coodit, as hie ad seose, keayney myr v’ad goll.

³¹ As ve inshit da David, gra, Ta Ahitophel mastey dty noidyn marish Absalom. As dooyrt David, O Hiarn, ta mee guee ort, chyndaa coyrle Ahitophel gys ommijys.

³² As haink eh gy-kione, tra va David er roshtyn mullagh y chronk, raad hug eh ooashley da Jee, cur-my-ner haink Hushai yn Archite ny whail lesh e chooat raipit, as leoie er e chione.

³³ As dooyrt David rish, My t’ou goll er dty hoshiaght mârym’s, cha bee oo agh errey dou:

³⁴ Agh my hyndaa-ys oo reesht gys yn ard-valley, as gra rish Absalom, Beem’s dty harvaant, O ree; myr ta mee er ve sharvaant dt’ayrey derrey nish, myr shen nish beem’s dty harvaant’s myrgeddin: eisht foddee oo, er my hon’s cleiy fo coyrle Ahitophel.

³⁵ As nagh vel ayd ayns shen dy ve lhiat Zadok as Abiathar ny saggyrtyn? shen-y-fa cre-erbee nee uss clashtyn veih thie’n ree, dy soilshee oo eh da Zadok as Abiathar ny saggyrtyn.

³⁶ Cur-my-ner, t’oc ayns shen mâroo yn daa vac oc, Ahimaaz mac Zadok, as Jonathan mac Abiathar; as lioroosyn ver shiu fys hym’s jeh dy chooilley nhee chlinnys shiu.

³⁷ Myr shoh hie Hushai carrey Ghavid gys yn ard-valley, as haink Absalom gys Jerusalem.