2 Reeaghyn 6 - Yn Vible Casherick 1775 1819

CAB. VI

¹ AS dooyrt mec ny phadeyryn rish Elisha, Cur-my-ner nish, ta’n ynnyd raad ta shin cummal mayrt’s ro choon er nyn son.

² Lhig dooin goll, ta shin guee ort, gys Jordan, dy chooilley ghooinney j’in dy gheddyn fuygh veih shen, as ayns shen lhig dooin thie fondagh y hroggal dooin hene dy chummal ayn. As dreggyr eh, Immee-jee.

³ As dooyrt fer jeu, Lhig da ve dt’aigney, ta mee guee ort, dy gholl marish dty harvaantyn. As dooyrt eh, Neem’s goll.

⁴ Er shoh hie eh mâroo. As tra v’ad er jeet gys Jordan, yiare ad sheese fuygh.

⁵ Agh myr va fer lhieggal sheese billey, huitt kione y teigh ayns yn ushtey: as deïe eh, as dooyrt eh, Ah treih, vainshtyr! son ve eeasit.

⁶ As dooyrt y dooinney dy Yee, Cre’n raad huitt eh? As yeeagh eh da yn ynnyd. As yiare eh sheese banglane, as cheau eh ayns shen eh; as haink yn yiarn er yn eaghtyr.

⁷ Eisht dooyrt eh, Gow hood eh. As heeyn eh magh e laue, as hrog eh eh.

⁸ Eisht ren ree Syria caggey noi Israel, as ghow eh coyrle marish ny fir-oik echey, gra, Ayns lheid as lheid yn ynnyd vees my champ.

⁹ As hug yn dooinney dy Yee fys gys ree Israel, gra, Bee er dty hwoaie nagh gow shaghey lheid y boayl shen; son shen y raad ta ny Syrianee nyn lhie cooyl-chlea.

¹⁰ As hug ree Israel scrialtee gys yn ynnyd mychione va’n dooinney dy Yee er n’insh as er chur raaue da, as haue eh eh-hene liorish nagh jagh eh ayns shen, keayrt as keayrt.

¹¹ Shen-y-fa va cree ree Syria dy mooar seaghnit mysh y chooish shoh, as deïe eh er ny fir-oik echey, as dooyrt eh roo, Nagh n’insh shiu dou, quoi ny mast’ ain t’er vrah shin gys ree Israel?

¹² As dooyrt fer jeh e offishearyn, Cha vel unnane, my hiarn, O ree: agh ta Elisha, yn phadeyr t’ayns Israel, ginsh da ree Israel ny goan t’ou uss dy loayrt ayns dty hiamyr-lhiabbagh.

¹³ As dooyrt eh, Immee-jee, as fow-jee magh e oayll, dy voddym’s deiney ’choyrt dy ghoaill eh. As ve inshit da, gra, cur-my-ner, t’eh ayns Dothan.

¹⁴ Shen-y-fa hug eh gys shen cabbil, as fainee, as sheshaght mooar caggee: as haink ad ’syn oie, as chruinnee ad yn ard-valley ooilley mygeayrt.

¹⁵ As tra va sharvaant yn dooinney dy Yee er n’irree dy moghey, as er n’gholl magh, cur-my-ner, va sheshaght-caggee er chruinnaghey yn ard-valley, chammah lesh cabbil, as fainee: as dooyrt e harvaant rish, Ah treih, my vainshtyr! cre’n erree hig orrin?

¹⁶ As dreggyr eh, Ny bee aggle ort; son t’adsyn ta mârin ny s’troshey na adsyn ta mâroosyn.

¹⁷ As ghow Elisha padjer, as dooyrt eh, Hiarn, ta mee guee ort, foshil ny sooillyn echey dy vod eh fakin. As doshil y Chiarn sooillyn y dooinney aeg, as honnick eh; as cur-my-ner, va’n slieau lane dy chabbil as dy ainee aile ooilley mygeayrt Elisha.

¹⁸ As tra haink ad neose huggey, ghow Elisha padjer gys y Chiarn, as dooyrt eh, Cur shaghrynys, ta mee guee ort, er soilshey yn pobble shoh. As woaill eh ad lesh dellid, cordail rish goo Elisha.

¹⁹ As dooyrt Elisha roo, Cha nee shoh’n raad, chamoo she shoh’n ard-valley; eiyr-jee orrym’s, as ver-ym lhiam shiu gys y dooinney ta shiu dy hirrey. Agh leeid eh ad gys Samaria.

²⁰ As haink eh gy-kione tra v’ad er jeet gys Samaria, dy dooyrt Elisha, Hiarn, foshil sooillyn ny deiney shoh dy vod ad fakin. As doshil yn Chiarn ny sooillyn oc, as honnick ad; as cur-my-ner, v’adsyn ayns mean Samaria.

²¹ As dooyrt ree Israel rish Elisha, tra honnick eh ad, My ayr, bwoaill-ym ad? jean-ym ad y woalley?

²² As dreggyr eh, Cha der oo dty laue orroo: jinnagh oo adsyn y yiarey jeh t’ou dy ghoaill nyn gappee lesh dty chliwe as lesh dty vhow? Soie arran as ushtey roue, dy vod ad gee as giu, as goll gys nyn mainshtyr.

²³ As doardee eh dy aarlaghey palchey beaghey er nyn son: as tra v’ad er n’ee as er n’iu, lhig eh yn raad daue, as hie ad gys nyn mainshtyr. Myr shen cha daink spooilleyderyn ny Syrianee arragh gys cheer Israel.

²⁴ Agh haink eh gy-kione, lurg shoh, dy haggil Ben-hadad ree Syria yn slane sheshaght-caggee echey, as hie eh seose, as ren eh caggey noi Samaria.

²⁵ As va gortey vooar ayns Samaria: as cur-my-ner, chruinnee ad eh cha chion shen, dy row kione assyl er ny chreck son kiare-feed peesh dy argid, as mysh punt dy arroo greddanit son queig peeshyn dy argid.

²⁶ As myr va ree Israel goll shaghey er y voalley, deïe ben huggey gra, Cooin lhiam, my hiarn, O ree.

²⁷ As dooyrt eh, Mannagh gooin y Chiarn lhiat, kys oddym’s cooney lhiat? nee veih laare y toalt, ny ass y doagh-feeyney?

²⁸ As dooyrt y ree, Cre ta jannoo ort? As dooyrt ee, Dooyrt y ven shoh rhym, Cur dooin dty vac, dy vod mayd gee eh jiu; as nee mayd gee my vac’s mairagh.

²⁹ Er shoh vroie shin my vac, as d’ee shin eh: as dooyrt mee r’ee yn laa er-giyn, Cur dooin dty vac, dy vod mayd gee eh; as t’ee er cheiltyn y mac eck.

³⁰ As haink eh gy-kione, tra cheayll y ree goan y ven, dy raip eh e choamrey, as hie eh shaghey er y voalley; as yeeagh ’y pobble, as cur-my-ner, va aanrit-sack er, by-niessey da e chorp.

³¹ Eisht dooyrt eh, Myr shen as ny smoo dy jean Jee rhym’s, my vees kione Elisha mac Shaphat faagit shassoo er y laa jiu.

³² Agh va Elisha soie ayns e hie, (as y chanstyr nyn soie mârish:) as hug y ree dooinney voish hene, agh roish my rosh y chaghter huggey, dooyrt eh rish y chanstyr, Vaik-jee kys ta mac y dunver shoh er choyrt dy ghoaill y chione jee’m? jeeagh-jee, tra hig y chaghter, jeigh-jee yn dorrys, as cum-jee eh dy shickyr ec y dorrys; nagh vel sheean cassyn e vainshtyr ec e voynyn?

³³ As choud as v’eh foast taggloo roo, cur-my-ner haink y chaghter neose huggey: as dooyrt y ree, Cur-my-ner, ta’n olk shoh veih’n Chiarn; cre’n-fa yinnin farkiagh son cooney veih’n Chiarn ny-sodjey?