2 Reeaghyn 16 - Yn Vible Casherick 1775 1819

CAB. XVI

¹ Ayns y chiaghtoo vleïn jeig jeh Pekah mac Remaliah, ghow Ahaz mac Jotham ree Yudah toshiaght dy reill.

² Va Ahaz feed bleïn tra ghow eh toshiaght dy reill, as ren eh reill shey bleeaney jeig ayns Jerusalem; agh cha ren eh shen ny va cairagh ayns shilley yn Chiarn e Yee, myr ren David e ayr.

³ Agh jimmee eh ayns raad reeaghyn Israel, coyrt eer er e vac dy gholl trooid yn aile, cordail rish eajeeys ny ashoonee, ad va’n Chiarn er n’eiyrt magh roish cloan Israel.

⁴ As ren eh chebbal as lostey incense ayns ny ynnydyn ardey, as er ny croink, as fo dy chooilley villey glass.

⁵ Eisht haink Rezin ree Syria, as Pekah mac Remaliah ree Israel, seose gys Jerusalem dy chaggey: as chruinnee ad Ahaz stiagh, agh cha yarg ad er.

⁶ Ec y traa shen chossyn Rezin ree Syria Elath reesht da Syria, as deiyr ad ny Hewnyn veih Elath: as haink ny Syrianee gys Elath, as chum ad ayns shen gys y laa t’ayn jiu.

⁷ Myr shen hug Ahaz chaghteryn gys Tiglath-pileser ree Assyria, gra, Ta mish dty harvaant as dty vac: tar seose as saue mee ass laue ree Syria, as veih laue ree Israel, t’er n’irree seose m’oï.

⁸ As ghow Ahaz yn argid as airh v’er ny gheddyn ayns thie yn Chiarn, as ayns tashtaghyn thie yn ree, as hug eh eh son gioot gys ree Assyria.

⁹ As choard ree Assyria rish; son hie ree Assyria seose noi Damascus, as ghow eh eh, as hug eh lesh y pobble v’ayn nyn gappee gys Kir, as varr eh Rezin.

¹⁰ As hie ree Ahaz gys Damascus dy choyrt meeiteil da Tiglath-pileser ree Assyria, as honnick eh yn altar v’ayns Damascus: as hug ree Ahaz gys Urijah yn saggyrt cummey yn altar, as sampleyr jeh, cordail rish ooilley yn obbyr echey.

¹¹ As ren Urijah yn saggyrt altar y hroggal, cordail rish ooilley ny hug ree Ahaz veih Damascus: myr shen ren Urijah yn saggyrt eh ry-hoi harragh ree Ahaz veih Damascus.

¹² As tra va’n ree er jeet veih Damascus, honnick y ree yn altar: as hayrn y ree er-gerrey da’n altar, as ren eh chebbal er.

¹³ As heb eh e oural-losht, as e oural-arran, as gheayrt eh magh e oural-feeyney, as spreih eh fuill yn oural-shee er yn altar.

¹⁴ Scugh eh myrgeddin yn altar prashey va kiongoyrt rish chiamble y Chiarn, veih eddin y thie, veih eddyr yn altar as thie’n Chiarn, as hug eh eh er cheu-twoaie yn altar.

¹⁵ As doardee ree Ahaz Urijah yn saggyrt, gra, Er yn altar vooar cheb-jee oural-losht y voghrey, as oural-arran yn astyr, as oural-losht y ree, as yn oural-arran echey, marish oural-losht pobble ny cheerey, as yn oural-arran, as yn oural-feeyney oc; as spreih er ooilley fuill yn oural-losht, as ooilley fuill dagh oural: as bee yn altar prashey my chour hene dy vriaght liorish.

¹⁶ Myr shoh ren Urijah yn saggyrt, cordail rish ooilley ny va ree Ahaz er harey.

¹⁷ As yiare ree Ahaz jeh chemmal ny binkyn, as scugh eh yn tubbyr jeu; as ghow eh neose yn faarkey prashey veih ny dew prashey va fo as hug eh eh ny lhie er claghyn y phavement.

¹⁸ As y fastee v’ad er hroggal son y doonaght ayns y thie, as galleree yn ree er cheu-mooie, hyndaa eh veih thie yn Chiarn er coontey ree Assyria.

¹⁹ Nish y chooid elley jeh obbraghyn Ahaz, nagh vel ad scruit ayns lioar recortyssyn reeaghyn Yudah?

²⁰ As ren Ahaz cadley marish e ayraghyn ayns ard-valley Ghavid: as ren Hezekiah e vac reill ayns e ynnyd.