2 Reeaghyn 17 - Yn Vible Casherick 1775 1819

CAB. XVII

¹ Ayns y nah vleïn jeig jeh Ahaz ree Yudah, ghow Hoshea mac Elah toshiaght dy reill harrish Israel ayns Samaria nuy bleeaney.

² As ren eh shen ny va olk ayns shilley yn Chiarn, agh cha nee ooilley-magh myr reeaghyn Israel va roish

³ Haink Shalmaneser ree Assyria seose n’oï; as haink Hoshea dy ve fo e viallys, as deeck eh keesh da.

⁴ As dennee ree Assyria dy row Hoshea mysh brishey conaant rish; son v’eh er choyrt chaghteryn gys So ree Egypt, chamoo v’eh er eeck y cheesh bleeaney da ree Assyria: shen-y-fa ren ree Assyria jeigh eh seose ny phryssoonagh ayns geulaghyn.

⁵ Eisht haink ree Assyria seose trooid ooilley yn cheer, as hie eh seose gys Samaria, as ren eh caggey n’oï son three bleeaney.

⁶ Ayns y nuyoo vleïn jeh Hoshea, ghow ree Assyria Samaria, as hug eh lesh Israel ersooyl gys Assyria, as ad y hoiaghey ayns Halah, as ayns Habor liorish awin Gozan, as ayns ard-valjyn ny Medeyn.

⁷ Son myr shen ve, dy row cloan Israel er n’yannoo peccah noi yn Chiarn y Jee oc, hug lesh ad seose ass cheer Egypt, veih fo laue Pharaoh ree Egypt, as er hirveish jeeghyn joarree,

⁸ As er n’ymmyrkey ad-hene lurg cliaghtaghyn ny ashoonee, (va’n Chiarn er n’eebyrt roish eddin cloan Israel,) as ny oardaghyn peccoil va reeaghyn Israel er n’yannoo.

⁹ As ren cloan Israel dy follit shen nagh row jeeragh noi’n Chiarn y Jee oc, as hrog ad ard-ynnydyn ayns ooilley nyn maljyn, veih toor yn arreyder, gys yn ard-valley fencit.

¹⁰ As hoie ad seose jallooyn as keylljyn ayns dy chooilley chronk ard, as fo dy chooilley villey glass:

¹¹ As losht ad incense ayns ooilley ny ard-ynnydyn, myr ren ny ashoonee va’n Chiarn er n’eiyrt magh rhymboo; as hug ad rish dy chooilley vee-chraueeaght dy vrasnaghey yn Chiarn gys corree:

¹² Son hirveish ad jallooyn, my-nyn-gione va’n Chiarn er ghra, Cha jean shiu shoh y yannoo.

¹³ Foast dymmyrk y Chiarn feanish noi Israel, as noi Judah, liorish ooilley ny phadeyryn, as ooilley ny fakyderyn, gra, Chyndaa-jee veih nyn ghrogh raaidyn, as freill-jee my annaghyn as my lattyssyn, cordail rish y slane leigh ren mee y harey da nyn ayraghyn, as shen doardee mee diuish liorish my harvaantyn ny phadeyryn.

¹⁴ Ny-yeih, cha n’eaishtagh ad, agh v’ad creoi-wannallagh, myr va nyn ayraghyn, nagh ren credjal ayns y Chiarn y Jee oc.

¹⁵ As vrish ad e lattyssyn, as e chonaant ren eh rish nyn ayraghyn, as e recortyssyn lioroo v’eh er n’ymmyrkey feanish nyn ’oï; as deiyr ad er fardalys as ommijys, as hie ad geiyrt er aghtyn ny ashoonee va mygeayrt-y-moo, mychione oc va’n Chiarn er harey ad, nagh jinnagh ad y lheid.

¹⁶ As hreig ad ooilley annaghyn y Chiarn y Jee oc, as ren ad daue hene jallooyn grainnit, eer daa lheiy, as hoie ad keyll, as hug ad ooashley da ooilley rollageyn yn aer, as hirveish ad Baal.

¹⁷ As hug ad er ny mec as ny inneenyn oc dy gholl trooid yn aile, as hug ad rish faishnys as obbeeys, as chreck ad ad-hene dy yannoo olk ayns shilley yn Chiarn, dy vrasnaghey eh gys corree.

¹⁸ Shen-y-fa va’n Chiarn feer chorree rish Israel, as scugh eh ad ass e hilley: cha row faagit agh tribe Yudah ny-lomarcan.

¹⁹ Chamoo dreill Judah annaghyn y Chiarn y Jee oc, agh jimmee ad ayns ny slattyssyn va Israel er n’yannoo.

²⁰ As ren y Chiarn tilgey jeh sluight Israel, as hug eh seaghyn nyn raad, as livrey eh ad gys laueyn ny spooilleyderyn, derrey v’eh dy bollagh er scughey ad ass e hilley.

²¹ Son yiare eh Israel jeh veih thie Ghavid; ad ren ad Jeroboam mac Nebat ny ree: as deiyr Jeroboam Israel veih shirveish y Chiarn, as hug eh orroo peccah trome y yannoo.

²² Son huill cloan Israel ayns ooilley peccaghyn Yeroboam, as deiyr ad orroo;

²³ Derrey scugh y Chiarn Israel ass e hilley, myr v’eh er ghra rish ooilley e harvaantyn ny phadeyryn. Myr shen va Israel er nyn goyrt lhieu ersooyl ass y cheer oc hene gys Assyria gys y laa t’ayn jiu.

²⁴ Agh hug Assyria lesh deiney veih Babylon, as veih Cuthah, as veih Ava, as veih Hamath, as veih Sepharvaim, ren eh y hoiaghey ayns ard-valjyn Samaria, ayns ynnyd cloan Israel; as ren ad cummal ayns Samaria, as ayns e ard-valjyn.

²⁵ As myr shen ve, ee toshiaght yn chummal oc ayns shen, nagh ghow ad aggle roish y Chiarn; shen-y-fa hug y Chiarn lionyn nyn vud oc, varr paart jeu.

²⁶ Shen-y-fa hug ad fys gys ree Assyria, gra, Ta ny ashoonyn, t’ou er scughey, as er hoiaghey ayns ard-valjyn Samaria, mee-hushtagh jeh shirveish Jee ny cheerey: shen-y-fa, t’eh er chur lionyn nyn vud oc dy stroie ad, er-yn-oyr nagh vel toiggal oc jeh Jee ny cheerey.

²⁷ Eisht hug ree Assyria sarey, gra, Cur-jee huc fer jeh ny saggyrtyn hug shiu lhieu veih shen, as lhig da goll as cummal ayn, as ad y ynsaghey ayns tushtey cooie jeh Jee ny cheerey.

²⁸ Eisht haink fer jeh ny saggyrtyn v’ad er choyrt lhieu veih Samaria, as chum eh ayns Beth-el, as dynsee eh ad ayns aggle y Chiarn.

²⁹ Ny-yeih, ren dagh ashoon jeeghyn daue hene, as ad y hoiaghey seose ayns thieyn ny ard-ynnydyn va ny Samaritanee er hroggal, dagh ashoon ayns ard-valjyn nyn gummallyn.

³⁰ As ren deiney Vabylon goaill Succoth-benoth son y jee oc, as deiney Cuth, Nergal, as deiney Hamath, Ashima,

³¹ As ren ny Aviteyn Nibhaz as Tartak, as losht ny Sepharviteyn nyn gloan ayns yn aile gys Adrammelech as Anammelech jeeghyn Sepharvaim.

³² Myr shen ghow ad aggle roish y Chiarn, as ren ad jeh’n vooinjer b’inshley jeu saggyrtyn ny ard-ynnydyn, ren oural y hebbal er nyn son ayns thieyn ny ard-ynnydyn.

³³ Hug ad ammys da’n Chiarn, as [ec y traa cheddin] hirveish ad ny jeeghyn oc hene, lurg cliaghtey ny ashoonyn hug ad lhieu veih shen.

³⁴ Gys y laa t’ayn jiu t’ad geiyrt er nyn shenn chliaghtaghyn: cha vel ad goaill aggle roish y Chiarn, chamoo t’ad jannoo cordail rish ny slattyssyn ny ny oardaghyn, ny cordail rish y leigh as yn anney ren y Chiarn sarey da cloan Yacob, v’eh er n’enmys Israel;

³⁵ Roosyn va’n Chiarn er n’yannoo conaant, as er harey ad, gra, Cha der shiu ooashley da jeeghyn elley, ny shiu-hene y chroymmey sheese huc, ny ad y hirveish, ny oural y hebbal daue:

³⁶ Agh y Chiarn, hug lesh shiu magh ass cheer Egypt lesh ard phooar as roih sheeynt magh, roishyn gowee shiu aggle, eshyn nee shiu ooashlaghey, as huggeysyn nee shiu ouralley.

³⁷ As ny slattyssyn, as ny oardaghyn, as y leigh, as yn anney, scrieu eh er nyn son, bee shiuish kiaralagh dy chooilleeney son dy bragh; as cha jean shiu aggle y ghoaill roish jeeghyn elley

³⁸ As y conaant ta mee er n’yannoo riu, cha jean shiu eh ’yarrood, chamoo ver shiu ooashley da jeeghyn elley.

³⁹ Agh nee shiu aggle y ghoaill roish y Chiarn y Jee eu, as nee eshyn shiu y livrey veih laue ooilley nyn noidyn.

⁴⁰ Ny-yeih cha dug ad geill da, agh ren ad lurg nyn shenn chliaghtaghyn.

⁴¹ Shoh myr ren ny ashoonee shirveish y Chiarn, as myrgeddin ny jallooyn grainnit oc hene, chammah nyn gloan as cloan nyn glienney: myr ren ny ayraghyn oc, myr shen t’ad jannoo gys y laa t’ayn jiu.