2 Samuel 1 - Yn Vible Casherick 1775 1819

CAB. I

¹ Nish haink eh gy-kione, lurg baase Saul, tra va David er hyndaa veih slaughter ny Amalekiteyn, as er vuirriaght daa laa ayns Ziklag;

² Haink eh eer gy-kione er yn trass laa, dy daink dooinney veih camp Saul, lesh e choamrey raipit, as ooir er e chione: as tra haink eh fenish Ghavid, dy chroym eh gys y thalloo, as ren eh biallys.

³ As dooyrt David rish, Cre veih haink oo? As dooyrt eh rish, Veih camp Israel ta mee er gosney.

⁴ As dooyrt David rish, Kys hie’n caggey er? ta mee guee ort, insh dou. As dreggyr eh, Ta’n pobble er roie ersooyl veih’n chaggey, as ta ymmodee jeu myrgeddin er duittym, as t’ad marroo, as ta Saul as Jonathan e vac marroo neesht.

⁵ As dooyrt David rish y dooinney aeg dinsh da, Kys dhyt’s dy vel Saul as Jonathan e vac marroo?

⁶ As dreggyr yn dooinney aeg dinsh da, Myr haghyr dou cheet er slieau Gilboa, cur-my-ner, va Saul croymmey er e shleiy; as cur-my-ner, va ny fainee as ny markee chionney dy creoi er e eiyrt’s.

⁷ As tra yeeagh eh ny yeï, honnick eh mish, as deïe eh dou: as dreggyr mish, Ta mee ayns shoh.

⁸ As dooyrt eh rhym, Quoi oo-hene? As dreggyr mee, Amalekite mee.

⁹ As dooyrt eh rhym reesht, Shass, ta mee guee ort, orrym, as marr mee ass y raad; son ta mee ayns guinn y vaaish, ga dy vel ennal foast aynym.

¹⁰ Myr shen hass mee er, as varr mee eh, son dy row mee shickyr nagh row saase ny chour lurg da ve er duittym: as ghow mee yn crown v’er e chione, as y brashleid v’er e roih, as ta mee er choyrt lhiam ad gys my hiarn.

¹¹ Eisht ghow David greme er e choamraghyn, as raip eh ad; as myrgeddin ren ooilley ny deiney va mârish.

¹² As ren ad dobberan as keayney, as hrosht ad derrey’n astyr, son Saul as son Jonathan e vac, as son pobble y Chiarn, as son thie Israel; er-yn-oyr dy row ad er duittym lesh y chliwe.

¹³ As dooyrt David rish y dooinney aeg dinsh da, Cre veih t’ou uss? As dreggyr eh, Ta mee mac joarree, m’ Amalekite.

¹⁴ As dooyrt David rish, Cammah, nagh row aggle ort dy heeyney magh dty laue dy stroie fer-ooilit y Chiarn?

¹⁵ As deïe David er fer jeh ny deiney aegey, as dooyrt eh, Irree, as tuitt er. As woaill eh eh dy dooar eh baase.

¹⁶ As dooyrt David rish, Dty uill dy row er dty chione hene: son ta dty veeal er n’ymmyrkey feanish dt’oï, gra, Ta mee er varroo fer-ooilit y Chiarn.

¹⁷ As vrish David magh ayns yn arrane oanluckee shoh harrish Saul, as harrish Jonathan e vac:

¹⁸ (As hug eh currym orroo dy ynsaghey use y vhow da cloan Yudah: cur-my-ner, te scruit ayns lioar Yasher:)

¹⁹ Ta aalid Israel er ny stroie er dty ynnydyn ard: kys ta ny treanee er duittym!

²⁰ Ny insh-jee shoh ayns Gath, ny lhig da ve focklit magh ayns straidyn Askelon; er-aggle dy gow inneenyn ny Philistinee boggey, as dy jean inneenyn ny chymmyltee boggyssagh.

²¹ Shiuish sleityn Yilboa, ny lhig da druight ny fliaghey cheet erriu, ny magheryn ourallagh: son shen y raad va scape y dooinney niartal, eer scape Saul, dy naareydagh er ny hilgey ersooyl, myr nagh beagh eh er ny ve yn ree ooilit.

²² Veih fuill ny fir-chaggee, veih riurid yn vooinjer niartal, cha hayrn Jonathan e vhow ayns fardail, as son cliwe Saul cha daink eh back follym.

²³ S’ghraihoil as s’aalin yn aigney-mie va eddyr Saul as Jonathan ayns nyn mioys, as ayns baase cha row ad er nyn scarrey: v’ad ny s’bieau na urlee, v’ad ny s’troshey na lionyn.

²⁴ Shiuish inneenyn Israel, keayn-jee son Saul, ren nyn goamrey dy aalin lesh scarleod, marish toyrtyssyn elley; ren shiu y hoiaghey magh lesh jewellyn dy airh, er nyn goamrey.

²⁵ Kys ta ny treanee er duittym ayns mean y chaggey! O Yonathan v’ou er dty stroie ayns ny ardjyn.

²⁶ Ta mee seaghnit er dty hon, my vraar Yonathan: s’dooie t’ou er ny ve dou, as graihagh orrym: as dty ghraih er my hon’s yindyssagh, erskyn graih mraane.

²⁷ Kys ta ny treanee er duittym, as ny armyn-caggee er gholl naardey!