2 Reeaghyn 24 - Yn Vible Casherick 1775 1819

CAB. XXIV

¹ Ayns y lhing echeysyn haink Nebuchadnezzar ree Vabylon seose, as va Jehoiakim fo keesh da three bleeaney: eisht hyndaa eh as ren eh girree-magh n’oï.

² As hug y Chiarn magh n’oï sheshaghtyn-caggee jeh ny Caldeanee, as sheshaghtyn jeh ny Syrianee, as jeh ny Moabiteyn, as jeh cloan Ammon, as hug eh ad noi Judah dy stroie eh, cordail rish goo yn Chiarn, ren eh loayrt liorish e harvaantyn ny phadeyryn.

³ Ec sarey yn Chiarn haink shoh dy jarroo er Judah, dy scughey ad ass e hilley son peccaghyn Vanasseh, cordail rish ooilley ny ren eh;

⁴ As myrgeddin son yn uill neu-chyndagh gheayrt eh, (son lhieen eh Jerusalem lesh fuill gyn-loght,) nagh jinnagh y Chiarn pardooney.

⁵ Nish yn chooid elley jeh obbraghyn Jehoiakim, as ooilley ny ren eh, nagh vel ad scruit ayns lioar recortyssyn reeaghyn Yudah?

⁶ Eisht chaddil Jehoiakim marish e ayraghyn: as ren Jehoiachin e vac reill ’syn ynnyd echey.

⁷ As cha daink ree Egypt arragh ass e heer hene: son va ree Vabylon er ghoaill, veih awin Egypt gys awin Euphrates, ooilley ny va bentyn da ree Egypt.

⁸ Va Jehoiachin hoght bleeaney jeig dy eash tra ghow eh toshiaght dy reill; as ren eh reill three meeaghyn ayns Jerusalem. As va ennym y voir echey Nehushta, inneen Elnathan jeh Jerusalem.

⁹ As ren eh shen ny va olk ayns shilley yn Chiarn, cordail rish ooilley ny va e ayr er n’yannoo.

¹⁰ Mysh y traa shen haink deiney-caggee Nebuchadnezzar ree Vabylon seose noi Jerusalem, as chruinnee ad stiagh yn ard-valley.

¹¹ As haink Nebuchadnezzar ree Vabylon noi yn ard-valley, as ren e gheiney caggey n’oï.

¹² As hie Jehoiachin ree Yudah magh gys ree Vabylon, eh-hene, as e voir, as e gheiney, as e phrinceyn, as ny fir-oik echey; as ghow ree Vabylon eh ayns yn hoghtoo vleïn jeh’n reill echey.

¹³ As hug eh lesh magh veih shen ooilley tashtaghyn thie yn Chiarn, as tashtaghyn thie yn ree, as yiare eh ayns peeshyn ooilley ny siyn airhey va Solomon ree Israel er n’yannoo ayns chiamble y Chiarn, myr va’n Chiarn er ghra.

¹⁴ As hug eh lesh ooilley Jerusalem ersooyl, as ooilley ny princeyn, as ooilley ny deiney niartal caggee, eer jeih thousaneyn cappee, as ooilley ny keirdee, as ny gaauenyn: cha row veg faagit, er-lhimmey jeh’n boanlagh s’boghtey jeh phobble ny cheerey.

¹⁵ As hug eh lesh Jehoiachin ersooyl gys Babylon, as moir y ree, as mraane y ree, as ny fir-oik, as ard-gheiney ny cheerey; ad shen hug eh lesh ayns cappeeys veih Jerusalem gys Babylon.

¹⁶ As ooilley ny deiney niartal, eer shiaght thousaneyn, as fir-cheirdee as gaauenyn un thousane, ooilley ny va trean as aghtal son caggey, eer ad shen hug ree Vabylon lesh nyn gappee gys Babylon.

¹⁷ As ren ree Vabylon Mattaniah naim Jehoiachin ree ny ynnyd, as chaghlaa eh yn ennym echey gys Zedekiah.

¹⁸ Va Zedekiah bleïn as feed dy eash tra ghow eh toshiaght dy reill; as ren eh reill un vleïn jeig ayns Jerusalem. As ennym e voir va Hamutal, inneen Jeremiah jeh Libnah.

¹⁹ As ren eh shen ny va olk ayns shilley yn Chiarn, cordail rish ooilley ny va Jehoiakim er n’yannoo.

²⁰ Son trooid jymmoose y Chiarn haink shoh er Jerusalem as Judah, dy hilgey ad magh veih e enish, dy ren Zedekiah girree-magh noi ree Vabylon.