2 Reeaghyn 3 - Yn Vible Casherick 1775 1819

CAB. III

¹ Nish ayns yn hoghtoo vleïn jeig jeh Jehoshaphat ree Yudah, ghow Jehoram mac Ahab toshiaght dy reill harrish Israel ayns Samaria, as ren eh reill daa vleïn jeig.

² As ren eh olk ayns shilley’n Chiarn; agh cha nee casley rish e ayr, as casley rish e voir; son hug eh ersooyl jalloo Vaal va e ayr er n’yannoo.

³ Ny-yeih ren eh lhiantyn rish peccaghyn Yeroboam mac Nebat, chleaynee Israel gys peccah, as cha hreig eh ad.

⁴ As va Mesha ree Voab dooinney mooar keyrragh, as deeck eh [myr keesh] da ree Israel keead thousane eayn, as keead thousane rea, marish yn ollan.

⁵ As haink eh gy-kione, tra va Ahab marroo, dy dirree ree Voab magh noi ree Israel.

⁶ As hie ree Jehoram magh ec y traa shoh ass Samaria, as ren eh ooilley Israel y earroo.

⁷ As hie eh as hug eh chaghteryn gys Jehoshaphat ree Yudah, gra, Ta ree Voab er n’irree-magh m’oï: jig uss mârym’s noi Moab dy chaggey? As dooyrt eh, Hig-ym seose: ta mish myr t’ou hene, my phobble myr dty phobble’s, as ny cabbil aym’s myr ny cabbil ayd’s.

⁸ As dooyrt eh, Cre’n raad hed mayd seose? As dreggyr eh, Yn raad trooid faasagh Edom.

⁹ Myr shen hie ree Israel, as ree Yudah, as ree Edom: as ghow ad combaase jeh jurnah shiaght laa: as cha row ushtey son y cheshaght-chaggee, ny son yn ollagh deiyr orroo.

¹⁰ As dooyrt ree Israel, Aless, dy vel y Chiarn er hayrn cooidjagh ny three reeaghyn shoh, dy livrey ad gys laue Voab.

¹¹ Agh dooyrt Jehoshaphat, Nagh vel ayns shoh phadeyr y Chiarn; liorishyn dy vod mayd briaght jeh’n Chiarn? As dreggyr fer jeh sharvaantyn ree Israel, as dooyrt eh, Ta ayns shoh Elisha mac Shaphat, ren deayrtey ushtey er laueyn Elijah.

¹² As dooyrt Jehoshaphat, Ta goo’n Chiarn mârishyn. Myr shen hie ree Israel, as Jehoshaphat, as ree Edom, sheese huggey.

¹³ As dooyrt Elisha rish ree Israel, Cre t’ayd dy yannoo rhym’s? fow royd gys phadeyryn dt’ayrey, as gys phadeyryn dty vayrey. As dooyrt ree Israel rish, Ny abbyr shen; son ta’n Chiarn er hayrn ny three reeaghyn shoh cooidjagh dy livrey ad gys laue Voab.

¹⁴ As dooyrt Elisha, Myr ta’n Chiarn dy heshaght-chaggee bio, kiongoyrt rish ta mish shassoo, son shickyrys, er-be dy vel mee soiaghey jeh persoon Jehoshaphat ree Yudah, cha jeeaghin dty raad, ny fakin oo.

¹⁵ Agh nish, cur-jee lhieu hym kiaulleyder. As haink eh gy-kione, tra chloie yn kiaulleyder, dy daink laue y Chiarn er.

¹⁶ As dooyrt eh, Myr shoh ta’n Chiarn dy ghra, Cleiy-jee ymmodee jeeigyn ’sy choan shoh.

¹⁷ Son myr shoh ta’n Chiarn dy ghra, Cha n’ennee shiu geay, chamoo nee shiu fliaghey ’akin; ny-yeih bee’n coan shen er ny lhieeney lesh ushtey, dy vod shiu giu, chammah shiu-hene, as yn ollagh, as y maase eu.

¹⁸ As cha vel shoh agh red fardalagh ayns shilley’n Chiarn: nee eh livrey ny Moabiteyn myrgeddin gys nyn laue

¹⁹ As nee shiu bwoalley dy chooilley ard-valley fencit, as dy chooilley reih ard-valley, as nee shiu lhieggal dy chooilley villey mie, as lhieeney seose dagh chibbyr ushtey, as dy chooilley pheesh dy halloo mie nee shiu mhilley lesh claghyn.

²⁰ As haink eh gy-kione ’sy voghrey, mysh traa yn oural-arran, cur-my-ner haink ushtey rish raad Edom; as va’n cheer er ny lhieeney lesh ushtey.

²¹ As tra cheayll ooilley ny Moabiteyn dy row ny reeaghyn er jeet neose dy chaggey nyn ’oï, dy haggil ad ooilley ny va fondagh son caggey, shenn as aeg, as hass ad er y chagliagh.

²² As tra dirree ad seose dy moghey, as y ghrian soilshean er yn ushtey, honnick ny Moabiteyn yn ushtey, er y cheu elley jiarg myr fuill:

²³ As dooyrt ad, She fuill shoh: ta ny reeaghyn son shickyrys er nyn stroie, as t’ad er duittym yn derrey yeh er y jeh elley: nish er-y-fa shen, sheese Voab gys y spooilley.

²⁴ As tra haink ad gys camp Israel, hrog ny Israeliteyn, as woaill ad ny Moabiteyn, myr shen dy ren ad chea rhymboo: as hie ad er nyn doshiaght bwoalley sheese ny Moabiteyn, eer ayns y cheer oc hene.

²⁵ As lhieg ad sheese ny ard-valjyn oc, as er dy chooilley pheesh dy halloo mie ren dagh dooinney tilgey clagh, as lhieen ad eh; as yeigh ad ooilley ny chibbraghyn ushtey, as lhieg ad ooilley ny biljyn mie: ny-lomarcan ayns Kir-haraseth daag ad ny voallaghyn echey shassoo; agh ny-yeih hie ny sling-harryn mygeayrt-y-mysh, as woaill ad eh.

²⁶ As tra honnick ree Voab dy row’n caggey ro hrome n’oï, ghow eh mârish shiaght cheead dooinney va tayrn y chliwe, dy vrishey trooid eer raad va ree Edom: agh cha daink eh lhieu.

²⁷ Eisht ghow eh e vac shinney, va dy reill ’syn ynnyd echey, as heb eh eh son oural-losht er yn voalley. As va jymmoose er Israel son shoh: as daag ad eh, as hyndaa ad gys y cheer oc hene.