2 Samuel 11 - Yn Vible Casherick 1775 1819

CAB. XI

¹ As haink eh gy-kione ec toshiaght ny bleeaney, yn imbagh ta reeaghyn cliaghtey dy gholl magh dy chaggey, dy dug David magh Joab as e gheiney mârish, as ooilley deiney reiht Israel; as stroie ad cloan Ammon, as chruinnee ad stiagh Rabbah. Agh duirree David ec Jerusalem.

² As haink eh gy-kione er fastyr dy row, dy dirree David veih e lhiabbee, as huill eh er mullagh thie’n ree: as veih’n vullagh honnick eh ben faarkey ee-hene; as va’n ven feer aalin dy yeeaghyn urree.

³ As hug David fys, as vrie eh mychione y ven: as dooyrt fer, Nagh nee shoh Bath-sheba, inneen Eliam, ben Uriah yn Hittite?

⁴ As hug David chaghteryn, as hug ad lhieu ee, as haink ee stiagh huggey, as lhie eh mâree, (son v’ee er niee ee-hene,) as hyndaa ee thie.

⁵ As ren y ven gientyn, as hug ee fys, as dinsh ee da David, as dooyrt ee, Ta mee er yiennaghtyn.

⁶ As hug David fys gys Joab, gra, Cur hym’s Uriah yn Hittite. As hug Joab Uriah gys David.

⁷ As tra va Uriah er jeet huggey, vrie David jeh, Kys va Joab, as kys va’n pobble, as kys va’n caggey goll er.

⁸ As dooyrt David rish Uriah, Gow sheese gys dty hie, as niee dty chassyn. As hie Uriah roish ass thie’n ree, as hug y ree lhongey dy vee geiyrt er.

⁹ Agh ren Uriah cadley ec dorrys thie’n ree, marish ooilley sharvaantyn e hiarn, as cha jagh eh sheese gys e hie hene.

¹⁰ As tra ve inshit da David, gra, Cha jagh Uriah sheese gys e hie, dooyrt David rish Uriah, Nagh vel oo er jeet veih jurnah? cre’n-fa eisht nagh jagh oo sheese gys dty hie?

¹¹ As dooyrt Uriah rish David, Ta’n arg, as Israel, as Judah fo cabbaneyn, as ta my hiarn Joab, as sharvaantyn my hiarn, nyn lhie ayns camp fud y vagheragh: jem’s eisht gys my hie dy ee as dy iu, as dy yannoo sheshaght rish my ven? myr t’ou uss bio, as myr ta dt’annym bio, cha jean-ym lheid y red.

¹² As dooyrt David rish Uriah, Fuirree ayns shoh jiu neesht, as mairagh lhig-yms y raad dhyt. Myr shoh duirree Uriah ayns Jerusalem, yn laa shen as laa-ny-vairagh.

¹³ As tra va David er chuirrey eh, ren eh gee as giu ayns e enish; as ren eh er-meshtey eh: as ec yn astyr hie eh magh dy lhie er e lhiabbee marish sharvaantyn e hiarn, agh cha jagh eh sheese gys e hie.

¹⁴ As haink eh gy-kione ’sy voghrey, dy dug David screeuyn gys Joab, as hug eh eh lesh laue Uriah.

¹⁵ As hug eh ayns y screeuyn, gra, Soie-jee Uriah ayns eer toshiaght ny rankyn, raad s’dewilley ta’n caggey, as tayrn-jee veih, dy vod eh tuittym, as geddyn baase.

¹⁶ As haink eh gy-kione, myr va Joab goaill baght jeh’n ard-valley, dy doardee eh Uriah gys boayl raad va fys echey dy row deiney dunnal soit n’oï.

¹⁷ As vrish deiney’n ard-valley magh, as ren ad caggey rish Joab: as huitt paart jeh deiney Ghavid; as hooar Uriah yn Hittite e vaase myr-chaagh.

¹⁸ Eisht hug Joab fys, as dinsh eh da David kys va’n caggey er n’gholl er.

¹⁹ As hug eh currym er y chaghter, gra, Tra t’ou erreish ginsh ny naightyn caggee da’n ree,

²⁰ As my ennys oo dy vel jymmoose y ree troggal ayn, as dy jir eh rhyt, Cre’n-fa hayrn shiu cha faggys da’n ard-valley tra va shiu caggey? nagh row fys eu dy lhiggagh ad veih’n voalley?

²¹ Quoi woaill Abimelech mac Jerubbesheth? nagh hilg ben peesh dy chlagh-wyllin er veih’n voalley, dy dooar eh baase ayns Thebez? cre’n-fa hie shiu cha faggys da’n voalley? Eisht abbyr uss, Ta dty harvaant Uriah yn Hittite marroo myr-chaagh.

²² Myr shen hie’n chaghter, as hoilshee eh da David ooilley ny va Joab er choyrt roish.

²³ As dooyrt yn chaghter rish David, Son shickyrys va ny deiney cosney orrin, as haink ad magh orrin ’sy vagher, as deiyr shin ad back eer gys giat y valley.

²⁴ As lhig ny sideyryn veih’n voalley er dty harvaantyn, as ta paart jeh sharvaantyn y ree marroo, as ta dty harvaant Uriah yn Hittite marroo myrgeddin.

²⁵ Eisht dooyrt David rish y chaghter, Myr shoh nee oo gra rish Joab, Ny lhaggee dty laue son shoh; son ta’n cliwe stroie fer chammah’s fer elley: niartee dty laue ny s’troshey noi’n ard-valley, as stroie eh; as cur eh ayns cree.

²⁶ As tra cheayll ben Uriah dy row Uriah yn sheshey eck marroo, ren ee dobberan er e hon.

²⁷ As tra va laghyn y dobberan ec kione, hug David fys, as hug eh lesh ee gys e hie hene, as haink ee dy ve e ven, as rug ee mac da. Agh va’n Chiarn jymmoosagh son shen ny va David er n’yannoo.